მესი და მასკერანო თანამემამულე ფეხბურთელს გამოჯანმრთელებაში დაეხმარნენ

"ბარსელონას" არგენტინელი ფეხბურთელები, ლიონელ მესი და ხავიერ მასკერანო 25 წლის თანამემამულეს, ლუსიანო გარაის გამოჯანმრთელებაში დაეხმარნენ. ამ ინფორმაციას Sport ავრცელებს.

გარაი, რამდენიმე თვის წინ, ავტოავარიაში მოჰყვა და ის სიკვდილს სასწაულებრივად გადაურჩა. გამოცემა Dia a Dia-ს ცნობით, ოჯახის წევრებს ისღა დარჩენოდათ, ელოცათ, რადგან მდგომარეობა ძალიან მძიმე იყო.

ოჯახის წევრები და ახლობლები ყველაფერს ცდილობდნენ, რომ გარაი გაემხნევებინათ და მისი მოტივირება მოეხდინათ. ერთ-ერთმა მათგანმა, ერნესტო ლუხანმა, რომელიც ეზეიზას აეროპორტის თანამშრომელია, გადაწყვიტა, მესისთვის და მასკერანოსთვის მიემართა.

"ბარსელონას" არგენტინელი ფეხბურთელები წინადადებას სიამოვნებით დათანხმდნენ და მათ ლუსიანო გარაის მიმართვა გაუგზავნეს, რომელშიც ისინი ფეხბურთელს მისი მეტსახელით, "ბარტოლოთი" მოიხსენიებენ.

Sport-ის ცნობით, თანამემამულე ვარსკვლავების მიმართვის მოსმენის შემდეგ, გარაის ჯანრმთელობის მდგომარეობა მკვეთრად გაუმჯობესდა.

თავად ლუსიანო გარაი აცხადებს: "ეს ძალიან ამაღელვებელი იყო. მესი ჩემი უმთავრესი კუმირია. მისი და მასკერანოს საქციელი დამეხმარა ბრძოლა გამეგრძელებინა. მსგავსი საჩუქრების მიღება ძალიან სასიამოვნო, ზოგჯერ კი, დაუვიწყარია."