მესის უყვარს “ბაიერნი”

“ბაიერნი” ამ დროისთვის უკეთესი გუნდია, ვიდრე “ბარსა”, უფრო შეკრული, უფრო კარგად დაკომპლექტებული, უფრო დინამიური და ტაქტიკურად გამართული. ყველაზე დიდი უპირატესობა რაც “ბაიერნს” აქვს არის ორგანიზება. ყველამ იცის მოედანზე რა უნდა აკეთოს, “ბარსაში” კი როგორი ტაქტიკაც არ უნდა შეარჩიონ, მაინც რჩება მინიმუმ ერთი ფეხბურთელი, რომელსაც საერთოდ ვერ გაუგია მოედანზე რას აკეთებს. ამ დონის შეხვედრებისთვის, ეს უკვე განაჩენია.

“ბარსას” მთავარი იმედი ლიონელ მესია, რომელმაც “ნაპოლისთან” საკუთარ დონეზე ითამაშა და კიდევ ერთხელ აღაფრთოვანა მაყურებელი. წესით და რიგით, მესის სამი გოლი უნდა გაეტანა, მაგრამ მეორე გოლი არ ჩაუთვალეს, მესამე გოლის დროს კი ფეხზე მკურნალობდნენ და თერთმეტმეტრიანი ვერ შეასრულა.

ლეომ თავის საყვარელ პოზიციაზე ითამაშა, როგორც ყოველთვის თავისუფალი იყო, ცენტრშიც ხშირად იწევდა, მაგრამ ძირითადად მარჯვენა ფლანგზე მოქმედებდა. ამ პოზიციაზე კი მიუნხენის “ბაიერნი” მსოფლიოში საუკეთესოა, რადგან ამ ფლანგზე ალფონსო დევისი ჰყავს, ბევრის აზრით, კანადელი უკვე არის მსოფლიოს საუკეთესო მარცხენა მცველი, მაგრამ ამ დროისთვის თუ ეს გადამეტებული შეფასებაა, სამომავლოდ ამ ტიტულში ვერავინ შეეცილება.

მისგან ცენტრში კი დავიდ ალაბაა, რომელიც უნივერსალიზმით გამოირჩევა და ასევე საუკეთესოდ ითვლება თავის პოზიციაზე. მისი შეძენა “ბარსელონას” დიდი ხანია სურს, მესისთან დაპირისპირება კი ყველაზე კარგი ტესტი იქნება.

მესის უყვარს “ბაიერნი”. ეს გუნდები რომ ერთმანეთს არ ინდობენ, ძველი ამბავია. პირველად მესის და “ბაიერნის” გზები პეპ გვარდიოლას ეპოქაში გადაიკვეთა, მაშინ “ბარსამ” 4-0 მოიგო “კამპ ნოუზე” და განმეორებით შეხვედრას აზრი დაუკარგა. ლეომ ორი გოლი გაიტანა.

მომდევნო ჯერზე იგივე გააკეთა “ბაიერნმა”, მწვრთნელის გარეშე დარჩენილი “ბარსა” გაანადგურა და “კამპ ნოუზე”, ამჯერად მესის არყოფნაში დარჩენილი გუნდიც არ დაინდო. გერმანელებს ასე სჩვევიათ, ცივსისხლიანად.

მომდევნო შეხვედრა ლუის ენრიკეს პერიოდია, “ბარსამ” გვარდიოლას “ბაიერნი” გაანადგურა და მეორე თამაშს კვლავ მოაკლდა დაძაბულობა. ლეომ კვლავ ორჯერ გაიტანა.

ამჯერად მხოლოდ ერთი ეტაპია.

აღსანიშნავია, რომ ვინც ამ სამ სეზონში გამარჯვება მოიპოვა, ჩემპიონიც ის გახდა.

გუნდების ყველა დაპირისპირების შესახებ, უკვე დავწერეთ და დაწვრილებითაც მიმოვიხილეთ, თვალის გადავლება აქ შეგიძლიათ.