ჰანსი ფლიკი ატლეტიკთან თამაშის შემდეგ

“სპოტიფაი კამპ ნოუზე” 2026/27 წლების სეზონის პირველ საშინაო მატჩში “ბარსელონამ” ბილბაოს “ატლეტიკი” 2-0 დაამარცხა. გუნდის მთავარი მწვრთნელი, ჰანსი ფლიკი ფეხბურთელების ასპარეზობით კმაყოფილი დარჩა, თუმცა აღნიშნა, რომ კატალონიელებს გაუმჯობესების პოტენციალი ჯერ კიდევ აქვთ.

“ჩვენ კარგად ვითამაშეთ. რაც ვნახე, მომეწონა, მაგრამ კიდევ შეგვიძლია გაუმჯობესება. პოტენციალი გვაქვს. ამჟამად ჩვენი თამაშის დონე მომწონს, მაგრამ წინსვლა გვჭირდება, რაც ნორმალურია. მსოფლიო ჩემპიონატის გამო შეზღუდული მოსამზადებელი ეტაპი გვქონდა. პირველ ორ მატჩში 6 ქულა ძალიან კარგი შედეგია.”

მან ასევე ისაუბრა გუნდურ მენტალიტეტსა და ფიზიკურ კონდიციებზე:

“როგორც იცით, ინდივიდუალურად ფეხბურთელებზე საუბარი არ მიყვარს. ვფიქრობ, როგორც გუნდმა კარგად ვითამაშეთ და ბევრი მომენტი შევქმენით. შეგვეძლო უფრო დიდი ანგარიშითაც მოგვეგო, თუმცა საბოლოოდ ძალიან კარგ გუნდს დავუპირისპირდით. სიტუაციას სრულად ვაკონტროლებდით და რაც დღეს ვნახე, ნამდვილად ფანტასტიკური იყო. ვფიქრობ, ლამინისთვის 90 წუთის თამაში კარგი იყო, რადგან ამ პირობებში ფიზიკურ ასპექტსაც ვაუმჯობესებთ. დღეს სწორედ ეს იყო იდეა. ცხადია, ბოლოს ყველა მოთამაშე ძალიან დაიღალა, მაგრამ ეს ნორმალურია – ეს ფეხბურთია და ჩვენ ყველაფერს ვიღებთ, რაც შეგვიძლია.”

ენტონი გორდონი და ჩავი ესპარტი

ფლიკმა განსაკუთრებული ყურადღება ენტონი გორდონისა და ჩავი ესპარტის თამაშზე გაამახვილა:

“გორდონი? ის ზუსტად ისეთია, როგორსაც ხედავთ. მისი სისწრაფე, შესრულების ძალა და მაღალი ტემპი ჩვენთვის ძალიან კარგია. ზუსტად ამას ვითხოვთ მისგან. ის გუნდთან ერთად მხოლოდ ორნახევარი კვირაა იმყოფება, ამიტომ კიდევ უფრო მაღალ დონეზე ასვლის პოტენციალი აქვს და ჩვენ ის სწორედ ამ დონეზე გვჭირდება.”

რაც შეეხება ესპარტს, რომელმაც პირველი გუნდის სრულუფლებიანი მოთამაშის სტატუსით სადებიუტო მატჩი ჩაატარა:

“ძალიან ვაფასებ იმას, რასაც ვხედავ და ცოტათი გაკვირვებულიც ვარ იმით, თუ როგორ თამაშობს ის მარცხენა მცველად. არ ვიცი, აქამდე რამდენი მატჩი აქვს ჩატარებული, მაგრამ ეს ადვილი არ არის. ის შესანიშნავად მუშაობს, როგორც ბურთით, ისე უბურთოდ. მისი ტექნიკა დაცვასა და შეტევაში ძალიან მაღალია და ყოველთვის მაქსიმალურად კონცენტრირებულია. ტაქტიკურად ბრწყინვალეა. ახლა ძალიან ბედნიერი ვარ, მაგრამ ვფიქრობ, რომ მასაც, ისევე როგორც სხვა მოთამაშეებს, განვითარების სივრცე აქვს.”

როდრი, ბერნალი და რაფინია

“ბარსელონას” რიგებში როდრის დებიუტსა და ახალგაზრდა მარკ ბერნალის თამაშზე მწვრთნელმა დასძინა:

“ყველა ბედნიერია, რომ როდრი ‘ბარსელონას’ მაისურით თამაშობს. ის იდეალური ფეხბურთელია ჩვენი ფილოსოფიისა და სათამაშო სტილისთვის. მარკ ბერნალმაც ფანტასტიკური მატჩი ჩაატარა და მისით ძალიან კმაყოფილი ვარ.”

კაპიტან რაფინიასთან დაკავშირებით გერმანელის თქმით, მის პოზიციას გადამწყვეტი მნიშვნელობა არ აქვს:

“არ აქვს მნიშვნელობა, რომელ პოზიციაზე თამაშობს რაფინია, ჩემთვის მთავარია ის, რასაც მოედანზე აჩვენებს. გულშემატკივრებს მასთან და გუნდთან კავშირი აქვთ. შესანიშნავი ატმოსფერო გვაქვს და სწორედ ესაა მნიშვნელოვანი.”