ერთა ლიგაზე ბარსელონელების მეტოქეები ცნობილია

რამდენიმე წუთის წინ უეფას ერთა ლიგის 2022 წლის გათამაშების წილისყრა გაიმართა და “ბარსელონას” ფეხბურთელების სანაკრებო მეტოქეებიც გაირკვა.

სანამ “ბარსელონელებზე” გადავალთ, მთავარ თემას შევეხოთ – საქართველოს ნაკრები, რომელიც C ლიგაშია, მე-4 ჯგუფში ბულგარეთთან, ჩრდილოეთ მაკედონიასთან და გიბრალტართან ერთად მოხვდა.

რაც შეეხება “ბარსას”

ესპანეთის ნაკრები

სერხიო ბუსკეტსის, ანსუ ფატის, პედრის, ჟორდი ალბას, სერჟი რობერტოს, ერიკ გარსიასა და გავის გუნდი, რომელიც წინა გათამაშების ფინალისტია, A ლიგის მეორე ჯგუფში მოხვდა. “ფურია როხას” მეტოქეები პორტუგალია, შვეიცარია და ჩეხეთი იქნებიან.

საფრანგეთის ნაკრები

უსმან დემბელეს, კლემან ლანგლესა და სამუელ უმტიტის საფრანგეთი, რომელიც მოქმედი ჩემპიონია, A ლიგის პირველ ჯგუფში მარტინ ბრეითუეიტის დანიასთან და იუსუფ დემირის ავსტრიასთან ერთად მოხვდა. ჯგუფის მეოთხე წევრი ხორვატიაა.

ნიდერლანდების ნაკრები

მემფის დეპაისა და დე იონგების ნიდერლანდების ნაკრებს A ლიგის მე-4 ჯგუფი შეხვდა. ამავე ჯგუფში მოხვდნენ ბელგია, პოლონეთი და უელსი.

გერმანიის ნაკრები

მარკ-ანდრე ტერ შტეგენის ეროვნული გუნდი სიკვდილის ჯგუფში მოხვდა – იტალია, გერმანია, ინგლისი, უნგრეთი.

ერთა ლიგის ჯგუფური ეტაპის მატჩები 2022 წლის ივნისში დაიწყება და სექტემბერში დასრულდება, ხოლო ფლეი ოფები 2023 წლის ივნისში გაიმართება.