ვალვერდემ პრესეზონისთვის რეზერვისტები დააწინაურა

ერნესტო ვალვერდემ უკვე დაიწყო თავისი, როგორც მთავარი მწვრთნელის საქმიანობა “ბარსელონაში” და პრესეზონისთვის შემადგენლობა დაასახელა. როგორც ჩანს, “ბილბაოს” ყოფილ თავკაცს კვლავ სურს, წინ წამოწიოს “ლა მასია” და ალბათ სწორედ ამას ემსახურება ის ფაქტი, რომ მან “ბარსელონა ბ”-ს 5 ფეხბურთელი გამოიძახა. ერთიც, ახალწვეული ვიტინიო, რომელიც სულ მალე მოაწერს ხელს კონტრაქტს.

კარლეს ალენია, კუკურელია, მარლონი, ორტოლა, პალენსია და ვიტინიო – სწორედ ისინი შეუერთდებიან ძირითად გუნდს აშშ-ში გასამართ ამხანაგურ ტურნირზე.

კარლეს ალენია – ფეხბურთელი “ბარსელონაში” ბავშვობიდან ირიცხება და მან გასულ კვირას კონტრაქტიც გაახანგრძლივა, რომელიც გაისად ეწურებოდა. კლუბს სურს, რომ ალენია განვითარდეს და საჭირო დროს, საჭირო მომენტში პირველ გუნდშიც დაიკავოს სათანადო ადგილი. ანალოგიურად – ორტოლაც. ახალგაზრდა მეკარეც მთავარ გუნდთან ერთად ივარჯიშებს მომდევნო კვირაში.

ბოლო, ვინც კონტრაქტი გაახანგრძლივა, მარკ კუკურელიაა. მარცხენა მცველმა კონტრაქტს ხელი პარასკევს მოაწერა. მისი გამოსასყიდი თანხა 12 მილიონი ევრო იქნება, ორი სეზონის შემდეგ კი ეს 40 მილიონამდე გაიზრდება. ფეხბურთელში კლუბი დიდ მომავალს ხედავს და მომავალში სასტარტო თერთმეტეულის წევრადაც მოიაზრებს.

შემდეგი სერჟი პალენსიაა. “ბარსელონა ბ”-ს კაპიტანმა შეთანხმებას უკვე მიაღწია და კონტრაქტს ხელს მომდევნო დღეებში მოაწერს. კლუბში მისი როლიც კუკურელიას მსგავსი იქნება – კატალონიელები მისგან მომავალში გუნდის ერთ-ერთ საკვანძო ფეხბურთელს ხედავენ. როგორც ჩანს, ერნესტო ვალვერდე არ აპირებს წინა მწვრთნელს მიბაძოს და ლუის ენრიკესგან განსხვავებით, ახალგაზრდა ფეხბურთელს შანსს მისცემს. როგორც გვარდიოლამ დაამტკიცა, აკადემიის ნდობა ნამდვილად ღირს.

ბოლოს კი მარლონი და ვიტინიო. ახალგაზრდა მცველმა უკვე ძირითად გუნდშიც მოასწრო დებიუტი – ლუის ენრიკემ მას ლა ლიგის ბოლო ტურებში სათამაშო დრო მისცა და საკმაოდ კარგი შთაბეჭდილებაც დატოვა. ვიტინიო კი კლუბში მოდის, როგორც ახალგაზრდა ტალანტი და პრესის ინფორმაციით, იგი სულ მალე ოფიციალურად გახდება “ბარსელონელი”. ბრაზილიაში ვიტინიო ნეიმარის დასაწყისსაც აგონებთ.

სწორედ ეს ექვსეული დაიწყებს 12 ივლისს ვარჯიშს ერნესტო ვალვერდეს გუნდთან ერთად. მწვრთნელი მათ გამოცდას აპირებს და თუ გაამართლებენ, ამერიკულ ტურნეშიც წაიყვანს.

შესაბამისად, “ბილბაოს” ყოფილი თავაცი შეეცდება, “ლა მასიას” ის დიდება დაუბრუნოს, რაც ლუის ენრიკეს დროს ჩაქრა და მისი ინსპირაცია ტიტო ვილანოვას გუნდია, რომლის სასტარტო შემადგენლობაშიც ყველა ფეხბურთელი “ბარსელონას” აღზრდილი გახლდათ.