ვინისიუსს ელ კლასიკოს გამოტოვება ემუქრება

“რეალ მადრიდს” ვინისიუს ჟუნიორთან დაკავშირებით სერიოზული პრობლემა შეექმნა. ეს პირველი შემთხვევა არ არის, თუმცა ბოლო ეპიზოდი “ვილიარეალთან” შეხვედრაში განსაკუთრებით ხმაურიანი გამოდგა: ბრაზილიელმა სალიბას წინააღმდეგ განხორციელებული აგრესიის გამო პირდაპირი წითელი ბარათი მიიღო, რასაც წინ მის მიერ გატანილი, თუმცა სწორედ ამ ინციდენტის გამო გაუქმებული გოლი უძღოდა.

ინციდენტი მეორე ტაიმში მოხდა. მიუხედავად ბრაზილიელის გაძევებისა, დიომანდეს გოლის წყალობით “რეალ მადრიდმა” უპირატესობა შეინარჩუნა. მთავარმა არბიტრმა დიას დე მერამ VAR-ზე მომენტის გადამოწმების შემდეგ წითელი ბარათი უყოყმანოდ ამოიღო, რადგან მეტოქისთვის თმაზე მოქაჩვა რეგლამენტით პირდაპირ აგრესიად კვალიფიცირდება. ვითარება კიდევ უფრო დაამძიმა იმან, რომ გაძევების შემდეგ ფეხბურთელი მსაჯისკენ აგრესიულად გაემართა და გადაწყვეტილებას მძაფრად აპროტესტებდა.

პრეცედენტები და რეგლამენტი

თუ წარსულ პრეცედენტებს გადავხედავთ, ვინისიუს ჟუნიორმა, დიდი ალბათობით, 25 ოქტომბერს “სპოტიფაი კამპ ნოუზე” გასამართი ელ კლასიკო გამოტოვებს.

ყველაზე ახალი მაგალითი 2026 წლის მაისში იოჰან მოხიკას შემთხვევაა. “მალიორკას” მაშინდელი ფეხბურთელი “ლევანტეს” წინააღმდეგ როჯერ ბრუგესთვის თმის მოქაჩვის გამო გააძევეს, ოქმში კი ჩაიწერა, რომ მან მეტოქეს თმებში მაშინ ჩაავლო, როდესაც ბურთი თამაშში არ იყო. სადისციპლინო კომიტეტმა მას ორმატჩიანი დისკვალიფიკაცია მიუსაჯა.

ანალოგიური სიტუაცია შეიქმნა ფერან ტორესის შემთხვევაშიც 2023 წლის იანვარში, “ატლეტიკოსთან” მატჩში. სტეფან სავიჩთან შეხლა-შემოხლისას თმებში მოქაჩვის გამო ფერანსაც ორმატჩიანი სასჯელი დაეკისრა, რადგან ოქმში აღინიშნა, რომ ინციდენტი ბურთის თამაშში ყოფნისას, თუმცა სათამაშო დისტანციის მიღმა მოხდა.

რაც შეეხება ერთმატჩიან სანქციას, ასეთი პრეცედენტი ჰქონდა დიეგო პერკანს (“კორდობა”, 2026 წლის მაისი), თუმცა იქ მეტოქისთვის თმაზე მოქაჩვა უშუალოდ ბურთისთვის ბრძოლის ეპიზოდში დაფიქსირდა.

დიას დე მერას ოქმი

საკვანძო დეტალი სწორედ ისაა, თუ რა ჩაწერა არბიტრმა მატჩის შემდგომ ოქმში: თუ მითითებულია, რომ ბურთი სათამაშო დისტანციის მიღმა იყო, დისკვალიფიკაცია ორმატჩიანი ხდება, რაც ავტომატურად ელ კლასიკოს გამოტოვებას ნიშნავს. დიას დე მერას ჩანაწერი კი ვინისიუსისთვის მეტად მძიმეა:

“73-ე წუთზე ფეხბურთელი დე ოლივეირა დო ნასიმენტო, ვინისიუს ჟოზე გაძევებულ იქნა შემდეგი მიზეზით: მეტოქისთვის თმებზე მოქაჩვა ბურთის თამაშში ყოფნისას, თუმცა მათ შორის სათამაშო ბრძოლის გარეშე”.

არბიტრი ოქმში გაძევების შემდგომ ეპიზოდსაც დეტალურად აღწერს:

“თამაშის შეჩერებისას, გაძევების შემდეგ და ჯერ კიდევ მოედანზე ყოფნის დროს, ის ხმამაღალი ყვირილით განაგრძობდა ჩემი გადაწყვეტილების პროტესტს. ის აგრესიული განწყობით გაემართა იმ ზონისკენ, სადაც ვიმყოფებოდი, რის გამოც საკუთარ თანაგუნდელებს მისი შეჩერება მოუწიათ”.

შესაბამისად, ოქმის ფორმულირებისა და მსაჯის მიმართ გამოხატული აგრესიის გათვალისწინებით, სადისციპლინო კომიტეტისგან ორმატჩიანი სასჯელის გამოტანა თითქმის გარდაუვალი ჩანს. ეს კი ნიშნავს, რომ “რეალ მადრიდი” “სპოტიფაი კამპ ნოუზე” თავისი ლიდერის გარეშე ჩამოვა.