მანუელ პელეგრინი: ეს აუხსნელი და გაუმართლებელი გადაწყვეტილებებია

“ბარსელონასთან” განცდილი მარცხის შემდეგ (2-5), “რეალ ბეტისის” მთავარმა მწვრთნელმა მანუელ პელეგრინიმ პრესკონფერენციაზე ემოციები არ დამალა და მსაჯების მისამართით უმწვავესი განცხადებები გააკეთა. ჩილელმა სპეციალისტმა პირველივე პასუხში დეტალურად ჩამოთვალა ყველა სადავო ეპიზოდი, რომლებმაც, მისი აზრით, ანდალუსიური კლუბი პირდაპირ დააზარალა:

“ეს უსუსურობის განცდაა, ეჭვგარეშეა. ანგარიში 2-5 არ ასახავს იმას, რაც მოედანზე რეალურად ხდებოდა. მატჩის მსვლელობაზე გავლენა იქონია გაუგებარმა და აუხსნელმა გადაწყვეტილებებმა, რომლებმაც რიცხობრივ უმცირესობაში დაგვტოვა: აბსურდულად გაუქმებული გოლი, როდესაც ფეხბურთელს მცველი ეჯახება და 30 მეტრში შემთხვევითი ხელით თამაში ფიქსირდება, რასაც გოლზე არანაირი გავლენა არ ჰქონია; მეტოქის გოლის ეპიზოდში ფეხი თავში ჩაარტყეს და VAR-ს მომენტი არც კი გადაუმოწმებია; და გაძევება, სადაც ლამინ იამალის მხრიდან აშკარა პროვოკაცია იყო – მსაჯს ორივესთვის ყვითელი ბარათი უნდა ეჩვენებინა, მან კი ერთი გააძევა, მეორეს კი მხოლოდ გაფრთხილება მისცა. იყო ეპიზოდები, რომლებმაც მხოლოდ ჩვენ დაგვაზარალა”.

“სპექტაკლი 60 000 ადამიანის თვალწინ მოკლეს”

პელეგრინი ჯოვანი ლო სელსოს გაუქმებული გოლის მომენტს კიდევ ერთხელ დაუბრუნდა და მსაჯების სიმკაცრე გააკრიტიკა:

“იყო ბევრი ორთაბრძოლა და უამრავი ჯარიმა, მაგრამ მოედანზე ორი ისეთი გუნდი იდგა, რომელთაც ფეხბურთის თამაში უყვართ და მსგავსი კრიტერიუმის გამოყენების არანაირი საჭიროება არ არსებობდა. კუჩო ბურთის მკერდით მიღებას აპირებს, მცველი მას ხელს ჰკრავს და ბურთი ხელზე კარიდან 30 მეტრის დაშორებით ეხება – ამას კარში გასულ ბურთთან არანაირი კავშირი არ ჰქონდა და ეს ‘ბარსელონას’ მცველის ბიძგის შედეგი იყო. ასეთი გადაწყვეტილებები 60 000 გულშემატკივრის თვალწინ საფეხბურთო სპექტაკლს კლავს”.

11×11-ზე ბრძოლა და წითელი ბარათის ფაქტორი

ანდალუსიელთა დამრიგებელმა ხაზგასმით აღნიშნა, რომ ფაკუნდო ბერნალის გაძევებამდე მოედანზე სრულიად თანაბარი თამაში მიმდინარეობდა:

“მატჩის ბალანსი უპირველესად სწორედ გაძევებამ დაარღვია და საბოლოო ტაბლოზე ისეთი სხვაობა დააფიქსირა, როგორიც გუნდებს შორის არ ყოფილა. სანამ 11×11-ზე ვთამაშობდით, ‘ბარსელონას’ თანაბრად ვეპაექრებოდით. ასეთი გუნდის წინააღმდეგ თამაში მარტივი არ არის. მათ კაცნაკლულ მეტოქეს ბოლო გოლები სწორედ ამ უპირატესობის ხარჯზე გაუტანეს”.