მატჩისშემდგომი მიმოხილვა – მაშველი რგოლი ალავესს

ვერ გამოდგა 100 ქულით ჩემპიონატის დახურვა კარგი სამოტივაციო. თავის მოტყუებას ჰგავს. აბა ვის რად უნდა ამდენი ქულა? რას ცვლის? სარეკორდო იქნებოდა? არა. წარსულში ბარსას და “მადრიდს” გაუხერხებიათ ეს ამბავი და ეგეც იმიტომ, რომ ერთმანეთის მდევრები იყვნენ. როცა არავინ მოგსდევს და უკვე ჩემპიონი ხარ, დიდად აღარ იკლავ თავს. ეგ კი არა, ისიც გვახსოვს, ბარსას შანსი ჰქონდა ჩემპიონატი წაუგებლად ჩაემთავრებინა და ვალვერდემ ეგ შანსიც ვერ შეირგო, მესიმ არ ითამაშა და ბარსა დამარცხდა.

სამაგიეროდ “ალავესს” ჰქონდა დიდი მოტივაცია, დასარჩენია გუნდი ლა ლიგაში, გაცხოველებული ბრძოლა მიდის თითოეული ქულისთვის და “ალავესმა” ბარსასთან სამი ქულა აიღო, ეს შესაძლოა გადამწყვეტი ქულებიც იყოს ლა ლიგაში დასარჩენად.

ბარსას ფეხბურთელებს კი სულ სხვა მოტივაცია აქვთ, მთავარია ჯანმრთელად იყვნენ და დასვენება მოასწრონ, რადგან მსოფლიო ჩემპიონატამდე სულ ცოტა დრო რჩება, ეგ კიდევ ამ დამქანცველი სეზონის მერე კიდევ უფრო მეტად დამღლელი იქნება. რა თქმა უნდა, კომფორტს შეუქმნიან ფეხბურთელებს, მაგრამ მანძილს ვერავინ შეამოკლებს, დიდი გზაა ამერიკამდე და მერე მატჩიდან მატჩამდეც დიდი მანძილი ექნებათ გასავლელი. ამას დაუმატეთ დაანონსებული ჯოჯოხეთური სიცხე და ჰმ… არ იქნება მარტივი სათამაშო და ალბათ არც საცქერად ივარგებს.

ბარსამ ძალდატანებით ითამაშა და “ალავესთან” დამარცხდა. მომწონდა ეს გუნდი ყოველთვის, ჯერ ერთი იმიტომ, რომ მათი ფორმა “ბოკას” ფორმას წააგავს და აქვს ამას თავისი ხიბლი, მერე კიდევ ის ზღაპრული ფინალი მახსოვს “ლივერპულთან”, სადაც ბარსას ყოფილებმა შეყარეს გოლები – ხავი მორენომ და ჟორდი კრუიფმა.

ფლიკმა კორტესი აქო

ტანმაღალი მცველი ძალიან ცნობილი გვარით. ალვარო კორტესმა 90 წუთი ითამაშა “ალავესთან”. ცუდი არ იყო. არც რაიმე განსაკუთრებული გვინახავს, ფლიკმა კიდევ მაგრად შეაგულიანა. ქებად დაიღვარა და ჩვენც გვაგრძნობინა, რომ მომავალ სეზონში ამ ბიჭს მეტი დრო ექნება. ცენტრალურ ზონაში ხომ ვერ არის საქმე დიდად კარგად და აი გასაღებიც –  ალვარო კორტესი ცაციაა!! ვაშა! სათამაშო სტილით უფრო კუბარსისკენ იხრება, ვიდრე არაუხოსკენ. რბილი შეხება აქვს ბურთთან და მოკლე პასიც კარგად გამოსდის. თამაში “სარაგოსაში” დაიწყო, ბარსამ მალევე შეამჩნია და ლა მასიაში გადმოიყვანეს. ფლიკს თუ დავუჯერებთ სწრაფად პროგრესირებდა და ახლა თავისი შანსიც მიიღო. ვნახოთ რას იზამს, კარგი მასალაა ვარსკვლავობისთვის.

ითამაშეს ბერნალმა და კასადომ. ამ სეზონში კასადო თითქმის არ ჩანდა, ბერნალს კი ჰქონდა გაელვებები, მაგრამ უნდა ითქვას, რომ მათგან მაინც უფრო მეტს ველოდი. სეზონის საერთო შეჯამებას კი თვის ბოლოსკენ გადავდებ, როცა ლა ლიგაც დასრულდება.

ტაიმის ბოლოს დიაბეტმა, დიაბიტემ, თუ დიაბატემ ანგარიში გახსნა და ერთადერთი გოლი გამოდგა.

წინ რა გველის

წინ გველის კიდევ ორი მოსაწყენი და არაფრის მომცემი მატჩი – “ბეტისთან” 17 მაისს, და “ვალენსიასთან” 23 მაისს.