“ბარსელონა” გრიზმანისთვის ბრძოლაში მარტო არაა

გუშინ ოფიციალურად დადასტურდა, რომ “ბარსელონას” მთავარი სამიზნე ანტუან გრიზმანი, ზაფხულში, მადრიდის “ატლეტიკოს” დატოვებს.

ამ ინფორმაციის გავრცელების შემდეგ, ევროპულ პრესაში, გრიზმანის მომავალთან დაკავშირებით, არაერთი ცნობა გავრცელდა.

ცნობილია, რომ “ბარსელონას” გრიზმანის დამატება დიდი ხანია სურს. კატალონიელები არაერთ თავდამსხმელს დააკვირდნენ, მათ შორის იოვიჩსა და როდრიგოს, მაგრამ გრიზმანი ყოველთვის პრიორიტეტი იყო.

აქამდე ცნობილი იყო, რომ გრიზმანისთვის მხოლოდ “ბარსელონა” იბრძოდა, თუმცა L’Equipe ავრცელებს ინფორმაციას, რომლის თანახმადაც, ანტუანის და, გასულ კვირაში, “პარი სენ-ჟერმენის” წარმომადგენლებს შეხვდა. Mundo Deportivo-ც იუწყება, რომ პარიზული კლუბი ფრანგი ვარსკვლავისთვის სერიოზულად იბრძოლებს.

კატალონიის რადიოს ცნობით, გრიზმანს რამდენიმე შეთავაზება აქვს, მაგრამ ის უპირატესობას “ბარსელონას” ანიჭებს. კატალონიაში მოღვაწე ჟურნალისტი მარსელო ბეჩლერი კი ირწმუნება, რომ გრიზმანმა “ბარსელონაში” გადასვლის შესახებ თანაგუნდელებს უკვე აცნობა. Calciomercato-ს მტკიცებით, ანტუანი კატალონიელებს უკვე შეუთანხდა და ის წელიწადში 17 მილიონ ევროს მიიღებს.