“ბარსელონას” ექიმის მხარდაჭერა ვაჟა გაფრინდაშვილს

როგორც იცით, გამოჩენილი ქართველი ექიმი, ვაჟა გაფრინდაშვილი, თითქმის ერთი კვირაა, ოკუპირებული ცხინვალის რეგიონში, უკანონო პატიმრობაში იმყოფება.

ოკუპირებულ ტერიტორიაზე მომხდარ მორიგ უკანონო შემთხვევას არაერთი ადგილობრივი თუ საერთაშორისო ორგანიზაცია გამოეხმაურა. მათ შორისაა საფეხბურთო კლუბი “ბარსელონაც”. ფეისბუქ გვერდ “თავისუფლება ვაჟა ექიმს • Freedom for Doctor Vaja“-მა კატალონიური კლუბის ექიმის, რამონ კუგატის წერილი გაავრცელა. გადამოწმების შემდეგ კი გაირკვა, რომ ეს წერილი ნამდვილია.

გთავაზობთ წერილის თარგმანს:

“ბარსელონა, 15 ნოემბერი, 2019 წელი.

ექიმი ვაჟა გაფრინდაშვილის გათავისუფლების მოთხოვნა.

მათ, ვისაც ეს საკითხი ეხება:

ქვემოთხსენებულს ჩვენ ვწერთ ჩვენი მეგობრისა და კოლეგის, ექიმი ვაჟა გაფრინდაშვილის სახელით.

ჩვენ მას ვიცნობთ იმ დროიდან, როდესაც ის ბარსელონაში ერთწლიანი პროგრამით იმყოფებოდა. ჩვენ მას ვიცნობთ, როგორც კეთილ, გულისხმიერ, პატიოსან ექიმს, რომლის სურვილიც, დაეხმაროს ადამიანებს, არის იმხელა, რომ ის ჩვენს სიმპათიასა და პატივისცემას იმსახურებს.

როგორც ჩვენთვის ცნობილია, ექიმი გაფრინდაშვილი ცხინვალის რეგიონში არ იმყოფებოდა პოლიტიკური ინტერესების გათვალისწინებით, მისი ერთადერთი მიზანი პაციენტის მონახულება იყო.

შესაბამის ორგანოებს საკითხის სამართლიანად განსჯასა და ჩვენი კოლეგის რაც შეიძლება მალე გათავისუფლებას ვთხოვთ იმისათვის, რომ მისი, მისი ოჯახისა და მეგობრების ტანჯვა დასრულდეს.

თუ არსებობს რაიმე, რაც ჩვენ შეგვიძლია ამ პროცესის მშვიდობიანად დასასრულებად გავაკეთოთ, გთხოვთ, გვაცნობოთ.

გვსურს დაგარწმუნოთ, რომ იმ დროის განმავლობაში, რაც ჩვენ მას ვიცნობთ, ის ყოველთვის იყო საკუთარი პაციენტებისა და ავადმყოფების მიმართ თავდადებული.”

აღნიშნულ წერილს ხელს საფეხბურთო კლუბ “ბარსელონას” ექიმი რამონ კუგატი აწერს.

ინფორმაციის გადამოწმების მიზნით, მივწერეთ რამონ კუგატისა და მონსერატ გარსიას ორგანიზაციას. პასუხად მონსერატ გარსიასგან მივიღეთ, რომ ის ამ წერილის ავთენტურობასა და მასზე გაკეთებულ ხელმოწერებს ადასტურებს.