FiveThirtyEight: “ბარსელონას” გაჩემპიონების შანსი 73% არის

FiveThirtyEight-ს სუპერკომპიუტერმა ლა ლიგის პროგნოზები განაახლა და გასაკვირი არაა, რომ “ბარსელონა” გამოკვეთილ ფავორიტად აქცია. ამის მიზეზი ისაა, რომ, გასულ უქმეებზე პრიმერა დივიზიონის საუკეთესო სამეულიდან მხოლოდ “ბლაუგრანამ” მოიგო.

ეს სუპერკომპიუტერი “ბარსელონას” ფავორიტად მაშინაც მიიჩნევდა, როდესაც კატალონიური კლუბი ლიდერ “ატლეტიკოს” დიდი სხვაობით ჩამორჩებოდა. როგორც ჩანს, FiveThirtyEight-ს ალგორითმი არ ცდებოდა. იმ შემთხვევაში, თუ 29 აპრილს “ბარსელონა” “გრანადას” “კამპ ნოუზე” დაამარცხებს, ერთპიროვნულად გალიდერდება და დარჩენილი 5 მატჩიდან ერთის ფრედ დასრულების უფლებას შეინარჩუნებს.

სუპერკომპიუტერის გამოთვლებით “ბარსელონას” გაჩემპიონების შანსი 73% არის. შემდეგ მოდის “ატლეტიკო” 16%-ით, რომელსაც “რეალი” (9%) და “სევილია” (1%) მოსდევენ. იმის შანსი, რომ “ბარსა” მე-2 ადგილზე გავიდეს 17% უდრის, მესამეზე – 8%, მეოთხეზე – 1%.

სუპერკომპიუტერის ვარაუდით “ბარსელონა” 85 ქულას დააგროვებს. ეს ნიშნავს, რომ დარჩენილი 6 თამაშიდან ოთხს მოიგებს და ორს ფრედ დაასრულებს. “ატლეტიკოს” პროგნოზი 82 ქულაა, “რეალის” 81, ხოლო “სევილიასი” 78.