მესის ვარიანტები

ახლა ყველაფერი სამართლებლივ დავაზეა დამოკიდებული. თუ “ბარსას” ხელმძღვანელობა აღმოჩნდება მართალი, მესის გამოსასყიდი თანხა 700 მილიონი ევრო იქნება, რისი გადამხდელიც არავინ არ არის. შეიხი გაისვრიდა ამ თანხას თავისი ჯიბიდან, მაგრამ როგორც მოგეხსენებათ, კლუბს იმდენის დახარჯვის უფლება აქვს, რასაც გამოიმუშავებს. “სიტიმ” მთელი გუნდი უნდა გაყიდოს იმისათვის, რომ მესი შეიძინოს. პ.ს.ჟ-მა კი მბაპეს და ნეიმარს კიდე 3-4 ფეხბურთელიც უნდა წაამატონ, რაც ასევე ვერ არის ადექვატური საქციელი.

მაგრამ აქ მეორე საკითხი შემოდის. უღირს თუ არა ისეთი ფასეულობების მქონე კლუბს, როგორიც “ბარსელონაა”, რომ ისტორიაში საუკეთესო ფეხბურთელი, ძალით დატოვონ კლუბში?! ისე, როგორც “ნაპოლიმ” დაატყვევა მარადონა. ამის გაკეთება ძალიან უღირსი საქციელი იქნება, თუმცა, ბართომეუსგან გასაკვირი არაფერია.

მარადონა გაცილებით დიდია, ვიდრე “ნაპოლი”, აი “ბარსა” სულ სხვა დონის კლუბია და ელემენტარულად არ ეკადრება, რომ ფეხბურთელი, რომელმაც ოქროს ეპოქა აჩუქა, ძალით გააჩეროს გუნდში.

ამიტომ, თუ ბართომეუ, ერთხელ მაინც პატიოსნად მოიქცა და მესის მრისხანებამ არ გადაუარა, ორი გზა რჩება. თუ ხელმძღვაბნელობა იქბება მართალი, მათ ადექვატური ფასი უნდა დაასახელონ, რაც დაახლოებით 250 მილიონი ევრო იქნება, 33 წლის ფეხბურთელში ეს თანხა არ ჟღერს ნორმალურად, მაგრამ ჩვენ ლიონელ მესიზე ვსაუბრობთ, რომელსაც მხოლოდ გაყიდული მაისურებით შეუძლია ეს თანხა ამოიღოს.

თუ მესი იქნება მართალი, ის უფასოდ წავა, რაც კლუბისთვის ორმაგად დიდი დარტყმა იქნება.

Marca კი გვთავაზობს გუნდებს, სადაც მესის ეპატიჟებიან.

მილანის “ინტერი”

დიდი ხანია მესის “ინტერში” გადაბარგებაზე იწერება, თავიდან ხუმრობით დაიწყო, მერე პროვიკაციის ხასიათს ატარებდა, ახლა კი რეალობად იქცა. ცეცხლზე ნავთი დაასხა ლეოს მამის გადაწყვეტილებამ, რომ საცხოვრებლად მილანში გადასულიყო, თანაც “ინტერის” ბაზასთან საკმაოდ ახლოს.

“ინტერი” ორი რამის გამოა მიმზიდველი. პირველი კრიშტიანუ რონალდუსთან კონკურენციაა, “იუვენტუსის” ჰეგემონიის დამხობა და კრიშტიანუს კიდევ ერთხელ დამარცხება, ძალიან დიდი გამოწვევა იქნება, ზუსტად ისეთი, როგორიც მესის შეეფერება.

მეორე მიზეზი “ინტერის” ისტორიაა, ეს კლუბი ყოველთვის ასოცირდებოდა არგენტინელებთან, იქ განსაკუთრებით უყვართ ამ მიწის შვილები და ლეო მესის ხილვაც ოცნებად აქვთ ქცეული.

“ინტერმა” ერთხელ უკვე შეძლო “ბარსელონას” ბრილიანტის გადაბირება, რონალდომ მაშინ სატრანსფერო რეკორდი დაამყარა და “ინტერში” გატარებული პირველი სეზონის შემდეგ, სანდო მაცოლამ “ფენომენი” უწოდა.

პსჟ

ფრანგების უპირატესობა ფულია, მათ შეუძლიათ მესის ხელფასი უპრობლემოდ გადაიხადონ, იდეალური პირობები შესთავაზონ, პარიზის მეფედ აქციონ და მოსაწყენი ლიგა 1 სახალისო გახადონ, ეს ხომ ახალი ტრიოს დაბადება იქნება?! ნეიმარი, მესი, მბაპე.

ლიგა 1-ს ინტრიგა ისედაც დაკარგული აქვს, აი ჩემპიონთა ლიგაზე პ.ს.ჟ-ს გაცილებით კარგი შანსი ექნება და ეს ფეხბურთელებიც დიდ სიამოვნებას მიიღებენ ერთად თამაშით. მბაპე იქ დიდხანს არ გაჩერდება, მაგრამ მის მოსათაფლად ხელმძღვანელობას ლეო მესის გამოყენების შესაძლებლობა მიეცემა.

ყველას სურს მესის გვერდით თამაში. აი, მაურო იკარდის, ისევ აბარგება მოუწევს.

“მანჩესტერ იუნაიტედი”

შედარებით ახალი ინფორმაციაა, გლეიზერებს უკვე წლებია ცუდი სატრანსფერო პოლიტიკის გამო აკრიტიკებენ. ამჯერად შეუძლიათ სამუდამოდ დაადუმონ კრიტიკოსები. მით უმეტეს, თუ მესი უფასოდ წავა გუნდიდან, იმდენ ხელფასს გადაუხდიან, რამდენიც მოუნდება, მესის კი არა სანჩესს იმდენს უხდიან, რომ ერთ-ერთი ყველაზე ძვირადღირებული ფეხბურთელია მსოფლიოში, მიუხედავად იმისა, რომ “მანჩესტერს” არ სჭირდება და განათხოვრებული ჰყავს.

ლეოს გამოწვევა, გარდა პრემიერ ლიგის მოგებისა, იქ წარმატების მიღწევა იქნება, სადაც კრიშტიანუმ ფეხი აიდგა. მართალია გუნდში აღარ არის სერ ალექსი, მაგრამ “იუნაიტედი” არის ის კლუბი, რომელიც მესის დონეს შეეფერება. “მანჩესტერი” ნელ-ნელა სულ უფრო უკეთესი ხდება, მესისთან ერთად კი კვლავ შეძლებს ჩემპიონობისთვის ბრძოლას.

“სიტი”

მთავარი ფავორიტი, რა თქმა უნდა, “მანჩესტერ სიტია”, არა ერთხელ დაგვიწერია, რომ “სიტის” “ბარსელონიზაცია” ჯერ კიდევ ჩიკი ბეგირისტაინის გადაბირებით დაიწყო, აკადემია “ლა მასიას” ყაიდაზე მოაწყვეს და შემდგომ წლებში “ბარსას” ფეხბურთელებიც გადაიბირეს, ყველაზე დიდი ლუკმა იაია ტურე იყო, რომელიც “სიტის” ლეგენდად იქცა, მერე კი რევოლუციის ჯერიც მოვიდა და ჩიკიმ პეპი დაარწმუნა გადასვლაში.

ახლა მესის დროა. არაბებს გეგმაზომიერი და ხანგრძლივი პროექტი, იდეალურ დასასრულამდე მიჰყავთ. გარდა იმისა, რომ ლეოს პეპი და აგუერო დახვდებიან, გუნდში იქნება კევინ დე ბრუინი, რომელიც აბსოლუტურად გაათავისუფლებს მესის ნახევარდაცვაში ბურთის ამოტანისგან, ლეოს საქმე მხოლოდ გოლების გატანა იქნება და იმხელა თავისუფლებას მიიღებს, რამხელაც ჩავი-ინიესტას დროიდან მოყოლებული არ ჰქონია.

“ნიუელს ოლდ ბოისი”

მათთვის ჯერ ადრეა, მესის კიდევ შეუძლია მაღალ დონეზე თამაში, არგენტინაში დაბრუნების დრო მაშინ მოვა, როცა ლეო უკანასკნელ მუნდიალს ჩაატარებს, ეს კი 2022 წელს მოხდება. თუმცა, არავინ იცის რა მოხდება.