სამუელ უმტიტი პირველი ფეხბურთელი არაა, რომლის ტრანსფერზეც “ბარსელონამ” და “ლიონმა” შეთანხმებას მიაღწიეს. კატალონიური კლუბის ოფიციალურმა ვებგვერდმა კიდევ 4 ასეთი შემთხვევა გაიხსენა.
სონი ანდერსონი
ბრაზილიელი ფეხბურთელი “ბარსელონაში” 2 წლის განმავლობაში – 1997-1999 წლებში თამაშობდა. ამ პერიოდში, კატალონიელებმა ესპანეთის ჩემპიონატი ზედიზედ 2-ჯერ მოიგეს, ხოლო ესპანეთის თასზე წარმატებას ერთხელ მიაღწიეს. ანდერსონმა, ლა ლიგაში, 47 თამაში ჩაატარა და 16 გოლი გაიტანა. 1999 წელს კი, მან “ლიონს” მიაშურა.
მარკ კროსასი
“ბარსელონას” სკოლის აღზრდილი საყრდენი ნახევარმცველი მშობლიური კლუბიდან “ლიონში” 2008 წელს, არენდით გადავიდა. ნახევარი სეზონის გასვლის შემდეგ, კროსასმა შოტლანდიაში გადაინაცვლა და კარიერა “სელტიკში” განაგრძო.
ჟოზე ედმილსონი
ბრაზილიელმა საყრდენმა ნახევარმცველმა “ლიონი” 2004 წელს დატოვა და ის “ბარსელონას” შეუერთდა. ფრანკ რაიკაარდის მიერ გაწვრთნილ გუნდში გატარებული 4 წლის განმავლობაში, მას კარგად გასახსენებლი მომენტებიც ჰქონდა (2-ჯერ ლა ლიგის, ხოლო თითოჯერ ჩემპიონთა ლიგისა და ესპანეთის სუპერ თასის მოგება) და ცუდად გასახსენებელიც (მუხლის მძიმე ტრავმა).
ერიკ აბიდალი
“ლიონში” გატარებული 3 სეზონის შემდეგ, ფრანგი მცველი “ბარსელონაში” 2007 წელს გადავიდა. კატალონიურ კლუბში გატარებული 6 წლის განმავლობაში აბიდალი ნამდვილ ლეგენდად იქცა. მან ღვიძლის სიმსივნე დაძლია და “უემბლის” სტადიონზე, “ბარსელონას” ისტორიაში მე-4 ჩემპიონთა თასი თავს ზემოთ აღმართა. აბიდალის წყალობით, “ბარსელონას” ისტორიაში 22 ნომერს განსაკუთრებული მნიშვნელობა აქვს.
