რატომ დასჭირდა “ბარსას” “სევილიასთან” ქულის გადარჩენისთვის ბრძოლა?

“სევილიასთან” შეხვედრაში “ბარსელონამ” ერთი ქულა აიღო, რაც არც ისე შთამბეჭდავი მიღწევაა, თუმცა, თამაშის სცენარიდან გამომდინარე კატალონიელები ტაბლოზე დაფიქსირებული შედეგით კმაყოფილნი უნდა იყვნენ. ობიექტურად თუ შევაფასებთ, მასპინძლები თითქმის მთელი მატჩის განმავლობაში უკეთესად გამოიყურებოდნენ, მაგრამ არგენტინელმა ჯადოქარმა, რომელიც მოედანზე სათადარიგოთა სკამიდან შემოვიდა, კატალონიელები წაგებისგან იხსნა. 

საინტერესოა, რატომ დასჭირდა ერნესტო ვალვერდეს გუნდს თამაშის ბედის შემობრუნება? მას ხომ მოედანზე მაღალი დონის გამოცდილი ფეხბურთელები ჰყავდა?

აშკარაა, რომ გოლები, რომლებიც “ბარსელონას” კარში გავიდა, სევილიელების შემდეგ, “ბარსას” ცენტრალური მცველების “დამსახურება” იყო. პიკე-უმტიტის დუეტი კარგ შთაბეჭდილებას ვერ ტოვებდა. მათ რამდენიმე სერიოზული შეცდომა დაუშვეს და ამით მასპინძელთა შემტევებს, ხოაკინ კორეას და ფრანკო ვასკესს მეტის გაკეთების საშუალება მისცეს, თანაც თავდაჯერებულობა შემატეს. შედეგად, ანდალუსიელებმა პირველ ტაიმში ერთი გოლი გაიტანეს, მეორეში კიდევ ერთი და გახდნენ სეზონში მესამე გუნდი, რომელმაც ლა ლიგის ლიდერის კარი 90 წუთის განმავლობაში ერთზე მეტჯერ აიღო. 

შეიძლება, ცენტრალური მცველების არადამაჯერებელი თამაში იმასაც დავაბრალოთ, რომ ისინი, უბრალოდ, გადაიღალნენ. ვალვერდე ამ დუეტს მიმდინარე სეზონში ძალიან ხშირად იყენებს და დასვენების საშუალებას იშვიათად აძლევს. პიკემ მიმდინარე სეზონში უკვე 38 შეხვედრა ჩაატარა, უმტიტიმ კი – 33 (ფრანგი გარკვეული პერიოდის განმავლობაში ტრავმირებული იყო). ორივემ ითამაშა ეროვნულ გუნდებთან ერთადაც, სანაკრებო პაუზის მიმდინარეობისას. 

“ბარსელონაში” ფიზიკური მომზადების დონე ძალიან მაღალია, ამიტომ ახერხებს ფეხბურთელთა უმეტესობა სტაბილურად თამაშს, მაგრამ დიდია იმის ალბათობა, რომ იმ ფეხბურთელმა, რომელიც იშვიათად ისვენებს, უფრო მეტი შეცდომა დაუშვას, ვიდრე დასვენებულმა, თანაც ისეთმა, რომელსაც დასამტკიცებელი ბევრი აქვს. დასვენებული მოთამაშეების ნაკლებობას კი “ბარსა” ნამდვილად არ განიცდის. ვალვერდეს დაცვის ცენტრის გადახალისების რამდენიმე ვარიანტი აქვს. მაგალითად, ტომას ვერმალენის სახით, რომელიც გარკვეული პერიოდის განმავლობაში, კერძოდ კი უმტიტის არყოფნის დროს თამაშობდა და საკმაოდ კარგადაც, მაგრამ შემდეგ მორიგი ტრავმა მიიღო და მას შემდეგ მინდორზე იშვიათად ვხედავთ. ასევე, იერი მინა, რომელსაც თამაშის პრაქტიკა თითქმის არ ეძლევა. ამ დუეტის ნდობა, ხანდახან ნამდვილად შეიძლება. 

არ დავივიწყოთ “ბარსა ბ”-ს ფეხბურთელებიც, რადგან “ბარსელონა”, ტრადიციულად, ახალგაზრდული გუნდის წევრებს დიდ ყურადღებას აქცევს. აქ არიან დავიდ კოსტასი, ხოსე ანტონიო ხილი, მარკ კუკურელია (რომელსაც ჟორდი ალბას და ლუკა დინის პოზიციაზე თამაშიც შეუძლია) და მარტინ ონგლა. 

ნაკლებად მოსალოდნელია, ვალვერდემ მომდევნო შეხვედრაში, “რომასთან” შემადგენლობის არჩევისას სერიოზული ცვლილება გააკეთოს, მაგრამ, საინტერესოა, გადახალისდება თუ არა ცენტრალური დაცვა ან ნებისმიერი სხვა პოზიცია ამ მატჩიდან რამდენიმე დღეში, “ლეგანესთან” შეხვედრაში, რომელიც “სევილიასთან” შედარებით, არც ისე მრისხანე მეტოქეა.