ბარსელონა – რასინგი | მატჩისწინა მიმოხილვა

დღეს, 16 სექტემბერს, ლა ლიგის მე-6 ტურში “ბარსელონა” სანტანდერის “რასინგს” უმასპინძლებს. შეხვედრა “სპოტიფაი კამპ ნოუზე”, თბილისის დროით 23:30 საათზე დაიწყება. კატალონიელები ჩემპიონატში ქულების მაქსიმუმით ლიდერობენ, სტუმრები კი უმაღლეს დივიზიონში დაბრუნების შემდეგ პირველ საგარეო ქულებს ეძებენ.

ჰანსი ფლიკის გუნდს ისტორიული შედეგის დაფიქსირების შესაძლებლობა აქვს: სეზონის პირველი ექვსი ოფიციალური მატჩის მოგებით “ბარსელონამ” საკლუბო რეკორდი უკვე გაიმეორა. მსგავსი სტარტი გუნდს 1929/30, 1960/61 და 2018/19 წლების სეზონებშიც ჰქონდა, თუმცა ზედიზედ შვიდი გამარჯვებით სეზონი არასდროს დაუწყია.

სათამაშო ფორმა

“ბარსელონამ” ლა ლიგის ხუთივე შეხვედრა მოიგო, 21 გოლი გაიტანა და მხოლოდ ოთხი გაუშვა. ჩემპიონთა ლიგაში “ფეიენორდთან” მოპოვებული 5-1 გამარჯვების გათვალისწინებით, სეზონის ექვს ოფიციალურ მატჩში კატალონიელთა ბურთების სხვაობა 26-5-ს შეადგენს. ლა ლიგაში ლამინ იამალსა და რაფინიას უკვე ექვს-ექვსი გოლი აქვთ.

გასულ ტურში ფლიკის გუნდმა სტუმრად “ლევანტე” 4-2 დაამარცხა. ჩავი ესპარტის გოლისა და იამალის დუბლის წყალობით მოპოვებული სამბურთიანი უპირატესობა მასპინძლებმა მინიმუმამდე შეამცირეს, საბოლოო ანგარიში კი დამატებულ დროში კარიმ ადეიემიმ დააფიქსირა. ამ შეხვედრამ შედეგიან შეტევასთან ერთად ისიც აჩვენა, რომ “ბარსელონას” თამაშის მსვლელობაზე კონტროლის შენარჩუნება უკეთ შეუძლია.

სატურნირო თვალსაზრისით, დღევანდელი სამი ქულაც მნიშვნელოვანია. გუშინ “რეალ მადრიდმა” “ელჩე” 3-2 დაამარცხა და “ბარსელონას” ქულებით გაუთანაბრდა. ორივე გუნდს 15 ქულა აქვს, თუმცა კატალონიელებს ერთი შეხვედრით ნაკლები აქვთ ჩატარებული და გამარჯვებით სამქულიანი უპირატესობის აღდგენას შეძლებენ.

უმაღლეს დივიზიონში 14-წლიანი პაუზის შემდეგ დაბრუნებული “რასინგი” ხუთი ტურის შემდეგ შვიდი ქულით მე-10 ადგილზეა. ხოსე ალბერტო ლოპესის გუნდმა ყველა ქულა შინ მოიპოვა: “ვილიარეალს” 2-2 დაუზავდა, “ელჩე” 3-2 დაამარცხა, ბოლო ტურში კი “ალავესს” 2-1 მოუგო. სტუმრად სანტანდერელები ჯერ “ხეტაფესთან” 0-1 დამარცხდნენ, შემდეგ კი “რაიო ვალიეკანოსთან” 2-3 წააგეს. გუნდს ცხრა გოლი აქვს გატანილი და ამდენივე გაშვებული.

სტუმართა მთავარი საგოლე იმედი იასირ ზაბირია. მაროკოელმა თავდამსხმელმა პირველ ხუთ ტურში ხუთჯერ გაიტანა, მათ შორის “ალავესთან” დუბლი შეასრულა და გუნდს შეხვედრის შემოტრიალებაში დაეხმარა. “რასინგს” შეტევაში მეტოქისთვის პრობლემების შექმნა შეუძლია, თუმცა მიმდინარე ჩემპიონატში კარი მშრალად ჯერ არ შეუნახავს.

ქართველი გულშემატკივრისთვის შეხვედრას გიორგი გულიაშვილის ფაქტორიც ემატება. “რასინგის” 25 წლის შემტევს მიმდინარე ლა ლიგაში ორი მატჩი და 36 სათამაშო წუთი აქვს დაგროვებული. გოლი და საგოლე გადაცემა ჯერჯერობით არ დაუფიქსირებია. გამოცემების სავარაუდო ძირითად შემადგენლობებში გულიაშვილი არ სახელდება.

დანაკლისი

“ბარსელონას” კვლავ ფრენკი დე იონგი და რუნი ბარდჯი აკლია. ორივე ფეხბურთელი მუხლის ტრავმის გამო ვერ ითამაშებს. ჟერარ მარტინი, რომელმაც “ლევანტესთან” სახის დაზიანება მიიღო და შესვენებაზე შეიცვალა, ხელმისაწვდომია. შესაბამისად, დაცვის ცენტრში მისი ან ანდრეას კრისტენსენის არჩევა ფლიკის გადაწყვეტილებაზე იქნება დამოკიდებული.

“რასინგს” სამი ფეხბურთელი ვერ დაეხმარება: სიმონ ერიქსონს მხრის პრობლემა აქვს, ანდრეს მარტინი მუხლის ტრავმას მკურნალობს, ანდრე ალმეიდა კი “ალავესთან” მიღებული წითელი ბარათის გამო დისკვალიფიცირებულია.

ურთიერთშეხვედრები

ოფიციალურ ტურნირებზე გუნდები ერთმანეთს 101-ჯერ დაუპირისპირდნენ. “ბარსელონამ” 63 მატჩი მოიგო, 21 ფრედ დასრულდა, ხოლო 17 შეხვედრაში “რასინგმა” იმარჯვა. ბურთების სხვაობა კატალონიელთა სასარგებლოდ 242-103-ია.

ლა ლიგაში ჩატარებული 88 შეხვედრიდან “ბარსელონამ” 53 მოიგო, 20 ფრედ დაასრულა და 15 წააგო, ბურთების სხვაობით 201-90.

ბარსელონაში გამართულ 50 ოფიციალურ მატჩში მასპინძლებს 43 გამარჯვება, ხუთი ფრე და მხოლოდ ორი მარცხი აქვთ. ბურთების სხვაობა 162-32-ია. უშუალოდ ჩემპიონატში შინ ჩატარებული 44 შეხვედრის ბალანსი ასეთია: 37 გამარჯვება, ხუთი ფრე და ორი მარცხი.

ბოლო რვა დაპირისპირება “ბარსელონამ” მოიგო, ბოლო ექვსში კი გოლიც არ გაუშვია. გუნდები ბოლოს 2026 წლის 15 იანვარს, ესპანეთის თასზე შეხვდნენ ერთმანეთს: კატალონიელებმა სტუმრად 2-0 გაიმარჯვეს. “რასინგს” ამ მეტოქისთვის 2004 წლის იანვრის შემდეგ არ მოუგია, ბარსელონაში მისი ბოლო გამარჯვება კი 1983 წლით თარიღდება.

მსაჯი

შეხვედრას 43 წლის ხოსე ლუის მუნუერა მონტერო განსჯის, ვიდეორეფერი კი კარლოს დელ სერო გრანდე იქნება. ანდალუსიელი არბიტრი ლა ლიგაში 2016 წლიდან მუშაობს. მიმდინარე ჩემპიონატში მისთვის ეს მესამე შეხვედრა იქნება.

კარიერის ჯამური სტატისტიკით, მონტერო მატჩში საშუალოდ 4,62 ყვითელ ბარათს აჩვენებს, ფეხბურთელს მოედნიდან 0,32-ჯერ აძევებს და 0,27 პენალტს ნიშნავს.

ლა ლიგის 193 შეხვედრაში, რომელსაც ის უძღვებოდა, მასპინძლებმა 81-ჯერ გაიმარჯვეს, სტუმრებმა კი 70-ჯერ. ეს, შესაბამისად, მატჩების 41,97% და 36,27%-ია; დარჩენილი 42 შეხვედრა ფრედ დასრულდა.

მონტეროს მსაჯობით “ბარსელონას” 35 მატჩი აქვს ჩატარებული: 26 გამარჯვება, სამი ფრე და ექვსი მარცხი. გამარჯვებებში შედის 2021 წელს “რეალ სოსიედადთან” პენალტების სერიაში მოგებული შეხვედრაც. ამ მატჩებში მან კატალონიელებს 68 ყვითელი და სამი წითელი ბარათი უჩვენა, მათ სასარგებლოდ ოთხი პენალტი დანიშნა, მათ წინააღმდეგ კი ხუთი.

“რასინგის” მონაწილეობით მონტერომ ორი შეხვედრა განსაჯა: სანტანდერელებმა “ოსასუნას” 2-0 მოუგეს და “ბილბაოსთან” 1-2 წააგეს. ამ ორ მატჩში “რასინგის” ფეხბურთელებმა ექვსი ყვითელი ბარათი მიიღეს; გაძევება და პენალტი არ დაფიქსირებულა.

მწვრთნელები მატჩის წინ

ჰანსი ფლიკი: “რეკორდების დამყარება კი არა, მატჩების მოგება მინდა.”

გერმანელი სპეციალისტის განცხადებით, გუნდის ყურადღება მომდევნო შეხვედრაზეა მიმართული. მან განსაკუთრებით გამოყო “რასინგის” უნარი, შეუტიოს თავისუფალ სივრცეებს და იბრძოლოს მეორე ბურთისთვის. ფლიკი იოლ მატჩს არ ელოდება და ფეხბურთელებისგან სრულ კონცენტრაციას ითხოვს. ჰანსი ფლიკის კომენტარი.

ხოსე ალბერტო ლოპესი: “შევეცდებით, თამამად ვითამაშოთ და საკუთარი სახე შევინარჩუნოთ.”

“რასინგის” მწვრთნელი აცნობიერებს, რომ მის გუნდს რთული მონაკვეთების გადატანა მოუწევს, თუმცა შეტევაზე უარის თქმას არ აპირებს. მისი შეფასებით, “ბარსელონა” მეტოქეს როგორც შემტევი შესაძლებლობებით, ისე ბურთის დაკარგვის შემდეგ ინტენსიური პრესინგით უქმნის პრობლემებს. ხოსე ალბერტოს კომენტარი.

სავარაუდო შემადგენლობები

გამოცემები ფლიკისგან როტაციას ელიან. მთავარი განსხვავებები დაცვის ხაზს, დანი ოლმოსა და ფერმინ ლოპესის არჩევანს, ასევე შეტევაში ენტონი გორდონისა და კარიმ ადეიემის გამოყენებას ეხება.

SPORT

• ბარსელონა: ჟოან გარსია – კუნდე, კუბარსი, კრისტენსენი, კანსელუ – პედრი, როდრი, ოლმო – იამალი, რაფინია, გორდონი.
• რასინგი: აგირესაბალა – მანტილია, პაბლო რამონი, ბელოსიანი, სალინასი – პრატი, მაგეტ გეი, კანალესი – ინიგო ვისენტე, ზაბირი, ივან მარტინი.

Mundo Deportivo

• ბარსელონა: ჟოან გარსია – ერიკ გარსია, კუბარსი, კრისტენსენი, ესპარტი – პედრი, როდრი, ფერმინი – იამალი, რაფინია, გორდონი.
• რასინგი: აგირესაბალა – მანტილია, პაბლო რამონი, ბელოსიანი, სალინასი – ივან მარტინი, პრატი – პაბლო გარსია, კანალესი, ინიგო ვისენტე – ზაბირი.

AS

• ბარსელონა: ჟოან გარსია – კუნდე, კუბარსი, ჟერარ მარტინი, კანსელუ – როდრი, პედრი – იამალი, ოლმო, ადეიემი – რაფინია.
• რასინგი: აგირესაბალა – მანუ ერნანდო, პედრო ფელიპე, ფაკუნდო გონსალესი, სალინასი – ივან მარტინი, ინიგო საინს-მასა – იკერ ლუკე, მაგეტ გეი, ინიგო ვისენტე – ზაბირი.

MARCA

• ბარსელონა: ჟოან გარსია – კუნდე, კუბარსი, კრისტენსენი, კანსელუ – როდრი, პედრი – იამალი, ოლმო, ადეიემი – რაფინია.
• რასინგი: აგირესაბალა – მანტილია, პაბლო რამონი, ბელოსიანი, სალინასი – პრატი, ივან მარტინი – პაბლო გარსია, კანალესი, ინიგო ვისენტე – ზაბირი.

პროგნოზი

“ბარსელონას” სასარგებლოდ სათამაშო ფორმა, შეტევის შედეგიანობა და საშინაო მოედანი მეტყველებს. “რასინგის” შანსი ბურთის მოპოვების შემდეგ სწრაფ შეტევებსა და ზაბირისთვის სივრცის შექმნაზე იქნება დამოკიდებული. კატალონიელებისთვის მნიშვნელოვანი იქნება, რომ უპირატესობის მოპოვების შემდეგაც შეინარჩუნონ ინტენსივობა.

გამოცემების ანგარიშის პროგნოზები:

• WhoScored: 3-0
• Sports Mole: ბარსელონა 3-1 რასინგი.
• Sportskeeda: ბარსელონა 3-1 რასინგი.
• GOAL: ბარსელონა 3-1 რასინგი.
• Sports Illustrated: ბარსელონა 2-0 რასინგი.