ლამინ იამალი დეკემბრის თვის საუკეთესო ფეხბურთელია

“ბარსელონას” ახალგაზრდა ვარსკვლავი ლამინ იამალი ლა ლიგის დეკემბრის თვის საუკეთესო ფეხბურთელად დასახელდა.

გასულ თვეში 18 წლის ფეხბურთელმა ესპანეთის ჩემპიონატში 4 თამაში ჩაატარა, ოთხივე მოიგო და გაიტანა 2 გოლი.

იამალი ლა ლიგის თვის საუკეთესო ფეხბურთელად ზედიზედ მეორედ დასახელდა. 2018 წლის შემდეგ პირველად მოხდა, როდესაც “ბარსელონას” ერთი ფეხბურთელი ამ ჯილდოს ზედიზედ 2-ჯერ დაესაკუთრა. 8 წლის წინ ეს მოთამაშე, რა თქმა უნდა, ლეო მესი იყო.

ლამინი თვის საუკეთესო ფეხბურთელად სულ სამჯერაა დასახელებული. ამ მაჩვენებლით ის კრიშტიანუ რონალდუს, ჯუდ ბელინგემს, რობერტ ლევანდოვსკის, ვინისიუსსა და კილიან მბაპეს გაუთანაბრდა.

ლა ლიგის თვის საუკეთესო ფეხბურთელის ჯილდო 2013 წლიდან გადაეცემათ. 8-8 ჯილდოთი რეკორდსმენები ლიონელ მესი და ანტუან გრიზმანი არიან.