კოუტინიოს სეზონის რეკორდი

ფილიპე კოუტინიოსთვის კოპა ამერიკის ეგიდით გამართული 1/4-ფინალური შეხვედრა პერუს წინააღმდეგ რიგით 68 აღმოჩნდა სეზონის განმავლობაში. ევროპის წამყვან 5 ჩემპიონატში მოთამაშე ფეხბურთელებს შორის ეს რეკორდია.

დიდი ალბათობით, კონკრეტული მაჩვენებელი ორით გაიზრდება, ვინაიდან 3 ივლისს ბრაზილია კოპა ამერიკაზე არგენტინას დაუპირისპიდება, შემდეგ კი ან ფინალს ითამაშებს, ან მე-3 ადგილისთვის გასამართ მატჩში მიიღებს მონაწილეობას.

ბრაზილიელმა "ბარსელონას" რიგებში 2018/19 წლების სეზონზე 54 მატჩი ჩაატარა. აქედან 34 ლა ლიგაზე, 12 ჩემპიონთა ლიგაზე, 7 კოპა დელ რეიზე და ერთიც ესპანეთის სუპერ თასზე.

ბრაზილიის მაისურით კი ამ სეზონში კოუტინიომ 14 შეხვედრაში მიიღო მონაწილეობა.