“ბარსელონას” “გამორჩეული” ტრანსფერები

ანტუან გრიზმანი მესამე ყველაზე ძვირადღირებული ფეხბურთელია “ბარსელონას” ისტორიაში. მასში კლუბმა 120 მილიონი ევრო გადაიხადა, მაგრამ ფრანგი ბოლო წლების ყველაზე ცუდ სეზონს ატარებს და მის ანგარიშზე, ყველა ტურნირზე გატანილი 14 გოლია.

ბოლო 4 შეხვედრიდან, მხოლოდ ერთი დაიწყო ძირითად შემადგენლობაში, ბოლო შეხვედრაში კი, თავისი ყოფილი კლუბის წინაშე დაამცირეს, როცა დაძაბულ ორთაბრძოლაში, მხოლოდ 90-ე წუთზე შეუშვეს მოედანზე.

გრიზმანი, რა თქმა უნდა, არ არის ერთადერთი წარუმატებელი ტრანსფერი კლუბის ისტორიაში.

ფილიპე კოუტინიო

კოუტინიო 145 მილიონი ევროს სანაცვლოდ გადავიდა “ბარსელონაში”, მაგრამ სულ რაღაც 18 თვეში, მიუნხენის “ბაიერნში” გაანათხოვრეს. მან 76 შხვედრაში, 21 გოლის გატანა შეძლო. ჯერ არავინ იცის რა ბედი ელის ბრაზილიელს, მთავარი შემოსავლის წყაროდ მას მიიჩნევდნენ, მაგრამ კლუბმა უკვე გაყიდა არტურ მელო, შესაბამისად, მცირედით, მაგრამ მაინც გაიზარდა იმის შანსი, რომ კოუტინიო “ბარსელონაში” დარჩეს, გადამწყვეტი სიტყვა “ბარსას” მომავალ მწვრთნელს ერგება, რომელიც კაცმა არ იცის, ვინ იქნება.

უსმან დემბელე

დემბელე ნეიმარის შემცვლელად მოიყავნეს, სწორედ მას უნდა შეევსო ბრაზილიელის ადგილი და პარტნიორობა გაეწია ობლად დარჩენილი სამხრეთ ამერიკელებისთვის, მაგრამ 125 მილიონ ევროდ ნაყიდმა ფეხბურთელმა, თავი პირველ რიგში ტრავმიანობით და არაპროფესიონალიზმით დაგვამახსოვრა.

დემბელეს ბოლომდე მხარს უჭერდნენ მესი და სუარესი, ბოლოს კი მათაც დაკარგეს ფრანგის ნდობა. დემბელეს ტრანსფერში განსაკუთრებული აღნიშვნის ღირსია ის, რომ ზუსტად იმავე პერიოდში შესთავაზა ბმაპეს აგენტმა “ბარსას” თავისი კლიენტი, მაგრამ ფერნანდესმა დემბელეს ყიდვა არჩია.

რაც უფრო მეტი დრო გავა, ამ გადაწყვეტილების უგუნურების დონე მით უფრო გაზირდება.

ზლატან იბრაჰიმოვიჩი

ზლატანი გუნდში ვერ ჩაეწერა და ეს გასაკვირი ნამდვილად არ ყოფილა, იბრა ის ფეხბურთელია, რომელიც ყველგან ლიდერი იყო, ის ვერ თამაშობს თუ თამაში მასზე არ არის აწყობილი, შესაბამისად, ლიდერობისთვის კონკურენცია მოუწია ლიონელ მესისთან და რა თქმა უნდა, დამარცხდა. თუმცა, თავად გვარდიოლაზე უფრო მეტად გაბრაზდა, რადგან მესის სიდიადეს ყოველთვის აღიარებდა, მისი სიბრაზე კი ლოგიკური იყო, რადგან პეპს უნდა სცოდნოდა, რა სტილისა და ყაიდის ფეხბურთელს ყიდულობდა.

იბრას ტრანსფერის მთავარი უარყოფითი მხარე, სამუელ ეტო’ო იყო, თავისი დროის გამორჩეული ფორვარდი, რომელიც დამამციმრებლად ჩააყოლეს იბრაჰიმოვიჩის ტრანსფერს და აფრიკელს როგორც სჩვეოდა, სეზონის მიწურულს შური იძია, ზედიზედ მეორედ მოიგო “ტრიპლეტი”, მათ შორის ფინალი მოიგო იქ, სადაც “ბარსას” ყველა ფეხბურთელი ოცნებობდა თასის აღმართვას – “სანტიაგო ბერნაბეუზე”.

ალექსის სანჩესი

ცუდი ნამდვილად არ იყო, განსაკუთრებით კარგად “კლასიკოში” თამაშობდა. მის ანგარიშზე სამ სეზონში გატანილი 41 გოლია. შემდეგ კი “სუარესის” ტრანსფერს შეეწირა და “არსენალში” გადაბარგდა. ეს სწორი გადაწყვეტილება იყო, სანჩესი გარემარბის კვალობაზე, უფრო მეტად, ბურთის კარგად “შემნარჩუნებელი” ფეხბურთელი გამოდგა და არა კარგი “მომტყუებელი”, მასში აღებული თანხა, “ბარსამ” ისტორიაში საუკეთესო ტრიოს შესაქმნელად გამოიყენა.

არდა თურანი

ნეტავ ვიცოდე, ვის მოსდის თავში, “ატლეტიკოს” ფეხბურთელი “ბარსაში” გადმოიყვანოს, სულ მცირე სამი წელი იქნება საჭირო, რომ საფეხბურთო ფილოსოფია და მრწამსი შეიცვალოს, ამხელა დროს კი “ბარსაში” ვერავინ მოგცემს.

თურანმა, რა თქმა უნდა, ვერ გაამართლა. მასში 34 მილიონი ევრო გადაიხადეს.

ანდრე გომეში

კომიკური იყო ის, რომ “ბარსა” ამ ტრანსფერისთვის მადრიდის “რეალს” ეჭიდავა და ძლიერ გაიხარა, როცა 37 მილიონ ევროდ, პორტუგალიელი დაიბევა, სეზონის ბოლოს კი ყველამ ძლიერად შემოირტყა თავში ხელი, პორტუგალიის ნაკრების ნახევარდაცვაში, ბერნარდო და ბრუნო ბრწყინავდნენ, “ბარსამ” კი ანდრე გომეში იყიდა.

პაკო ალკასერი

მასში კლუბმა 30 მილიონი ევრო გადაიხადა, ეს იქამდე მოხდა, სანამ სატრანსფერო ფასები რევოლუციურად გაიზრდებოდა. პაკომ 50 შეხვედრაში 15 გოლის გატანა შეძლო, ამავე პერიოდში, რობინ ვან პერსი იხვეწებოდა “ბარსაში” გადასვლას, ხელფასის შემცირებას დათანხმდა, თავისუფალი აგენტი იყო და 2 წლიან კონტრაქტს თხოულობდა, მაგრამ ფერნანდესი რის ფერნანდესი იყო..

მალკომი

41 მილიონი ევრო ბრაზილიელში, “რომას” გამოგლიჯეს ხელიდან, ისე თითქოს საქმე გაბრიელ ბატისტუტას ეხებოდა, ხელში კი შეგვრჩა კარგი მძლეოსანი, რომელმაც ერთი-ორი კარგი შეხვედრა ჩაატარა.