ჟერარ მარტინი: თავაწეულები უნდა ვიყოთ

“პარი სენ-ჟერმენთან” ჩემპიონთა ლიგის დაძაბულ შეხვედრაში განცდილი მარცხის (2-4) შემდეგ, “ბარსელონას” მცველმა ჟერარ მარტინმა მატჩი შეაფასა და ოპტიმისტური დასკვნები გამოიტანა.

ახალგაზრდა უკანახაზელი, რომელსაც შეხვედრამდე ტერფის ანთება აწუხებდა და მისი თამაში საეჭვო იყო, მოედანზე მაინც გავიდა და გუნდს ურთულეს მომენტში დაეხმარა.

ტრავმით თამაში ასეთ დონეზე

მატჩის შემდეგ მარტინმა აღიარა, რომ მსგავსი რანგის დაპირისპირებისთვის ფეხბურთელები დისკომფორტს ყურადღებას არ აქცევენ:

“საბოლოო ჯამში, ყველა ფეხბურთელი თამაშობს გარკვეულ მატჩებს დისკომფორტით, ასეთ შეხვედრაში კი ყველაფერს აკეთებ საიმისოდ, რომ ითამაშო”.

მატჩის ანალიზი: პრესინგი, სივრცეები და გადამწყვეტი დეტალები

ჟერარ მარტინმა დეტალურად ისაუბრა იმ ტაქტიკურ თავისებურებებზე, რამაც თამაშის მიმდინარეობა განსაზღვრა:

“ძალიან მომთხოვნი შეხვედრა გამოვიდა. ორივე გუნდს საკუთარი მომენტები ჰქონდა, რადგან ორივე მაღალ პრესინგს მივმართავდით და პრესინგიდან გამოსვლისას როგორც ჩვენთვის, ისე მათთვის ბევრი სივრცე ჩნდებოდა. საბოლოოდ ყველაფერი დეტალებმა და მომენტების კარგად გამოყენებამ გადაწყვიტა. ის, რაც ცუდად გავაკეთეთ, აუცილებლად უნდა გამოვასწოროთ, თუმცა ახლა ოქტომბერია და მომატების დიდი რესურსი გვაქვს”.

მზადება ელ კლასიკოსთვის

დასასრულს, მცველმა ხაზი გაუსვა, რომ ეს შედეგი გუნდის მორალურ მდგომარეობას ვერ შეარყევს და მთელი ყურადღება “სპოტიფაი კამპ ნოუზე” გასამართ პრინციპულ ჯახზეა გადატანილი:

“ეს მარცხი ჩვენზე უარყოფითად არ იმოქმედებს, რადგან უმაღლეს დონეზე ვიბრძოლეთ და შესანიშნავი მატჩი ჩავატარეთ – თუ არ ჩავთვლით იმ დეტალებს, რომლებიც რამდენიმე გოლად დაგვიჯდა. თავაწეულები უნდა ვიყოთ. წინ, უქმეებზე ელ კლასიკო გველის და იქ მოსაგებად გავალთ”.