“ბილბაო” VS “ბარსელონა (ვიდეოანალიზი)

“ბილბაოსთან” შეხვედრა გამორჩეულად კარგი გამოდგა. იყო შეცდომებიც, მაგრამ ეს თამაშის თანმდევი ნაწილია და უშეცდომო გუნდი უბრალოდ არ არსებობს, რაც მთავარია ტაქტიკური შეცდომები მინიმუმამდეა დაყვანილი, ხოლო შეტევაში კომბინაციური ფეხბურთი ვითამაშეთ და თითოეული შეტევა გააზრებული იყო. 

დაცვა

• ყველაზე მძიმე ტაქტიკური შეცდომა თამაშის დასაწყისში დავუშვით და გოლიც მივიღეთ. შეტევაში ჩართულ სერჟინიო დესტს ფრენკი დე იონგი აზღვევს და მეტოქეს მეურვეობს, მაგრამ დროის მცირე მონაკვეთში პოზიციასაც კარგავს და მეტოქესაც, თავის მხრივ ბუსკეტსს ჩამოეძინა და პრესინგი დააგვიანა, შესაბამისად გადამწყვეტი პასიც გაკეთდა. 
  შეტევის დასასრულს რაც შეეხება, ინიაკი რომ ლანგლეს სისწრაფეში აჯობებდა, ვიცოდით, მაგრამ ასე ბავშვივით თუ მოატყუებდა, მაინც არ მეგონა. 
• მეორე მომენტში ლანგლე პოზიციას კარგავს, ამ დროს ჯობდა, რომ პოზიციურად დაეცვა თავი და ბრძოლაში არ შესულიყო, მაგრამ საჰაერო ორთაბრძოლა წააგო და მეტოქის კონტრშეტევას ჩამორჩა. საბოლოოდ შეტევა კარისკენ დარტყმით დასრულდა. 
• კუთხურს მოჰყვა მეორე კონტრშეტევა, რომელსაც ჩვენი ნახევარდაცვა საწყის ეტაპზე ჩამორჩა, მაგრამ საბოლოოდ სწორი პოზიცია დაიკავეს. მიუხედავად ამისა, მუნიაინი ჰოლანდიელებს მარტივად გაცდა და სახიფათო მომენტიც შექმნა. ასეა საქმე, როგორ კარგადაც არ უნდა იცავდე თავს ტაქტიკურად, საბოლოოდ ყველაფერი ინდივიდამდე დადის, ამ მხრივ კი სერჟინიო დესტი ძალიან სუსტია. 
• ბოლოს მეორე გოლი მივიღეთ და თავიდანვე ყველაფერი ნათელი იყო, მესი შეცდა. მისგან საკუთარ ნახევარზე ბურთის დაკარგვას არავინ ელის, ამიტომ ყველა მოუმზადებელი აღმოჩნდა. გამეორებაზე ჩანს, რომ მინგესა ერთ წამსაც კი არ კარგავს და მაშინვე იწყებს ზონის ამოკეტვას, მაგრამ დიდი დისტანციის გამო ამას ვერ ახერხებს. 

შეტევა

• კუმანი 4-3-3 ზე გადაეწყო. განსხვავება მაინც არის კლასიკურ 4-3-3-ს და კუმანის ტაქტიკას შორის, მაგრამ ფრენკი დე იონგი შემტევ ნახევარმცველად თამაშობს და არა საყრდენად. ბოლო ორი თამაშია ვხედავთ მის შერბენებს საჯარიმოში და ამას შედეგი მოაქვს. გვარდიოლას ხელში ამ მოძრაობას როგორც წესი სეიდუ კეიტა ასრულებდა და მასაც შედეგიანად გამოსდიოდა. 
  კიდევ ერთხელ ვნახოთ დე იონგის გოლი “ბილბაოსთან”, “უესკასთან” და კეიტას გოლი “ლევანტესთან”. 
  

• “ბილბაო” თავს ზონური დაცვის პრინციპებით იცავდა, სამ ეშელონად, როგორც წესი, თანამედროვე ფეხბურთში გუნდების უმეტესობა ასე იცავს თავს, თუმცა გასაღები ასეთ დაცვასაც მოეძებნება და “ბარსელონელებმა” ყველაფერი იდეალურად გააკეთეს. განსაკუთრებით გამოსარჩევია პედრი, რომელიც სწრაფი აზროვნების წყალობით, თავისუფალ ზონებს ყოველთვის სხვებზე სწრაფად ითვისებს. 
  

• მესამე გოლის დროს განსაკუთრებულ დაკვირვებას არაფერი საჭიროებს, უბრალოდ ძალიან საინტერესოა მესი ხელით როგორ იცილებს მეტოქეს, არ აძლევს საშუალებას, რომ თავისუფალ სივრცეში შეჭრა დაასწროს, თუ მეტოქეც იგივეს გააკეთებს პენალტი გარანტირებულია. ეს ყველაფერი ძალიან სწრაფად ხდება, კარიერაში იმდენჯერ გაუკეთებია, რომ ალბათ უკვე ყველაფერი ავტომატურად ხდება. 
  კარგი იყო კიდევ ერთი შეტევა, რომელიც გოლით ვერ დასრულდა, მესიმ ერთი ცრუ მოძრაობა გააკეთა, მცველი ამოიტყუა და შეტევაც წავიდა, ცუდია, რომ გოლით ვერ დასრულდა, მაგრამ ეგ არაფერი. ფაქტია, რომ “ბარსამ” მოუმატა.