ბილბაო-ბარსელონა – ურთიერთშეხვედრების ისტორია

ხვალ “ბარსელონას” ესპანეთის თასზე მნიშვნელოვანი თამაში ელის. ერთმანეთს ტურნირის ისტორიაში საუკეთესო გუნდები, “ბილბაო” და “ბარსელონას” დაუპირისპირდებიან. 1/8 ფინალური ეტაპი ერთმატჩიანია, შეხვედრა კი ბილბაოში გაიმართება.

“ბარსელონასა” და “ბილბაოს” ურთიერთშეხვედრების დიდი ისტორია აქვთ. “ბარსა” ხვალინდელ მეტოქეზე მეტჯერ მხოლოდ “რეალსა” და “ატლეტიკოს”, “ბილბაო” კი მხოლოდ “რეალს” შეხვედრია.

ამ გუნდებს შორის გამართული 234 ოფიციალური თამაშიდან “ბარსელონამ” 118 მოიგო, 39 ფრედ დაასრულა და 77 წააგო, გაიტანა 434 და გაუშვა 329 გოლი.

მეტოქის მოედანზე “ბარსას” ცუდი შედეგი აქვს – 37 მოგება, 25 ფრე და 54 მარცხი. ასეთი ცუდი შედეგი გასული საუკუნის პირველ ნახევარში დაგროვილი წაგებების გამო დაფიქსირდა. 1929-1932 წლებში “ბარსამ” ბილბაოში ზედიზედ ექვსჯერ წააგო, შემდეგ იყო 3 მატჩში 2 მოგება და კიდევ უფრო ცუდი სერია – ზედიზედ 14 წაგება.

ექვსწაგებიან მონაკვეთში იყო ანგარიშით 1-12 მარცხი, რაც “ბლაუგრანას” ისტორიაში ყველაზე დიდი ანგარიშით წაგებაა.

ესპანეთის თასზე “ბარსელონასა” და “ბილბაოს” ერთმანეთთან 43-ჯერ უთამაშიათ. კატალონიელებმა 24 შეხვედრა მოიგეს, ბასკებმა – 13, ხოლო 6 დაპირისპირება ფრედ დასრულდა. თასზე მეტოქის მოედანზე ჩატარებული ბოლო 2 თამაშიდან “ბლაუგრანამ” ორივე წააგო.

ქვეყნის თასიდან “ბარსა” ბოლოს სწორედ “ბილბაომ” გამოაგდო. 2020 წელს, 1/4 ფინალის ერთმატჩიანი დაპირისპირება ასევე ბასკეთში გაიმართა და მაშინ მასპინძლებმა 1-0 მოიგეს. ერთადერთი გოლი მე-3 დამატებულ წუთზე სერხიო ბუსკეტსმა საკუთარ კარში გაიტანა.

იმ თამაშის შემდეგ გუნდებმა 6 შეხვედრა გამართეს. ლა ლიგის 4 დაპირისპირებიდან 3 “ბარსამ” მოიგო, ერთი კი, მიმდინარე სეზონში, ფრედ დასრულდა. ესპანეთის სუპერ თასის ფინალში “ბილბაომ” 3-2 მოიგო, იმავე სეზონის ბოლოს, ესპანეთის თასის ფინალში კი “ბარსამ” მეტოქე 4-0 გაანადგურა. ამ მოგების წყალობით “ბლაუგრანა” ტურნირის მოქმედი გამარჯვებულია.