“ბეტისთან” მატჩისთვის განაცხადი ცნობილია

ლა ლიგა დაბრუნდა! სამუელ უმტიტიც დაბრუნდა! ფრანგმა მცველმა ტრავმა მოიშუშა და “ბეტისთან” მატჩისთვის განაცხადში მოხვდა.

განაცხადს ასევე თავდამსხმელი, ჟერარ დეულოფეუც დაუბრუნდა. გუნდთან ერთად სარეზერვო კლუბის ნახევარმცველმა, კარლეს ალენიამაც ივარჯიშა, რომელიც ასევე განაცხადში მოხვდა.

ახალწვეულმა, ფილიპე კოუტინიომ თანაგუნდელებთან ერთად ჩაატარა ვარჯიში, თუმცა ტრავმა ბოლომდე არ აქვს მოშუშებული და მატჩს კვლავ გამოტოვებს. ლაზარეთში ასევე იმყოფებიან უსმან დემბელე, პაკო ალკასერი, ანდრეს ინიესტა და ხავიერ მასკერანო.

რაფინიამ კლუბისგან სპეციალური ნებართვა მიიღო და ანდალუსიაში არ გაემგზავრება. როგორც მოგეხსენებათ, ბრაზილიელი მილანის “ინტერში” გადასვლასთან ძალიან ახლოსაა.

მატჩს დენის სუარესი და იერი მინაც გამოტოვებენ. მიუხედავად იმისა, რომ ეს უკანასკნელი კატალონიურმა კლუბმა ოფიციალურად გაიფორმა, წინასამატჩო პრესკონფერენციაზე მთავარმა მწვრთნელმა, ერნესტო ვალვერდემ ხაზგასმით აღნიშნა, რომ მან კოლუმბიელს მეტი დრო უნდა მისცეს, რათა ახალ ქვეყანასა და ახალ გუნდს შეეჩვიოს.

სრული განაცხადი ასე გამოიყურება: ტერ შტეგენი, სემედუ, პიკე, რაკიტიჩი, სერხიო ბუსკეტსი, სუარესი, მესი, სილესენი, პაულინიო, დეულოფეუ, ჟორდი ალბა, დინი, სერჟი რობერტო, ანდრე გომეში, ალეიშ ვიდალი, უმტიტი, ვერმალენი და ალენია.