“ბარსელონა” – “ბაიერნის” მსაჯი ცნობილია

კატალონიის “ბარსელონა” საგულდაგულოდ ჩემპიონთა ლიგის ეგიდით, 14 აგვისტოს, მიუნხენის “ბაიერნთან” მეოთხედფინალური მატჩისათვის ემზადება.

ესპანური გამოცემა Sport-ის მიერ გავრცელებული ინფორმაციით, UEFA-მ აღნიშნული შეხვედრის არბიტრად დამირ სკომინა დანიშნა.

ასევე, ცნობილია, რომ VAR-ის ოთახში მას დახმარებას იტალიელები – მასიმილიანო ირატი და მარკო გუიდა – გაუწევენ, ხოლო მეოთხე რეფერი პორტუგალიელი არტურ სოარეშ დიაში იქნება.

სლოვენიელმა არბიტრმა კატალონიელთა მონაწილეობით მატჩი ბოლოს გასული წლის 2 ოქტომბერს განსაჯა. ხსენებულ დაპირისპირებაში “ბარსამ” მილანის “ინტერი”, ანგარიშით, 2-1 დაამარცხა.

გარდა ამისა, ამ შეხვედრამდე, 44 წლის დამირმა 2017-2018 წლების სეზონში “ბლაუგრანასა” და ლონდონის “ჩელსის” შორის “კამპ ნოუზე” გამართულ მატჩშიც იმსაჯა, სადაც ლეო მესისა და უსმან დემბელეს გოლებით მასპინძლებმა 3-0 იმარჯვეს.

ჯამში, სკომინა “ლურჯ-ბროწეულისფერთა” შეხვედრების არბიტრი 5-ჯერ იყო, საიდანაც “ბარსელონამ” 4 მოიგო, 1 კი ფრედ დაასრულა.