თბილისის შემდეგ სტამბოლი – ბარსელონა შემოსავლებს რეკორდულად ზრდის

თუ პანდემიის დამანგრეველი ეფექტების ფონზე BLM “ბარსელონას” მთავარ საგანძურს წარმოადგენდა, ახლა ეს ორგანიზაცია კიდევ უფრო მნიშვნელოვანია. 2024 წლის 9 ნოემბერს Nike-თან კონტრაქტი 2038 წლამდე გახანგრძლივდა (რაც კლუბს ჯამში 1.7 მილიარდს, ანუ წლიურად საშუალოდ 127 მილიონ ევროს მოუტანს).

ყველაზე დიდი გამარჯვება გლობალური ელექტრონული კომერციის (e-commerce) დაბრუნება იყო. აქამდე “ბარსელონას”, BLM-ის მეშვეობით, არ შეეძლო უცხოეთში მაღაზიების გახსნა Nike-ის მარაგების გამოყენებით და ევროპის მიღმა ონლაინ გაყიდვების წარმოება. ამ ისტორიული ბარიერის მოხსნამ BLM-ის (რომელიც კლუბმა 2018 წლის პირველ ივლისს დააარსა) შემოსავლები მკვეთრად გაზარდა.

თუ 2023-24 წლების სეზონში შემოსავალი 107.27 მილიონი ევრო იყო, 2024-25 წლებში (ახალი კონტრაქტის ამოქმედებიდან 8 თვეში) ის 169.94 მილიონამდე გაიზარდა, ხოლო 2025-26 სეზონში 200 მილიონს გადააჭარბა. ზუსტი ციფრები 30 ივნისის აუდიტის დასრულების შემდეგ გახდება ცნობილი. ეს ნიშნავს, რომ შემოსავლები მხოლოდ ორ წელიწადში თითქმის გაორმაგდა. ზრდის კიდევ უფრო დიდი პოტენციალი არსებობს მაშინ, როცა “სპოტიფაი კამპ ნოუ” სრული დატვირთვით (104,600 მაყურებლით) ამოქმედდება.

ახალი მაღაზია “სპოტიფაი კამპ ნოუზე” 2027 წელს

მაგალითისთვის, აპრილში მთავარმა მაღაზიამ უკვე მოხსნა წინა სეზონის გაყიდვების რეკორდი, რაშიც მონჟუიკის სტადიონის დატოვებამაც დიდი როლი ითამაშა. სტადიონის ახალი მაღაზია მოედანზე 2027 წლის გაზაფხულში გაიხსნება და მას ლუვრის მსგავსი შუშის კონსტრუქცია ექნება, საიდანაც გულშემატკივრები “ბარსელონას” პროდუქციის უსასრულო სამყაროში შეაბიჯებენ.

აშშ, საერთაშორისო ბაზარი და ახალი მაღაზია სტამბოლში

ონლაინ ვაჭრობა კლუბისთვის ნამდვილ ოქროს საბადოდ იქცა. ესპანეთთან ერთად, “ბარსელონასთვის” ყველაზე შემოსავლიანი ბაზარი აშშ არის, რომელიც ბევრად უსწრებს ისეთ ევროპულ ქვეყნებს, როგორიცაა ნიდერლანდები, პოლონეთი (რობერტ ლევანდოვსკის ფაქტორის გამო), ინგლისი, საფრანგეთი და გერმანია. აზიურ ბაზარზე, კერძოდ ჩინეთში, We Chat-ის დომინირება პირდაპირ ვებგვერდიდან გაყიდვებს ართულებს.

მიუხედავად იმისა, რომ პსჟ-მ 2022 წელს ნიუ-იორკში მაღაზია გახსნა, “ბარსელონა” მსგავს ნაბიჯს არ გეგმავს, რადგან უპირატესობას არა მხოლოდ ბრენდის წარმოჩენას, არამედ პირდაპირ რენტაბელურობას ანიჭებს.

უეფას 2025 წლის ფინანსური ანგარიშის მიხედვით, “ბარსელონა” მაისურებისა და მერჩენდაიზინგის გაყიდვებით 277 მილიონი ევროთი მსოფლიოში პირველ ადგილზეა და “რეალ მადრიდს” (231 მილიონი) უსწრებს. პსჟ ამ რეიტინგში 88 მილიონით მხოლოდ მე-10 პოზიციაზეა.

2025 წლის მარტში საქართველოს დედაქალაქ თბილისში “ბარსელონას” პირველი ოფიციალური მაღაზია გაიხსნა ესპანეთს ფარგლებს მიღმა. შემდეგი გაჩერება თურქეთია – “ბარსელონა” საზღვარგარეთ თავის მეორე მაღაზიას სტამბოლის გიგანტურ აეროპორტში გახსნის. ეს არის ევროპისა და აზიის დამაკავშირებელი ჰაბი, რომელიც მგზავრთა ნაკადით მსოფლიოში მერვეა. ასევე გაიხსნება ლიცენზირებული მაღაზია ტენერიფეში, რითაც ლიცენზირებული მაღაზიების რაოდენობა 12-მდე გაიზრდება, ხოლო პირდაპირი მართვის ქვეშ 15 მაღაზია რჩება.

ლამინ იამალი და ლა ლიგის კლუბებზე მეტი შემოსავალი

გულშემატკივრებში ყველაზე დიდი მოთხოვნით ახალი 10 ნომრის, ლამინ იამალის მაისური სარგებლობს, თუმცა პედრის, გავისა და რაფინიას ფორმებიც აქტიურად იყიდება. 2021 წელს ლეო მესის წასვლის მიუხედავად, კლუბი ყოველწლიურად უფრო მეტ მაისურს ყიდის, ვიდრე წინა წლებში. ქალთა ფეხბურთში უპირობო ლიდერი აიტანა ბონმატია.

ამ წარმატების ფონზე, კლუბში აღარავინ ფიქრობს BLM-ის 49%-ის გაყიდვაზე (ე.წ. “ბერკეტის” გააქტიურებაზე), მიუხედავად იმისა, რომ ასამბლეამ ეს გადაწყვეტილება ჯერ კიდევ 2022 წელს დაამტკიცა. გასულ სეზონში 200 მილიონზე მეტი შემოსავალი მხოლოდ თავად “ბარსელონამ”, “რეალ მადრიდმა”, “ატლეტიკომ”, “რეალ სოსიედადმა” და “ბეტისმა” გამოიმუშავეს. შესაბამისად, მარტო BLM ლა ლიგის 15 კლუბზე მეტ თანხას აგენერირებს.