“ბარსელონას” დელეგატ წევრთა 2026 წლის რიგითმა გენერალურმა ასამბლეამ ახალი, 510 მილიონი ევროს ღირებულების ფინანსური პაკეტი დაამტკიცა. ეს თანხა “სპოტიფაი კამპ ნოუს” სამუშაოების დასრულებასა და პროექტის ვადების გადაცილებით მიყენებული ეკონომიკური ზიანის განეიტრალებას მოხმარდება.

ოპერაცია ორ ძირითად კომპონენტად არის დაყოფილი:

300 მილიონი ევრო უშუალოდ სამშენებლო სამუშაოებისთვის: წინადადებას მხარი 562-მა დელეგატმა დაუჭირა (89%), 45 წინააღმდეგი იყო (7%), 14-მა ცარიელი ბიულეტენი ჩააგდო (2%), ხოლო 14-მა თავი შეიკავა (2%).
210 მილიონი ევრო “მედია ობლიგაციებით” (Media Notes): კლუბის აუდიოვიზუალური შემოსავლებით უზრუნველყოფილი ეს ინიციატივა 486 ხმით დამტკიცდა (85%), 55-ის წინააღმდეგ (9%), 28 ცარიელი ხმით (5%) და 5 თავშეკავებით (1%).

300 მილიონი ევრო სპოტიფაი კამპ ნოუს სამუშაოების დასასრულებლად

300 მილიონი ევროს დაფინანსება სტადიონის სრულყოფილად დასრულებას უზრუნველყოფს. პროექტის მასშტაბები თავდაპირველ გეგმას საგრძნობლად გასცდა ახალი ობიექტების, სერვისებისა და ტექნოლოგიური გადაწყვეტების დამატების გამო.

ერთ-ერთი ყველაზე მნიშვნელოვანი და მოცულობითი სამუშაო ფრანსესკ მიტიანსის მიერ დაპროექტებული და 1957 წელს გახსნილი ძველი “კამპ ნოუს” მეორე იარუსის კონსტრუქციული გამაგრება აღმოჩნდა. დღეის მდგომარეობით, საწყის ეტაპზე დაგეგმილი დაახლოებით 800 გამაგრებითი სამუშაოს ნაცვლად, 3 000-ზე მეტი ასეთი ოპერაცია ჩატარდა. ეს ტრიბუნა, რომელიც თავისი ისტორიული ღირებულებისა და ქალაქის დაცული კულტურული მემკვიდრეობის სტატუსის გამო სრულად უნდა შენარჩუნებულიყო, იმაზე გაცილებით მეტ ჩარევას მოითხოვდა, ვიდრე წინასწარ იყო ნავარაუდევი – პრობლემის რეალური მასშტაბი მხოლოდ მშენებლობის პროცესში გამოიკვეთა.

გარდა ამისა, განახლებულ პროექტს დაემატა:

ახალი VIP და საპატიო სტუმრების (hospitality) ზონები;
გაფართოებული სივრცე კლუბის მუზეუმისთვის;
გაუმჯობესებული 5G კავშირის გადაწყვეტები;
შენობის მართვის ულტრათანამედროვე ავტომატიზებული სისტემები.

პროექტის მასშტაბების გაზრდამ, ახალმა რეგულაციებმა, სტადიონის სექტორების ეტაპობრივად გახსნის სირთულემ და მშენებლობის ვადების გახანგრძლივებამ საბოლოო ჯამური ხარჯების ზრდა განაპირობა.

დარჩენილი 210 მილიონი ევრო კლუბმა 105-მილიონიანი ორი “მედია ობლიგაციის” გამოშვებით მოიზიდა. პირველი ტრანში 2026 წლის ივლისში გამოიცა, ხოლო მეორე 2026 წლის ოქტომბერში ან ნოემბერში იგეგმება. ორივე გამოშვებას 10 წლამდე დაფარვის ვადა აქვს, ფიქსირებული საპროცენტო განაკვეთით ხასიათდება და ლა ლიგისა და უეფას ტურნირებიდან მომავალში მისაღები აუდიოვიზუალური უფლებების შემოსავლებითაა გამყარებული.

ეს ახალი ტრანზაქცია ჯერ კიდევ 2023 წელს დამტკიცებული “ესპაი ბარსას” 1.485 მილიარდი ევროს ღირებულების დაფინანსების სტრუქტურის ნაწილია და იმავე გარანტიებსა და გადახდისუნარიანობის კოეფიციენტებს ინარჩუნებს. ბოლო წლებში კლუბმა ვალების მომსახურების გრაფიკის შესამსუბუქებლად 500 მილიონ ევროზე მეტის რეფინანსირება მოახდინა, ახალი ოპერაცია კი სარეზერვო ფონდს აძლიერებს და პროექტის ბოლომდე მისაყვანად საჭირო დანაკლისს სრულად ფარავს.

გადავადების ეკონომიკური ეფექტი და დაბრუნება

სამუშაოების შეფერხებამ კლუბს ფინანსური დარტყმა ორმხრივად მიაყენა: როგორც ახალი სტადიონიდან მისაღები შემოსავლების გადავადებით, ისე მონჟუიკზე დარჩენის ხარჯებით. “ესტადი ოლიმპიკ ლუის კომპანისზე” გატარებული ორი სეზონის განმავლობაში კლუბმა თითქმის 17 მილიონი ევრო საოპერაციო ხარჯებში, ხოლო 24 მილიონი ევრო ამ პერიოდთან დაკავშირებულ ინვესტიციებში გადაიხადა.

“ესპაი ბარსას” პროექტის სრული დასრულებითა და “სპოტიფაი კამპ ნოუზე” საბოლოო დაბრუნებით, კლუბი შემოსავლების გენერირების შესაძლებლობის მკვეთრ ზრდას პროგნოზირებს. გათვლების მიხედვით, 2030/31 წლების სეზონში შემოსავლები 1.45 მილიარდ ევროს გადააჭარბებს, ხოლო საოპერაციო მოგება (EBITDA) 370 მილიონ ევროს გადასცდება (შედარებისთვის: 2025/26 წლების სეზონში პროგნოზირებული შემოსავალი 1.06 მილიარდი ევრო, ხოლო EBITDA 184 მილიონი ევრო იყო).

სევილია