"ბარსელონასა" და ბრაზილიის ფედერაციას შორის კონფლიქტი მწიფდება
ბრაზილიელებს ნეიმარის კოპა ამერიკასა და ოლიმპიადაზე წაყვანა სურთ, რასაც კატალონიელები ეწინააღმდეგებიან.
როგორც ცნობილია, ინტერესთა კონფლიქტის გამო, შესაძლოა, "ბარსელონას" ხელმძღვანელობასა და ბრაზილიის ფეხბურთის ფედერაციას შორის ურთიერთობის საკითხი, სერიოზულად გართულდეს.
მოგეხსენებათ, მიმდინარე წლის ზაფხულში კოპა ამერიკა და ოლიმპიადა გაიმართება. ბრაზილიელებს "ბლაუგრანას" ვარსკვლავის მონაწილეობა ორივე ტურნირზე უნდათ.
წყარო წერს, რომ ამ ტურნირებზე გამოსვლა თავად ფეხბურთელსაც სურს. თუმცა, თავის მხრივ, ბარსელონაში არ უნდათ, რომ ნეიმარმა მთელი თავისი ენერგია ნაკრებში დახარჯოს, განსაკუთრებით კი ოლიმპიადაზე. მოსალოდნელია, რომ უახლოეს მომავალში კლუბი მოლაპარაკებების მაგიდას, ბრაზილიის ნაკრების მთავარ მწვრთნელთან, დუნგასთან და 24 წლის თავდამსხმელთან ერთად მიუჯდება.
აღსანიშნავია, რომ კოპა ამერიკის გათამაშება ფიფას კალენდარში შედის, რის გამოც კატალონიელებს ნეიმარის არდათმობის უფლება არ აქვთ. რაც შეეხება ოლიმპიურ თამაშებს, ის ამ კალენდრის ნაწილი არ არის.
მხარეები, ნეიმარის, "ბარსელონასა" და ბრაზილიის ფეხბურთის ფედერაციის ინტერესთა გათვალისწინებით, კომპრომისის პოვნას შეეცდებიან, თუმცა, ბუნებრივია, ეს რთული იქნება.
შეგახსენებთ, 2008 წელს, "ბლაუგრანამ" ლიონელ მესის პეკინის ოლიმპიურ თამაშებზე გამგზავრების უფლება მისცა. არგენტინელი ჩინეთიდან ოქროს მედლით დაბრუნდა. აგრეთვე, გუნდის თავკაცი ლუის ენრიკე 1992 წლის ოლიმპიური ჩემპიონია.
ამ სიახლეზე კომენტარები გათიშულია.
კომენტარები [ 13 ]