"ბარსელონას" გეგმები დაცვის ცენტრთან დაკავშირებით

დიდი ალბათობით, მომდევნო სეზონიდან, "ბარსელონას" დაცვის ცენტრს მცირედით განახლებული შემადგენლობით ვიხილავთ.

კატალონიის რადიო, AS-ზე დაყრდნობით, ავრცელებს ინფორმაციას, რომ "ბარსელონას" მთავარი მიზანი იერი მინას მაღალი დონის გუნდში განათხოვრებაა. კოლუმბიელი უკანახაზელი ერნესტო ვალვერდეს გეგმებში არ შედის. "ბარსა" აპირებს, მსოფლიო ჩემპიონატის დასრულებამდე დაიცადოს და თუ 23 წლის ფეხბურთელმა ნაკრებში თავი კარგად წარმოაჩინა, მისი კარგ გუნდში განათხოვრების შანსი მოიმატებს.

იმ შემთხვევაში, თუ "ბარსელონამ" მინა იჯარით ვერ გაუშვა, განიხილება ტომას ვერმალენის გაყიდვის ვარიანტიც. 32 წლის უაკნახაზელმა, გასულ სეზონში, თავი კარგად კი გამოიჩინა, მაგრამ მისი ტრავმის პრობლემა მოგვარებული ჯერ კიდევ არაა. AS-ის ცნობით, ვერმალენის შემთხვევაშიც, გადამწყვეტი მისი მსოფლიო ჩემპიონატზე გამოსვლა იქნება.

რაც შეეხება მომსვლელს - გუნდის პრიორიტეტი "სევილიას" ახალგაზრდა ფრანგი მცველი კლემან ლანგლეა, რომლის ტრანსფერიც, დიდი ალბათობით, შედგება.