ჟოან ლაპორტას პრესკონფერენცია

ამ პრესკონფერენციის მიზანი ისაა, რომ საკუთარი თავი გამოვხატოთ.

გვინდა, განვმარტოთ მოკლევადიანი გეგმა, რადგან შევნიშნე, რომ ამ დღეებში სხვადასხვა აზრი გაჩნდა. ვასრულებთ პროექტს, რომელმაც არ იმუშავა. ახალ პროექტს ვიწყებთ, რომელიც “ბარსას” ფანებს გააბედნიერებს.

ჟურნალისტების წინაშე საუბარი მინდოდა.

გარდამავალი ეტაპის პროექტები აღარ არსებობს.

მწვრთნელს უკვე ვუთხარით, რომ სეზონის ბოლოს ყველაფერს გადავაფასებდით. ყოველთვის პატივისცემით ვეპყრობით კუმანს, რომელსაც კონტრაქტი აქვს.

ვიცით, რომ მესის მომავალზე ბევრი საუბრობს. ლეოსთან ახალი კონტრაქტის თაობაზე მოლაპარაკებები კარგად მიმდინარეობს, მაგრამ ჯერ დასრულებული არაა. იმედი მაქვს, არგენტინელისგან თანხმობას მივიღებთ. ძალიან კარგი ურთიერთობა გვაქვს. “ბარსას” მესი უყვარს. რა თქმა უნდა, ყველას გვინდა, რომ ის დარჩეს.

მომდევნო კვირაში გუნდში ახალწვეულების დამატებაზე ვისაუბრებთ.

სიახლეები იქნება ხელბურთის გუნდში. ჩვენი მიზანია, ხელბურთს უფრო მეტი ყურადღება დავუთმოთ. მწვრთნელის შეცვლა გადავწყვიტეთ. ჩავი პასკუალს დიდ პატივს ვცემთ.

ევროპის სუპერ ლიგა მოწინავე პროექტი იყო, როდესაც მოვედი. “ბარსათვის” ამ პროექტში ჩართვა მნიშვნელოვანი იყო, რადგან ეს კლუბი მსოფლიო ფეხბურთში სიახლეებს არასდროს განუდგება და მასზე უარს არასდროს იტყვის.

მივედით იმ დასკვნამდე, რომ სუპერ ლიგაში ჩართვა გვინდოდა, თუმცა ჩვენი პოზიცია შევინარჩუნეთ. “ბარსა” სოსიოებს [კლუბის წევრები] ეკუთვნით, ამიტომ გვსურს, ეს საკითხი მათთან განვიხილოთ.

ახლა უამრავი პრობლემა გვაქვს. არაერთ კლუბს ფინანსური კრიზისი აქვს, უფრო პატარა გუნდებსაც. ამ ეტაპზე წინსვლა გვსურს. “ბარსელონას” პოზიცია ყოველთვის თითოეულ საკითხზე მსჯელობა და მისი განხილვაა.

ლუის რუბიალესთან [ესპანეთის ფეხბურთის ფედერაციის პრეზიდენტი] და ხავიერ ტებასთან [ლა ლიგის პრეზიდენტი] კარგი ურთიერთობა მაქვს, ცოტა ხნის წინ ვესაუბრე ალექსანდერ ჩეფერინს [UEFA-ს პრეზიდენტი]. სასაუბროდ ჩვენი კარი ყოველთვის ღიაა, ყოველთვის მზად ვართ.

ფინანსების მხრივ ზუსტად ვერაფერს ვიტყვი. ჯერ კიდევ მიმდინარეობს აუდიტი, რომელიც ივლისში დასრულდება. 20 ივნისს ასამბელას მოვიწვევთ. იკვეთება ისეთ რაღაცები, რასაც ყურადღება უნდა მივაქციოთ და პრობლემები მოვაგვაროთ. ზოგი რამ შემაშფოთებელია, ზოგიც – გასაკვირი.

მესიჯი კლუბის წევრებს? მოთმინება. მოთმინება და ოპტიმიზმი. მომდევნო სეზონი წარმატებული იქნება.

იოჰან კრუიფის სისტემას მოვიაზრებდით, როდესაც ვფიქრობდით იმ სისტემაზე, რომლითაც პირველ გუნდს უნდა ეთამაშა. ყოველმხრივ კრუიფისტები ვართ: სიმამაცე და მოგება კარგი თამაშის წყალობით.

პასუხისმეგბლობების აღება საჭიროა, რადგან ძალიან რთული ეკონომიკური მდგომარეობაა. კლუბს უზარმაზარი დანაკარგები და ძალიან დიდი ვალი აქვს.

კუმანთან მომდევნო კვირაში ვისაუბრებთ და ყველა ასპექტზე ყურადღებას გავამახვილებთ. გადაწყვეტილებას ერთად მივიღებთ. ვაფასებთ იმ ყველაფერს, რაც გასულ სეზონში გაკეთდა.

კუმანთან კონტრაქტი ჩვენ არ გაგვიფორმებია. გვინდა, რონალდს გავესაუბროთ იმის დასადასტურებლად, რომ გვსურს ისეთივე “ბარსა”, როგორიც მას. ძალიან ნათლად, პატივისცემითა და მოწიწებით ვსაუბრობთ.

გუშინ კუმანმა ცოტათი შეგვაშინა. მას საავადმყოფოში წასვლა მოუწია. საბედნიეროდ, ყველაფერი კარგადაა. რონალდს ვუთხარი, რომ დამშვიდებულიყო.

ჩავი ერნანდესი? პატივს ვცემთ კუმანს, რომლის კონტრაქტიც ძალაშია.

მესი პროექტით აღფრთოვანებულია. მის კონტრაქტის გახანგრძლივებას მეტნაკლებად ოპტიმისტურად ვუყურებ.

გვარდიოლა ჩემი ოცნებაა? აქ ოცნებებზე სასაუბროდ არ ვარ, რეალობაზე ვლაპარაკობ. როდესაც პეპს ვახსენებთ, მხოლოდ იმაზე ვფიქრობ, რომ იმედია, იგი ხვალ ჩემპიონთა ლიგის მოგებას შეძლებს. ის შესანიშნავი მეგობარია.

კუმანს ჩვენი ახალი პროექტის პროფილი აქვს. ჩვენ შესანიშნავი და ჯანსაღი ურთიერთობა გვაქვს.

ფინანსური მდგომარეობის გამოსწორებაზე ვმუშაობთ. სახელფასო ფონდში ცვლილებებია საჭირო.

სპონსორებისთვის კარგი შეთავაზებები გვაქვს. Rakuten-თან კონტრაქტის გახანგრძლივებას ვისურვებდით. მის ხელმძღვანელთან, მიკიტანისთან მოლაპარაკებებს ვაწარმოებთ.

Espai Barca? აუდიტის შემდეგ საბოლოო ბიუჯეტი ცნობილი გახდება. საბჭოს გაუმჯობესებულ გეგმას წარვუდგენთ. ლიცენზიას ველოდებით, რათა გეგმაზე მუშაობის დაწყება შევძლოთ. რაც შეიძლება მალე მოვა დრო, როდესაც სხვა სტადიონზე ვითამაშებთ. არ ვიცი, როდის დადგება ეს პერიოდი.

შეიძლება კუმანი დარჩეს მას შემდეგ, რაც უთხარით, რომ მწვრთნელს ეძებთ? დიახ. ძალიან კარგი ურთიერთობა გვაქვს.

მესის სურს, რომ “ბარსაში” თავს კვლავ კომფორტულად გრძნობდეს. ეს იმას ნიშნავს, რომ მას მხოლოდ გამარჯვებები უნდა.

სეზონი კატასტროფულად დავასრულეთ. ეს გადაწყვეტილებების მიღებაში დაგვეხმარება.

გამოცდილება გადაწყვეტილებების მიღებაში გეხმარება. 2003 და 2008 წლებთან შედარებით განსხვავებული სიტუაციაა, მაგრამ პრინციპი იგივეა.

მესი? შეამჩნევდით, რომ მას სურს, თავს კომფორტულად გრძნობდეს, რადგან რამდენიმე წელიწადი დარჩა და უნდა, სიამოვნება მიიღოს. რა შეიცვალა? ახლა პრეზიდენტი მე ვარ და ვფიქრობ, ლეოს ეს მოსწონს.

ჩეფერინს უკვე ვუთხარი, რომ არ ვაპირებთ ბოდიშის მოხდას ან ჯარიმის გადახდას, რასაც გამართლება არ აქვს. თუ სანქციებს დაგვაკისრებენ, ამას სპორტულ საარბიტრაჟო სასამართოლში გავასაჩივრებთ და დარწმუნებული ვარ, სასამართლო დავას მოვიგებთ.

ჩავი? დარწმუნებული ვარ, ის შესანიშნავი მწვრთნელი იქნება. მასთან დაკავშირებული საკითხი დელიკატურია, რადგან ის ჩემი მეგობარია და ეს ყველაფერს უფრო ართულებს.

ამ კლუბთან თანამშრომლობის სურვილს უამრავი ინვესტორი გამოთქვამს. შემოთავაზებებს ყოველდღე ვიღებთ. ოპტიმისტურად ვარ განწყობილი და ვფიქრობ, რომ 2 სეზონში ჩვენი კლუბი ისევ ცოცხალი იქნება.

მომდევნო სეზონში ძალიან კონკურენტუნარიანი გუნდი გვეყოლება.