"ბარსელონას" ტრიუმფალური ლიგა რიცხვებში
"ბარსელონამ" 2017/18 წლების სეზონი ლა ლიგის მოგებით დაასრულა. კატალონიური გუნდი ესპანეთის ჩემპიონი 25-ედ გახდა. წარმოგიდგენთ ათ რიცხვს, რომელიც ამ სეზონში კლუბის გამოსვლას უკავშირდება.
36
"ბარსა" სატურნირო ცხრილის სათავეში 36 კვირის განმავლობაში იყო. მთელი სეზონი მხოლოდ რამდენიმე დღით მეტი გაგრძელდა და ერნესტო ვალვერდეს შეგირდებმა უფრო დაბალ პოზიციაზე მხოლოდ საწყისი ორი კვირა გაატარეს.
28
გუნდმა პრიმერა დივიზიონში ამდენი შეხვედრა მოიგო. დანარჩენი მატჩებიდან 9-ში ფრე დაფიქსირდა, "ბარსას" მარცხით კი მხოლოდ ერთი დასრულდა.
19
მატჩები, რომლებშიც "ბარსელონამ" კარი მშრალად შეინახა. მარკ ტერ შტეგენი გაშვებული გოლების სიმცირის მხრივ საუკეთესო ვერ გახდა, მაგრამ არც ბევრი გოლი გაუშვია. მან გოლი არ გაუშვა ისეთ გუნდებთან შეხვედრებში, როგორებიც არიან მადრიდის "რეალი" და "ატლეტიკო".
3 330
მარკ-ანდრე ტერ შტეგენი ერნესტო ვალვერდეს მიერ ყველაზე მეტად გამოყენებული ფეხბურთელი გახდა. მან გუნდის კარი ერთის გარდა ყველა შეხვედრაში დაიცვა (გამონაკლისი "ვილიარეალთან" მატჩი იყო, რომელშიც გერმანელმა დაისვენა) და საერთო ჯამში მოედანზე 3 330 წუთი გაატარა.
34
ამდენი გოლი გაიტანა ლიონელ მესიმ, რომელიც ლა ლიგის საუკეთესო ბომბარდირი გახდა და ოქროს ბუციც მოიპოვა. მეორე ადგილზე 25 გოლით ლუის სუარესი გავიდა.
12
სუარესი და მესი მხოლოდ გოლების გატანით არ გამოირჩეოდნენ. ორივემ 12 საგოლე პასი შეასრულა და სამხრეთ ამერიკელებმა პაბლო ფორნალსთან ლა ლიგის სეზონის საუკეთესო ასისტენტის წოდება გაიყვეს.
2 495
ეს რიცხვი ივან რაკიტიჩს უკავშირდება. ხორვატმა ნახევარმცველმა სეზონში ყველაზე მეტი ზუსტი პასი შეასრულა და სერხიო ბუსკეტსსაც კი გაუსწრო, რომელიც მეორე ადგილზე გავიდა. მათ შემდეგ საუკეთესო მაჩვენებელი ჟორდი ალბას აქვს.
9
2017/18 წლების სეზონი და სიტყვა "ქამბექი" კარგად ნამდვილად არ გაგვახსენდება, მაგრამ "ბარსელონამ" თამაშის ბედი თავადაც შემოატრიალა და ეს 9-ჯერ გააკეთა. პირველი მათგანი იყო "ხეტაფეს" დამარცხება, ასევე უნდა გამოვარჩიოთ მოგება "სოსიედადთან" და ფრე "სევილიასთან".
21 770
ლა ლიგის სეზონი ყოველთვის დამღლელია და ამის ერთ-ერთი მთავარი განმაპირობებელი ფაქტორი ისიცაა, რომ გუნდს ბევრი მგზავრობა უწევს. "ბარსელონამ" 19 საგარეო მატჩი ჩაატარა და აქედან მხოლოდ ორ გუნდს ეწვია ავტობუსით, დანარჩენ შემთხვევაში კატალონიელებს თვითმფრინავის გამოყენება უხდებოდათ. ჯამში, მათ 21 770 კმ დაფარეს.
25
იმ ფეხბურთელების რაოდენობა, რომლებმაც ძირითად გუნთან ერთად მოედანზე გარკვეული დრო გაატარეს. 2017/18 წლების სეზონში "ბარსელონას" მაისურით ლა ლიგაში ამ ფეხბურთელებმა ითამაშეს:
ტერ შტეგენი, სემედუ, პიკე, რაკიტიჩი, ბუსკეტსი, დენისი, ინიესტა, სუარესი, მესი, დემბელე, სილესენი, კოუტინიო, მასკერანო, პაულინიო, დეულოფეუ, ალკასერი, ალბა, დინი, რობერტო, გომეში, ვიდალი, უმტიტი, მინა, ვერმალენი.
ამ სიახლეზე კომენტარები გათიშულია.
კომენტარები [ 6 ]