As: დიდი ალბათობით, ანსუ ფატი ოპერაციის გაკეთებას გადაწყვეტს

“ბარსელონას” 18 წლის თავდამსხმელი, ანსუ ფატი, სავარაუდოდ, გუნდს, მინიმუმ, 3 თვით გამოაკლდება.

მას გუშინ, “ბეტისთან” შეხვედრაში, აისა მანდის უხეში თამაშის შედეგად, მარცხენა ფეხზე მუხლის მენისკი აქვს გაწყვეტილი. დღეს, ფეხბურთელი ექიმმა, რამონ კუგატმა, მოინახულა, რომელიც, როგორც ჩანს, მისი მკურნალობის პროცესს უხელმძღვანელებს.

დაზიანების მკურნალობის ორი გზა არსებობს: ოპერაციით და ოპერაციის გარეშე. ოპერაციის გარეშე მკურნალობის შემთხვევაში, ფატი მოედანზე რამდენიმე კვირაში დაბრუნდება, თუმცა ტრავმის რეციდივის ალბათობა, შედარებით, მაღალი იქნება. ოპერაციის დროს კი, ანსუ, მინიმუმ, 3 თვეს გამოტოვებს. მადრიდული გამოცემა წერს, რომ ტრავმიდან გამომდინარე, ოპერაცის, ფაქტობრივად, აუცილებელია და, შესაბამისად, ანსუ ოპერაციის გზით გამოჯანმრთელებას აირჩევს.

ტრავმის გამო, მან სევილიურ კლუბთან შეხვედრაში მონაწილეობა მხოლოდ პირველ ნახევარში მიიღო. შემდეგ, მის ნაცვლად, მოედანზე ლეო მესი გამოვიდა.

აღსანიშნავია, რომ ფატის ექიმმა, რამონ კუგატმა, გასულ წელს, ცხინვალის ოკუპირებულ რეგიონში გატაცებულ ქართველ ექიმს, ვაჟა გაფრინდაშვილს, თანადგომა საჯაროდ გამოუცხადა.