პიკეს საპრეზიდენტო გეგმები: ჩავი, ინიესტა, პუიოლი და “ვაკა ვაკა კამპ ნოუ”

ცოტა ხნის წინ გავრცელდა ინფორმაცია, რომ ჟერარ პიკე “ბარსელონას” 2021 წლის საპრეზიდენტო არჩევნებში მონაწილეობას აპირებს.

Mundo Deportivo პიკეს გეგმების შესახებაც ავრცელებს ინფორმაციას.

წყაროს ცნობით, ჟერარს სურს, გარშემო მისთვის და კლუბისთვის კარგად ნაცნობი ადამიანები შემოიკრიბოს. მთავარი მწვრთნელის პოსტს ჩავი ერნანდესს ჩააბარებს, მისი ასისტენტი კი ანდრეს ინიესტა იქნება.

სპორტული დირექტორის პოსტს კარლეს პუიოლი დაიკავებს, რომელიც გასახდელის ხშირი სტუმარიც იქნება და ფეხბურთელების ყოველდღიურ პრობლემებს გაეცნობა.

განიხილება “კამპ ნოუსთვის” სახელის გადარქმევის ვარიანტიც. ცნობილია, რომ კომპანია Rakuten “ბარსას” სპონსორი პიკეს დახმარებით გახდა. კატალონიელს იაპონური კომპანიის ხელმძღვანელობასთან კარგი ურთიერთობა აქვს და იგეგმება, რომ მათი დახმარებით, სტადიონს დაერქმევა სახელი, რომელიც ბრენდთან ასოცირებული არ იქნება. ერთ-ერთი ვარიანტია Waka Waka Camp Nou.

პიკე შეეცდება შაკირას ფაქტორი გამოიყენოს. მისი მეუღლე მსოფლიოში ერთ-ერთი უმდიდრესი ქალია და მას შეუძლია “ბარსელონასთვის” სასარგებლო კონტრაქტები გააფორმოს.

და ბოლოს – დღეს, ესპანეთში, არის დღე, რომელიც ჩვენებური პირველი აპრილის ტოლფასია. თუმცა, ჯერ ძნელია იმის თქმა, Mundo Deportivo ხუმრობს, თუ ეს ინფორმაცია სიმართლეა.