16 წელი ღალატიდან...

ლუიშ ფიგუ "ბარსელონას" გულშემატკივრებისთვის ყველაზე საძულველ ფეხბურთელად ითვლება მათ შორის, ვისაც კატალონიური კლუბის მაისურით უთამაშია. დღეს, 24 ივლისს, ზუსტად 16 წელი გავიდა მას შემდეგ, რაც ფიგუ "რეალის" ფეხბურთელი გახდა.

2000 წლის 24 ივლისს, ლუიშ ფიგუ "რეალის" ფეხბურთელად კლუბის ლეგენდამ, ალფრედო დი სტეფანომ და ახლადარჩეულმა პრეზიდენტმა, ფლორენტინო პერესმა წარადგინეს.

ლუიშ ფიგუს "რეალში" შესაძლო გადასვლის შესახებ ჭორების გავრცელება 2000 წლის 5 ივლისს დაიწყო.

თუმცა, ტრანსფერამდე 10 დღით ადრე, პორტუგალიელმა "ბარსელონას" მაისურით სურათები გადაიღო და Sport-თან ინტერვიუში განაცხადა: "ეს არის და იქნება ჩემი მაისური. იმის მიუხედავად, მოიგებს თუ წააგებს ფლორენტინო პერესი საპრეზიდენტო არჩევნებს, მე "რეალში" არ გადავალ. მხოლოდ "ბარსელონაში" ვითამაშებ."

სწორედ ეს განცხადებაა იმის მიზეზი, რომ "ბარსელონას" გულშემატკივრებმა ფიგუ, მოგვიანებით, ასე შეიძულეს.

ჟოან გასპარის მიერ "ბარსელონას" საპრეზიდენტო არჩევნების მოგებიდან რამდენიმე საათში, ფიგუმ თავისი გამოსასყიდი თანხა, 61.7 მილიონი ევრო გადაიხადა და "სანტიაგო ბერნაბეუზე" თეთრი მაისურით წარდგა. იმ დროს, ეს ფეხბურთის ისტორიაში ყველაზე ძვირადღირებული ტრანსფერი იყო.

სწორედ ფიგუ იყო ის კოზირი, რომლითაც ფლორენტინო პერესმა ლორენცო სანსს "რეალის" საპრეზიდენტო არჩევნები მოუგო.

გავრცელებული ინფორმაციით, ფიგუსა და მის აგენტს არასდროს სჯეროდათ, რომ პერესი "რეალის" საპრეზიდენტო არჩევნებს მართლა მოიგებდა. ისინი "რეალში" შესაძლო გადასვლის შესახებ გავრცელებულ ინფორმაციას "ბარსელონაზე" ზეწოლისთვის, ახალი, გაუმჯობესებული კონტრაქტის გაფორმების იმედით იყენებდნენ.

პრობლემა კი მაშინ წარმოიშვა, როდესაც "რეალის" პრეზიდენტად პერესი აირჩიეს.

ფიგუსა და პერესს შორის მანამდე არსებული ხელშეკრულება ფეხბურთელს დიდი ოდენობის თანხის გადახდას ავალდებულებდა იმ შემთხვევისთვის, თუ ის "რეალში" არ გადავიდოდა.

"ბარსელონას" პრეზიდენტმა, ჟოან გასპარმა ფიგუსა და პერესს შორის არსებულ გარიგებას ამორალური უწოდა და ის ორივე მხარეს დაემუქრა: "ის, ვინც ეს გააკეთა, პასუხს აგებს. "რეალს" შერჩა ფეხბურთელი, რომელიც კლუბზე არ ზრუნავს."

"ბარსელონას" გულშემატკივრების რეაქცია კარგადაა ცნობილი და ის ფეხბურთის ისტორიის ნაწილად იქცა.

2000 წლის 21 ოქტომბერს, ფიგუ და "რეალი" "კამპ ნოუს" ესტუმრნენ. სწორედ იმ დღეს შეიგრძნო ფიგუმ, თუ რამდენად სძულდათ ის "ბარსელონას" გულშემატკივრებს.