რონალდ კუმანი “სევილიასთან” მატჩის წინ

“ბარსელონას” მთავარმა მწვრთნელმა, რონალდ კუმანმა, “სევილიას” წინააღმდეგ გასამართ ლა ლიგის მატჩამდე ერთი დღით ადრე პრესკონფერენცია გამართა. 

“სევილია” ძლიერი გუნდია. რთული მატჩი იქნება, მაგრამ ჩვენი უპირატესობა ისაა, რომ სახლში ვთამაშობთ. ჩვენს ანგარიშზე უკვე ორი გამარჯვებაა და თავდაჯერება არ გვაკლია. 

სულ 5 კვირაა, რაც სამწვრთნელო შტაბი და გუნდი ერთადაა, თუმცა ძალიან კარგად ვმუშაობთ. ეს “სელტას” წინააღმდეგაც შესამჩნევი იყო, როცა რთულ პირობებში მოედანზე ერთით ნაკლები ფეხბურთელით ვიყავით და მაინც მოვიგეთ. 

გუნდით კმაყოფილი ვარ. “ბარსას” მოთამაშეები მონდომებულები არიან, თავს შესანიშნავად ვგრძნობთ. 

ერიკ გარსიას შეძენა გვინდა და იმედია, ეს გამოვა. მარკეტის დახურვამდე მხოლოდ რამდენიმე დღეა დარჩენილი და ეკონომიკურად ამ ტრანსფერის განხორციელება ადვილი არ იქნება. 

დემბელეზე ბევრს ვერაფერს ვიტყვი. ითამაშებს თუ არა ის, დამოკიდებულია მეტოქეზე და იმაზე, თუ როგორი იქნება ფეხბურთელი ვარჯიშზე. მისი მომავალი? ამ თემაზე სერიოზულად ჯერ არ გვისაუბრია. 

მას ჩემთვის არ უთქვამს, რომ გუნდში თავს ცუდად გრძნობს. თუ ის ბედნიერი არ არის, შეუძლია, მითხრას, მაგრამ თუ ის დარჩება, თამაშის შესაძლებლობას მივცემ. 

დესტი? ვუცდით, როდის ექნება მას ლიცენზია იმისთვის, რომ განაცხადში შევიყვანოთ. ის ძალიან გამოცდილი და კომპეტენტური მოთამაშეა. 

მოედანზე დასასვენებლად გასვლას არ ვაპირებთ. ყოველთვის ისე ვთამაშობთ, როგორც ვვარჯიშობთ, ვარჯიშები კი მუდმივად ინტენსიურია. 

კოუტინიო ძალიან კარგი ფეხბურთელია. ის “ბაიერნში” კიდევ უფრო განვითარდა. ჩემი, როგორც მწვრთნელის, მოვალეობაა, თითოეულ ფეხბურთელს შესაძლებლობების მაქსიმუმის გამოვლენის საშუალება მივცე, პირველი კი, რაც ამისთვის უნდა გააკეთო, ფეხბურთელის სწორ პოზიციაზე დაყენებაა.

გვაქვს იმის საფუძველი, რომ ჩემპიონთა ლიგის წილისყრით კმაყოფილები ვიყოთ. თითოეულ თამაშში მაღალი დონე უნდა ვაჩვენოთ.

მესი ყოველთვის უმაღლეს დონეზე ვარჯიშობს და თამაშობს. არანაირი პრეტენზია არ მაქვს. ჩემი აზრით, ის მსოფლიოს საუკეთესო ფეხბურთელია

დეპაი? ცენტრფორვარდის პოზიციაზე, ისევე როგორც ცენტრალური მცველის პოზიციაზე, გუნდში ერთით მეტი ფეხბურთელის ყოლა კარგი იქნება. შემადგენლობაში კონკურენცია ისედაც არის, თუმცა სეზონში ბევრი თამაშია და უკეთესი იქნება, თუ გავძლიერდებით.

სერჟი რობერტო კარგად თამაშობს. მის პოზიციაზე დიდი კონკურენციაა. რა თქმა უნდა, ვამბობთ, რომ სერჟინიო დესტი “ბარსას” მომავალია, მაგრამ ეს იმას არ ნიშნავს, რომ ახლა ვერ ითამაშებს. დესტს “აიაქსში” უკვე დიდი გამოცდილება დაუგროვდა”. – განაცხადა კუმანმა.