ლიონელ მესი ლა ლიგის ისტორიაში საუკეთესოა, კრიშტიანუ რონალდუ მე-17

ესპანეთის ისტორიისა და სტატისტიკის კვლევითმა ცენტრმა ლიონელ მესი ლა ლიგის ისტორიაში საუკეთესო ფეხბურთელად დაასახელა. ამ ინფორმაციას AS ავრცელებს.

დედაქალაქური გამოცემის ინფორმაციით, შეგვიძლია, ამ ორგანიზაციის კვლევის შედეგები ოფიციალურადაც კი მივიჩნიოთ.

მკვლევარებმა შეისწავლეს სეზონში ჩატარებული წუთების რაოდენობა, ღია თამაშიდან გატანილი გოლები (თერთმეტმეტრიანების გამოკლებით), თერთმეტმეტრიანები, ავტოგოლები და წითელი ბარათები და დაადგინეს, რომ “ბარსელონას” არგენტინელი ვარსკვლავი ისტორიაში საუკეთესოა.

ესპანეთის ჩემპიონატის დაწყების დღიდან, ანუ თითქმის 90 წლის განმავლობაში, პრიმერაში 9280 ფეხბურთელს უთამაშია, აქედან 854 მეკარე იყო. მათგან საუკეთესო კი მესია.

მესის პირველ ადგილზე გაყვანის უპირველესი მიზეზი გატანილი გოლების რაოდენობაა. მის აქტივში 349 გოლია და უახლოეს მდევარს ლეო მთელი 64 გოლით უსწრებს.

კვლევის შედეგები ასეთია:

1. ლიონელ მესი (ბარსელონა) – 545 ქულა

2. რაული (რეალი) – 528 ქულა

3. სესარ როდრიგესი (ბარსელონა) – 524 ქულა

4. ტელმო სარა (ბილბაო) – 493

5. კინი (ხიხონი, ბარსელონა) – 488 ქულა

6. ხუან არსა (სევილია) – 481 ქულა

6. ალფრედო დი სტეფანო (რეალი) – 481 ქულა

8. პაკო ხენტო (რეალი) – 467 ქულა

9. კარლოს ალონსო სანტილიანა (რეალი) – 464 ქულა

10. გილერმო გოროსტისა (ბილბაო, ვალენსია) – 454 ქულა

ამჟამად მოთამაშე ფეხბურთელებს შორის, მესის შემდეგ ადგილს კრიშტიანუ რონალდუ იკავებს, რომელიც, 415 ქულით, საერთო ჩათვლაში მე-17 პოზიციაზეა.