„ჟირონა“ 0:2 „ბარსელონა“ - ერნესტო ვალვერდე მატჩის შემდეგ

"ბარსელონას" მთავარმა მწვრთნელმა, ერნესტო ვალვერდემ "ჟირონასთან" მატჩის შემდეგ რამდენიმე მნიშვნელოვანი საკითხი განიხილა.

"კოუტინიო მეტოქის წინააღმდეგ თამამ გადაწყვეტილებებს იღებს, რაც ზოგჯერ შედეგის მომტანია, ხოლო ზოგჯერ - არა. ერთი-ერთზე თამაშისას ყველაფრის ალბათობა არსებობს, მაგრამ მცდელობა მუდამ დასაფასებელია. ფილიპეს საგოლე მომენტები ჰქონდა. მართალი გითხრათ მეგონა, რომ ორივე მათგანს გამოიყენებდა.

საწყის 45 წუთსა და მეორე ნახევრის სტარტზე გარკვეულმა სირთულემ იჩინა თავი. მეტოქის ინტენსიური პრესინგისა და ჩვენ მიერ ბურთის ხშირი დაკარგვის მიუხედავად, მასპინძლებს სახიფათო მომენტი არ შეუქმნიათ. ართური მოედნის ცენტრში დომინირების მიზნით გამოვიდა. საკითხი ეხებოდა თამაშის აგებასა და თავისუფალი პარტნიორის ძიებას. რთულ შეხვედრაში მნიშვნელოვანი 3 ქულა მოვიპოვეთ.

ბერნარდოს გაძევების შემდეგ მეტოქემ სიღრმისკენ გადაინაცვლა, რაც დროის საკითხი იყო. დომინირება და ცენტრალური ნახევარმცველების მეშვეობით ბურთის ფორვარდებამდე მიტანა გვევალებოდა. ინტრიგა უკანასკნელ მომენტამდე არ გამქრალა, რადგან სტუანისა და პორტუს თითოეული დარტყმა, შესაძლოა, გოლით დასრულებულიყო.

"ჟირონა" შესანიშნავი გუნდია, რომელიც ინტენსიურ ფეხბურთს თამაშობს."-განაცხადა ვალვერდემ.

შეგახსენებთ, რომ 49 ქულით "ბარსელონა" ესპანეთის ჩემპიონატის ლიდერია.