ჟერარ პიკემ ლუიშ ფიგუს ანტირეკორდი მოხსნა

ლა ლიგის 2019/20 წლების სეზონი "ბარსელონასთვის" ძალიან წარუმატებელი გამოდგა. "ბლაუგრანამ" დათმო ტურნირი, რომლის მოგებაც გუნდს, ბოლო წლებში, ჩვევაში აქვს გადასული და რაც ყველაზე სამწუხაროა, ძალიან ცუდი თამაში გვიჩვენა.

შეიძლება ითქვას, რომ თავის დონესთან მიახლოებული თამაში მხოლოდ ლეო მესიმ და მარკ-ანდრე ტერ შტეგენმა აჩვენეს. არგენტინელი, ტრადიციულად, საუკეთესო ბომბარდირი გახდა, რასაც საუკეთესო ასისტენტობაც დაუმატა. ტერ შტეგენს კი სტატისტიკა დაცვის ცუდმა თამაშმა გაუფუჭა - გერმანელმა, 36 მატჩში, 37 გოლი გაუშვა.

ტერ შტეგენის სტატისტიკის ერთ-ერთ მთავარი "შემოქმედი" ჟერარ პიკეა. 33 წლის კატალონიელი ცენტრალური მცველი ვერც დამაჯერებელი თამაშით გამოირჩეოდა და მან, ყვითელი ბარათების ლიმიტის ამოწურვის გამო, 3 თამაშიხ გამოტოვა, რაც "ბარსელონას" ისტორიაში პირველად მოხდა. დიახ, პიკე "ბარსას" პირველი ფეხბურთელია, რომელმაც ლა ლიგის ერთ გათამაშებაში 15 გაფრთხილება მიიღო (ამ სტატისტიკაში გათვალისწინებული არაა შემთხვევები, როდესაც ფეხბურთელს მოედნიდან 2 ყვითელი ბარათის გამო აძევებენ).

აქამდე, "ბარსელონას" რეკორდი პორტუგალიელებს, ლუიშ ფიიგუსა და დეკუს ეკთვნოდათ. პირველმა 1998/99, ხოლო მეორემ 2006/07 წლებში, 14-14 ყვითელი ბარათი მიიღეს. შემდეგი ყველაზე ცუდი შედეგი პეპ გვარდიოლას ეკუთვნის - 13 გაფრთხილება 1996/97 წლების სეზონში.

რა ვითარებაა მთელი ტურნირის მასშტაბით? პიკეს მაჩვენებელი "ბარსელონასთვის" ანტისარეკორდოა, მაგრამ ამ მაჩვენებლით, ის, ესპანეთის ჩემპიონატის მთელი ისტორიის გათვალისწინებით, ასეულში ძლივს შევიდა. ჟერარი 96-ე ადგილზე იმყოფება. რეკორდი კი ფერნანდო გამბოასა ("ოვიედო") და კრისტიან საპუნარუს ("სარაგოსა") ეკუთვნით, რომლებმაც ერთ სეზონში 19-19 ყვითელი ბარათი მიიღეს. ცნობისთვის, 1995/96 წლების სეზონში, 18-ჯერ გააფრთხილეს მადრიდის "ატლეტიკოს" იმჟამინდელი ფეხბურთელი და ამჟამინდელი მწვრთნელი, დიეგო სიმეონე. მისი მსგავსი შედეგი 2014/15 წლების სეზონში დააფიქსირა "ესპანიოლის" მოთამაშე ვიქტორ სანჩესმა, რომელსაც ესპანეთში ამჟამად მოთამაშე ფეხბურთლებს შორის რეკორდი ეკუთვნის.