ინტერვიუ მარკ-ანდრე ტერ შტეგენთან

ხალხმა იცის, რომ ყოველთვის ყველაფერს ვაკეთებ, რაც შემიძლია და ამაში გულსა და სულს ვდებ. მხოლოდ იმის თქმა არ მინდა, რომ მსურს, მოედანსა და მის ფარგლებს მიღმა სამაგალითო ვიყო. ჩემთვის დიდი პატივია, როდესაც ადამიანები დიდებულ მეკარეებს მადარებენ, მაგალითად, ანდონი სუბისარეტას.

“ბარსელონაში” უკვე 7 წელია ვიმყოფები და თავს ძალიან კარგად ვგრძნობ. პრეზიდენტის შეცვლამ სიმშვიდის მხრივ დადებითად იმოქმედა. ეს კლუბისთვის კარგია. დარწმუნებული ვარ, “ბარსა” მომავალში კვლავინდებურად წარმატებული იქნება.

ჩემთვის საკითხი მდგომარეობს არა იმაში, გავხანგრძლივებ თუ არა კონტრაქტს, არამედ რამდენი ხნით გავახანგრძლივებ.

ვალის ოდენობა, რა თქმა უნდა, ძალიან დიდია, თუმცა ვცდილობთ, ასეთი საკითხები გარეთ არ გავიტანოთ. ჩვენი საქმე ფეხბურთის თამაშია. ფულს ამაში ვიღებთ.

სიმართლე გითხრათ, ბედნიერი ვარ, რომ კლუბის ადმინისტრაციაში არ ვმუშაობ და ამ მნიშვნელოვანი საკითხის გადაჭრა არ მიწევს. თუმცა, ყველამ ვიცით, რომ კლუბისა და ხალხის წინაშე ვალდებულებები გვაქვს.

ამჟამინდელი სიტუაცია კლუბს აზიანებს და რა თქმა უნდა, ეს ჩემი კონტრაქტის თაობაზე მოლაპარაკებებში გათვალისწინებულია. “ბარსასთან” ამ გარდამავალ ეტაპზე კარგი გამოსავალი ვიპოვე.

ხელშეკრულებასთან დაკავშირებით ბევრი ვარიანტი არსებობს. ერთ-ერთი მათგანი თანხის გადავადების მოდელია. ეს დამოკიდებულია იმაზე, რამდენ ხანში გასდის კონტრაქტს ვადა შესაბამის საგადასახადო სისტემასთან მოსარგებად. მოლაპარაკებები სწრაფად წარიმართა. თუ შევძლებთ, რომ კლუბს გუნდურად დავეხმაროთ, ამას გავაკეთებთ.

სუპერ ლიგა? ხალხის უკმაყოფილების მესმის, მაგრამ სტადიონზე შეჭრა დაუშვებელია. ამან ასეთი სახე არ უნდა მიიღოს. არ მინდა, ამაზე კიდევ ვისაუბრო. ამის შესახებ წინასწარ არაფერი ვიცოდი და გაკვირვებული დავრჩი. სუპერ ლიგაზე ბევრი არ მიფიქრია, რადგან არ მეგონა, რომ მოვლენები ასე სწრაფად განვითარდებოდა.

UEFA-ს შესაძლო სანქციები? არ ვიცი, რა ძალაუფლებას ფლობენ გარკვეული ადამიანები. კიდევ მხოლოდ იმის თქმა შემიძლია, რომ სუპერ ლიგის გეგმებით იმ კონკრეტულ მომენტში გაოცებული ვიყავი. ამის შესახებ მედიიდან შევიტყვე, რის შემდეგაც ინტერნეტი და გაზეთები გადავქექე.

თავისი აზრის გამოთქმის უფლება ყველას აქვს. მხოლოდ იმის თქმა, ეთანხმებით თუ არა საბჭოს, ჩემთვის ბევრს არაფერს ნიშნავს. გადაწყვეტილება ყურადღებით უნდა იყოს განხილული.

რა თქმა უნდა, გასახდელში ამაზე ვისაუბრებთ. მთვარეზე არ ვცხოვრობთ. კლუბს ამჟამად არ ულხინს, რაც იმის ბრალია, რომ წარსულში რაღაცები კარგად არ განხორციელდა.

ჟოან ლაპორტას ბევრი რამ აქვს გასაკეთებელი. ის ახალ წესდებას შექმნის. მას 100%-ით ვენდობით. დარწმუნებულები ვართ, ის კლუბს სწორ გზაზე დააბრუნდებს.

აშკარაა, რომ ახალი პრეზიდენტი და მისი საბჭოს წევრები “ბარსას” გულშემატკივრები არიან. როდესაც ისინი ჩვენ წინაშე წარდგნენ, მათგან უზარმაზარი ენერგია მოდიოდა.

ლაპორტა სიტყვით გამოვიდა და თქვა: “ბიჭებო, ამის გაკეთება შეგვიძლია!”. მისმა საუბარმა მომხიბლა. ამან ჩემზე დიდი გავლენა იქონია, რაც ახლაც ასეა.

როდესაც პრეზიდენტზე ფიქრობ, ჩვეულებრივ თვალწინ წარმოგიდგება ისეთი ადამიანი, რომელიც სხვებს თავს ამეტებს და ახლოს არავის უშვებს. ლაპორტა ასეთი არაა. ის ძალიან მოკრძალებული და წარმოუდგენელი ენერგიის მატარებელია.

მისი თამაშის სტილი და გოლები შთამბეჭდავია. საოცარია, როდესაც ნახულობ ვიდეოებს, რომლებშიც ის დაცვიდან შეტევაში ძალიან სწრაფად გადაადგილდება და ანადგურებს ყველაფერს, რაც წინ ეღობება.

ჰოლანდი მსოფლიოს ნებისმიერ გუნდს გააძლიერებდა. თუმცა, ეს იმას არ ნიშნავს, რომ ის “დორტმუნდში” არ დარჩება. “დორტმუნდი” ძალიან კარგი კლუბია, რომელშიც ბოლო წლებში შესანიშნავი სამუშაო განხორციელდა.

რატომ არ უნდა დარჩეს ერლინგი “დორტმუნდში” კიდევ ერთი წელი? ეს უკანგადადგმული ნაბიჯი სულაც არ იქნებოდა. თუ ის წავა, მის ახალ გუნდს მომდევნო 10 წლის განმავლობაში ბრწყინვალე თავდამსხმელი ეყოლებოდა.

ვურჩევ თუ არა ლაპორტას ჰოლანდის შეძენას? როგორც ფეხბურთელი, ასეთ საკითხებზე გავლენის მოხდენა არ მინდა. ჩვენ გუნდის გეგმებზე პასუხისმგებლები არ ვართ. ყოველი წლის დასაწყისში შესანიშნავი გუნდი გვყვავს. საბოლოოდ, ჩვენზეა დამოკიდებული, რას მივიღებთ თითოეული სეზონის ბოლოს.

მესი ბოლო 10 წელია “ბარსელონას” საუკეთესო ფეხბურთელია. რა თქმა უნდა, კლუბი მისი წასვლით ბევრს დაკარგავდა. მხოლოდ მას შეუძლია გადაწყვიტოს, დარჩება თუ არა.

პედრი რამდენიმე კვირაა თითქმის ყველა თამაშში მონაწილეობას იღებს. ასეთი ახალგაზრდა მოთამაშისთვის ეს სიგიჟეა. თუმცა, აღსანიშნავია, რომ ახალგაზრდებს უფრო მეტი ენერგია აქვთ, ვიდრე ჩვენ, ასაკიან ფეხბურთელებს. მათ ყოველთვის თამაში უნდათ.

ყველას შეუძლია იმისა დანახვა, რომ რთულ ეტაპზე ვიმყოფებით, ამიტომ ცოტა დრო უნდა მოგვცეთ. ბევრი ახალგაზრდა ფეხბურთელი გვყვავს, რომლებსაც, შესაძლოა, ჩვენს გუნდში მომავალი 10 წლის განავლობაში დიდი მნიშვნელობა ჰქონდეთ.

თავდაპირველი სირთულეების გადალახვის შემდეგ, ლა ლიგის მოგების ყველანაირი შანსი გვაქვს. ესპანეთის ჩემპიონატი ბოლო დღემდე საინტერესო იქნება. “ვალენსიას” დამარცხება ჩვენთვის ძალიან მნიშვნელოვანი იყო. “ატლეტიკოსთან” თამაშს თავდაჯერებულები ვხვდებით. ლა ლიგა ახლა ძალიან საინტერესოა. ჩემპიონობისთვის 4 გუნდი იბრძვის. ასევე დიდი კონკურენციაა ევროპა ლიგის საკვალიფიკაციო ადგილებსითვის ბრძოლაში.