ჰანსი ფლიკის რეკორდები ბარსელონაში

ჰანსი ფლიკმა “ბარსელონასთან” კონტრაქტი 2028 წლამდე გაახანგრძლივა. ეს სიახლე მას შემდეგ გახდა ცნობილი, რაც მან “ბარსას” 29-ე საჩემპიონო ტიტული გაუფორმა და “სპოტიფაი კამპ ნოუზე” სრულყოფილი საშინაო სეზონი ჩაატარა, სადაც გუნდმა შესაძლო 57 ქულიდან ყველა მოიპოვა.

თუმცა, ფლიკის ორწლიანმა მუშაობამ კლუბს უკვე ბევრად მეტი მოუტანა, ვიდრე უბრალოდ ტიტულებია. “ბარსას” სათადარიგო სკამზე გატარებულმა პერიოდმა არაერთი რეკორდი და მიღწევა შვა, რამაც იგი უკვე დააყენა კლუბის ისტორიაში საუკეთესო მწვრთნელების გვერდით. მათ შორის, იგი შეუერთდა იმ მწვრთნელთა ვიწრო წრეს, რომლებმაც ლა ლიგა თავიანთ პირველ ორ სეზონში ორჯერ მოიგეს.

მეორე საუკეთესო გამარჯვებების პროცენტი

ფლიკის სტილმა პირველივე დღეებიდანვე მოიგო ფეხბურთელების გული. გერმანელმა გუნდს 116 მატჩში უხელმძღვანელა, სადაც 88 გამარჯვება, 10 ფრე და მხოლოდ 18 მარცხი ჩაიწერა ანგარიშზე. მისი გამარჯვებების 75.9%-იანი მაჩვენებელი მეორეა კლუბის ისტორიაში და მას მხოლოდ ლუის ენრიკე უსწრებს, რომელმაც 181 მატჩში 76.2%-იანი მაჩვენებელი დააფიქსირა.

გოლები, გოლები და კიდევ მეტი გოლი

ეს ციფრები თითქმის მყისიერადვე აისახა რეალობაში. ფლიკის ხელმძღვანელობით “ბარსამ” გაიმეორა კლუბის ისტორიაში ლა ლიგის საუკეთესო სტარტის მეორე შედეგი, როდესაც ზედიზედ პირველი შვიდი მატჩი მოიგო. 2024/25 წლების სეზონი საბოლოოდ 175 გატანილი გოლით დასრულდა, რაც კლუბის ისტორიაში მესამე ყველაზე შედეგიანი სეზონია.

ფლიკის ხელში გუნდმა ლა ლიგის ზედიზედ 55 მატჩში მოახერხა გოლის გატანა, რაც ესპანეთის ჩემპიონატის ისტორიაში მეორე ყველაზე გრძელი საგოლე სერიაა, რომელიც გასულ კვირას “ალავესთან” 1-0 მარცხით დასრულდა.

დაუმარცხებელი სახლში

ჰანსი ფლიკმა “სპოტიფაი კამპ ნოუ” ნამდვილ ციხესიმაგრედ აქცია. გერმანელი მხოლოდ მესამე მწვრთნელია “ბარსას” ისტორიაში, ვინც ლა ლიგაში სრულყოფილი საშინაო სეზონი ჩაატარა. მასზე ადრე ამ მიღწევას მხოლოდ ენრიკე ფერნანდესმა (14-გუნდიან ჩემპიონატში) და ელენიო ერერამ (ორჯერ, 16-გუნდიან ჩემპიონატში) მიაღწიეს, თუმცა ორივე შემთხვევაში ეს იყო უფრო მოკლე სეზონები, ნაკლები მატჩების რაოდენობით. სწორედ ამიტომ, ფლიკის 19 საშინაო გამარჯვება ოქროს ასოებით შევა ისტორიის წიგნებში.

დომინაცია “რეალ მადრიდზე”

ფლიკის პერიოდში “ბარსამ” აშკარა უპირატესობა მოიპოვა “რეალ მადრიდზე”. ჩატარებული შვიდი კლასიკოდან მან ექვსი მოიგო და მხოლოდ ერთში დამარცხდა, რაც გამარჯვებების საოცარ 85.7%-იან მაჩვენებელს იძლევა.

ამ გამარჯვებებიდან სამი ფინალში დაფიქსირდა. მან არა მხოლოდ მოიგო სამივე შესაძლო ტიტული (ორი ესპანეთის სუპერ თასი და ერთი კოპა დელ რეი), არამედ ეს გუნდის მარადიულ მეტოქესთან დაპირისპირებაში გააკეთა. “ბარსას” ბოლო საჩემპიონო ტიტულიც მათემატიკურად სწორედ “რეალ მადრიდთან” მატჩში განაღდა, რაც უპრეცედენტო მოვლენაა კლუბის ისტორიაში.

ადგილობრივი გმირები

ჰანსი ფლიკი ასევე გამოირჩევა “ბარსას” ახალგაზრდული სისტემისადმი დიდი ნდობით. მისი მუშაობის პერიოდში “ლა მასიას” ცამეტმა ფეხბურთელმა შეძლო პირველ გუნდში დებიუტის აღნიშვნა: მარკ ბერნალმა, ჟერარ მარტინმა, პაუ ვიქტორმა, სერჟი დომინგესმა, ანდრეს კუენკამ, ტონი ფერნანდესმა, დანი როდრიგესმა, ჟოფრე ტორენტსმა, დრომ, ტომი მარკესმა, ჩავი ესპარტმა და, სულ ახლახან, ალვარო კორტესმა. არ უნდა დაგვავიწყდეს დანი ოლმოც, რომლის დებიუტიც ფლიკის ხელში შედგა მას შემდეგ, რაც იგი “ლა მასიას” დატოვებიდან რამდენიმე წლის შემდეგ კლუბში დაბრუნდა.