ომი ბარსელონასა და ატლეტიკოს შორის: ხულიან ალვარესი წასვლას ითხოვს

ხულიან ალვარესის სატრანსფერო საგა კულმინაციას აღწევს. არგენტინელმა ფეხბურთელმა საჯაროდ დაადასტურა, რომ მადრიდის “ატლეტიკოს” დატოვება სურს და ცნობილია ისი, რომ მას კარიერის გაგრძელება “ბარსელონაში” ურჩევნია. ამის საპასუხოდ, მადრიდულმა კლუბმა კატეგორიული უარი განაცხადა ტრანსფერზე და კატალონიელების წინააღმდეგ მკაცრი ზომების მიღებას გეგმავს.

ალვარესის პოზიცია და დარღვეული პირობა

გასულ უქმეებზე არგენტინელმა ფორვარდმა კლუბს ოფიციალურად აცნობა, რომ ერთადერთი ვარიანტი, რომელსაც განიხილავს, გუნდიდან წასვლაა.

“ჩემთვის საუკეთესო ვარიანტი ტრანსფერია, მინდა ჩემი ოცნება ავიხდინო”, – ღიად განაცხადა ალვარესმა რამდენიმე საათის წინ.

ირკვევა, რომ ჯერ კიდევ თებერვალში, “ატლეტიკომ” ფეხბურთელს პირობა მისცა: თუ “ბარსელონა” 90-100 მილიონი ევროს ფარგლებში ოფიციალურ წინადადებას გააკეთებდა, მას გაუშვებდნენ. რამდენიმე კვირის წინ მადრიდელებმა 100-მილიონიანი შეთავაზება მართლაც მიიღეს, თუმცა ის დაბლოკეს. მაისის ბოლოს ალვარესმა კლუბის ერთ-ერთ ხელმძღვანელს პირდაპირ უთხრა: “წასვლა მინდა, “ბარსელონა” მინდა”.

“ატლეტიკოს” უკმაყოფილება და მუქარა ფიფათი

მადრიდელების პოზიცია რადიკალურია. კლუბის შიგნით აცხადებენ, რომ ურჩევნიათ ალვარესი უთამაშებელი დატოვონ, ვიდრე “ბარსელონას” მიჰყიდონ. Diario AS-თან საუბარში მათ განაცხადეს:

არ არსებობს თანხა, რომლითაც “ბარსელონა” ხულიანის ყიდვას შეძლებს. ის “ბარსელონაში” არ გადავა. ან იხდიან 500-მილიონიან გამოსასყიდ თანხას, ან გარიგება არ შედგება.

“ატლეტიკო” “ბარსელონას” “ბინძურ თამაშში” ადანაშაულებს და არაოფიციალურად ადასტურებს, რომ კატალონიელების წინააღმდეგ ფიფაში ჩივილს აპირებს კონტრაქტის მქონე მოთამაშესთან მოლაპარაკებების გამო. მადრიდელებმა ნეგრეირასა და ანტუან გრიზმანის საქმეებიც გაიხსენეს:

ყველამ იცის, რომ ეს თაღლითი კლუბია. მაგრამ ამჯერად ისინი წააწყდნენ კლუბს, რომელიც ამაზე თვალს არ დახუჭავს. ჩვენ უკვე ვნახეთ, როგორ მოქმედებს “ბარსელონა” წარსულში, მაგალითად, როდესაც “ატლეტიკო” “იუვენტუსთან” ჩემპიონთა ლიგის მატჩისთვის ემზადებოდა, ისინი კი გრიზმანის დას, ოჯახსა და თავად ფეხბურთელს საკომისიოებს ჰპირდებოდნენ.

“არსენალის” ფაქტორი და “ბარსელონას” გეგმები

იმისათვის, რომ ალვარესის “ბარსელონაში” ტრანსფერი გამოირიცხოს, “ატლეტიკო” ლონდონის “არსენალთან” დაკავშირებას გეგმავს. მათი მიზანია, არგენტინელი 50-60 მილიონ ევროდ და ვიქტორ გიოკერესის სანაცვლოდ გაცვალონ.

პარალელურად, ჰანსი ფლიკს არგენტინელის დამატება ძალიან სურს. ალვარესის ტრანსფერს მიესალმებიან ფეხბურთელებიც – გავიმ და ფერმინ ლოპესმა სოციალურ ქსელში ის პოსტები მოიწონეს, სადაც ხულიანი “ატლეტიკოდან” წასვლის სურვილს გამოხატავდა.

მნიშვნელოვანია, რომ 1 ივლისიდან “ბარსელონა” 1:1-ზე ფინანსურ წესს უბრუნდება, რაც მათ მოთამაშეების ნორმალურად დარეგისტრირების საშუალებას მისცემს. ვრცელდება ინფორმაცია, რომ უახლოეს მომავალში კატალონიელები ხულიან ალვარესის სანაცვლოდ ახალ, 120-130 მილიონი ევროს ღირებულების წინადადებას გააკეთებენ.