ლა ლიგის მე-9 ტურში “ბარსელონამ” “ნუევო ლოს კარმენესზე” “გრანადას” ვერ მოუგო.
ანგარიში მე-17 წამზე გაიხსნა: მოედნის ცენტრში გავიმ ბურთი დაკარგა, მეტოქემ შეტევა მალევე წამოიწყო და ბრაიან სარაგოსამ გაიტანა. 29-ე წუთზე ამ უკანასკნელმა ჟიულ კუნდესა და ტერ შტეგენს თავბრუ დაახვია და დუბლი შეასრულა. ტაიმის მიწურულს ლამინ იამალმა “ბარსაში” სადებიუტო გოლი გაიტანა და 1 ბურთი გაქვითა.
მეორე ნახევარში “ბარსელონამ” რამდენიმე მომენტი შექმნა და საბოლოოდ, 85-ე წუთზე სერჟი რობერტოს გოლით გაათანაბრა. ამ გოლიდან რამდენიმე წამში ბრაიან სარაგოსა ჰეთ-თრიქის შესრულებასთან ახლოს იყო, მაგრამ მისი დარტყმა ძელს მოხვდა. 94-ე წუთზე ჟოაუ ფელიშმა გაიტანა, თუმცა გოლი თამაშგარის გამო გაუქმდა – აღსანიშნავია, რომ თამაშგარე მდგომარეობაში არა თავად პორტუგალიელი, არამედ ფერან ტორესი იყო და მსაჯებმა ჩათვალეს, რომ ის მომენტზე ზეგავლენას ახდენდა. მატჩი 2-2 დასრულდა.
“ბარსელონა” 21 ქულით მე-3 ადგილზეა. მას “ჟირონა” (22 ქულა) და “რეალ მადრიდი” (24 ქულა) უსწრებენ.
სანაკრებო პაუზის დასრულების შემდეგ “ბარსას” “ბილბაოსთან” შეხვედრა (22 ოქტომბერი) ელის, შემდეგ კი ჩემპიონთა ლიგაზე “შახტარს” (25 ოქტომბერი) დაუპირისპირდება.
ძალიან იშვიათად გოლის გამტანი არ იყოს ოფსაიტში და ვიღაცამ იქ ცხვირი ადრე შეყოო და გოლი გააუქმონ.
არ მგონია, რომ იგივე სიტუაციაში რეალს გაუუქმებდნენ გოლს. ამდენი უსამართლობის შემდეგ კიდევ ბარსას აბრალებენ მსაჯები მოისყიდაო.