MD: ანსუ ფატი საიმედოდ არის დაცული

Mundo Deportivo-ს მტკიცებით, მიმდინარე სატრანსფერო ფანჯრის დროს, “ბარსელონას” ანსუ ფატის დაკარგვის საფრთხე არ ემუქრება.

დღეს, Sport-მა იუწყა, რომ “ბარსა” ფეხბურთელის “მანჩესტერ იუნაიტედისგან” დაცვის მიზნით, მისთვის ახალი ხელშეკრულების შეთავაზებას აპირებს. MD-ს მტკიცებით კი მოქმედ კონტრაქტში არსებული პირობა, რომელიც გასული წლის დეკემბერში გაფორმდა, ფატის დაკარგვის ალბათობას ნულს უახლოვებს.

კერძოდ, ამ მომენტისთვის, ანსუს გამოსასყიდი თანხა 170 მილიონ ევროს შეადგენს, რომელიც, მისი პირველ გუნდში დაწინაურების შემდეგ, 400 მილიონამდე ავტომატურად გაიზრდება. სავარაუდოდ, ეს მომდევნო სეზონშივე მოხდება.

პანდემიის შედეგად წარმოქმნილი ეკონომიკური კრიზისის გათვალისწინებით, “ბარსელონაში” დარწმუნებულები არიან, რომ მომდევნო ორ თვეში 170 მილიონი ევროს გადახდას ვერცერთი კლუბი ვერ შეძლებს.

გარდა ამისა, “ბარსა”, ბორი ფატი (ფატის მამა) და როდრიგო მესი (ფატის აგენტი, ლიონელ მესის ძმა) უკვე შეთანხმდნენ, რომ ანსუ კარიერას “კამპ ნოუზე” გააგრძელებს.

2020/21 წლების სეზონში 17 წლის თავდამსხმელის ანგარიშზე 8 გოლი და 1 საგოლე გადაცემაა.