ოფიციალურად: ალბა ნაკრებს მიღმა, “ფურია როხაში” ერთი “ბარსელონელი” დარჩა

ესპანეთის ნაკრებში, რომლის წარმატებების მთავარი შემოქმედებიც “ბარსელონას” ფეხბურთელები იყვნენ, კატალონიური გუნდის კვალი, ნელ-ნელა, ქრება.

“ბარსას” ყოფილმა დამრიგებელმა, ლუის ენრიკემ, ოქტომბრის სანაკრებო თამაშებისთვის განაცხადი დაასახელა, რომელშიც “ბარსელონადან” მხოლოდ სერხიო ბუსკეტსი მოახვედრა. გუნდს ტრავმის გამო ვერ დაეხმარება სერჟი რობერტო, ჟორდი ალბა კი ენრიკემ კვლავ არ გამოიძახა. როგორც ჩანს, სანამ ნაკრებს სათავეში ლუის ენრიკე უდგას, ალბას განაცხადში დაბრუნება ძალიან გაუჭირდება. საქმე ისაა, რომ მათ კონფლიქტი ენრიკეს “ბარსელონაში” მუშაობის დროსაც ჰქონდათ და როგორც ჩანს, ეს უთანხმოება არ ამოწურულა. ცნობისთვის, ეს ის ალბაა, გუშინ, ჩემპიონთა ლიგის მატჩში, 3 საგოლე გადაცემა რომ გააკეთა.

ესპანეთის ნაკრებში გამოიძახეს “ბარსელონას” საკუთრებაში მყოფი პაკო ალკასერიც, რომელიც “დორტმუნდშია” განათხოვრებული და საკმაოდ შედეგიანადაც თამაშობს.

ესპანეთის ნაკრების განაცხადი ასე გამოიყურება: კეპა, პაუ ლოპესი, დე ხეა; გაია, მარკოს ალონსო, ალბიოლი, ნაჩო, სერხიო რამოსი, ბარტრა, ასპილიკუეტა, ხონი; ბუსკეტსი, როდრი, კოკე, სებალიოსი, ტიაგო, საული, ასენსიო, მორატა, ასპასი, ალკასერი, როდრიგო, სუსო.