ბარსელონა პავარის დამატებას შეეცდება

გადაწყვეტილია, რომ ბენჟამინ პავარი 2023 წელს “ბაიერნს” დატოვებს, რადგან მას გუნდის თავკაც იულიან ნაგელსმანთან ურთიერთობა ძალიან გაუფუჭდა.

Sport-ის ინფორმაციით, “ბარსელონა” ფრანგის შეძენით დაინტერესებული იქნება, მაგრამ მის სანაცვლოდ დიდი თანხის გადახდას არ აპირებს და თავად ფეხბურთელსაც მოუწევს, კლუბის სახელფასო სტრუქტურას მოერგოს. 

ბენჟამინის გაფორმების სურვილს “მილანი”, “ჩელსი” და “რეალ მადრიდიც” გამოხატავენ, მაგრამ ფეხბურთელს ჯერ არანაირი ოფიციალური შეთავაზება არ მიუღია. 

წყაროს ცნობით, სანამ პავარი “ბაიერნში” გადავიდოდა, ის “ბარსაში” ტრანსფერთან ახლოს იყო, თუმცა, საბოლოოდ, კატალონიელებმა ფეხბურთელზე უარი თქვეს – ფრანგის გარემოცვა “ბარსელონას” სწორედ ამ დროიდან იცნობს.

კატალონიურ გრანდში ხუან ფოიტი კვლავ მოსწონთ, მაგრამ უფრო შემტევი მარჯვენა მცველის მოყვანა სურთ. პავარის გარდა, იმ პროფილს, რომელსაც კლუბი ეძებს, არნაუ მარტინესი, ტომას მუნიე და დიოგუ დალო ერგებიან. თუ ჩავის დაცვითი სტილის მარჯვენა ფლანგელი დასჭირდება, ამ როლის შეთავსება რონალდ არაუხოსა და ჟიულ კუნდესაც შეუძლიათ.

რაც შეეხებათ “ბარსას” ამჟამინდელ მარჯვენა მცველებს – კლუბს სერჟი რობერტოსა და ექტორ ბელერინის კონტრაქტების გახანგრძლივების არანაირი განზრახვა არ აქვს. გუნდს დატოვებს სერჟინიო დესტიც, რომელიც ამჟამად “მილანშია” განათხოვრებული.