მატჩისშემდგომი მიმოხილვა – სახლისკენ, კარგ ხასიათზე

   ესეც ასე, “ბარსამ” აზიური ტურნე წარმატებით დაასრულა, ბოლო მეტოქე “დეგუ” 5:0 გაანადგურა და კარგ ხასიათზე ბრუნდება სახლში, სადაც ცოტა მოიწყენს კიდეც, რადგან “კამპ ნოუ” კიდევ დიდხანს ვერ იქნება მწყობრში და ლა ლიგის განრიგით სულ გასვლაზე მოუწევთ თამაში, ჟოან გამპერზე კი კაცმა არ იცის “კომოს” სად უმასპინძლებენ, სავარაუდოდ სავარჯიშო მოედანზე. ეს სულ გადასატანი ამბებია, მთავარია რომ დიდი პროექტი მალე დასრულდება, დიდ შემოსავალს მოიტანს და “ბარსას” ამოსუნთქვის საშუალებას მისცემს. აბსოლუტურად გამართლებულია, რომ სწორედ ახლა, ამ ფინანსური კრიზისის ჟამს გადაწყვიტეს “კამპ ნოუს” რეკონსტრუქცია, ეს იმხელა ამბავია, რომ ვადების გადაწევას როგორმე გავუმკლავდებით. 

მანამდე კი მიმოვიხილოთ მესამე მატჩი და შევაჯამოთ აზიური ტურნე. 

პირველი ტაიმი 

პირველ ტაიმში ასეთი შემადგენლობა ვნახეთ, მეკარე – ჟოან გარსია; მცველები – კუნდე, არაუხო, ჟერარ მარტინი, ბალდე; ნახევარმცველები – დე იონგი, გავი, დრო; თავდამსხმელები – რაფინია, ლევანდოვსკი, იამალი; 

ორი რამ განსაკუთრებული აღნიშვნის ღირსია, პირველი ის რომ ჟერარ მარტინი ცენტრალური მცველის პოზიციაზე ვნახეთ, ეს გამოწვეულია იმით, რომ “ბარსას” ძირითადად მემარჯვენე ცენტრები ჰყავს და ინიგოს გამოკლების შემთხვევაში პრობლემები იქმნება. ამიტომ მოსინჯა ფლიკმა მარტინი და მანაც მშვენივრად გაართვა თავი დავალებას. დიდი თავსატეხი კი არ ჰქონია, მაგრამ ამოწეული დაცვის პირობებში თამაშგარე ხაზს კარგად აკონტროლებდა. სწორედ ამ პოზიციაზე მის გამწესებას მოჰყვა მეორე გოლი, იდეალური გოლი, წინა მატჩებისას ვწერდით, რომ ფლიკი მარჯვენა და მარცხენა ნახევარსფეროების ათვისებას განაპირა მცველების მეშვეობით აპირებდა, როგორც წესი, ამ დროს გარემარბებისა და განაპირა მცველების ცვლილებას ვხედავთ, მაგრამ ამ მატჩში კიდევ უფრო საინტერესო “როქი” ვნახეთ, სანამ ბალდე ცენტრისკენ იყო შეწეული, რაფინია კი რვიანის პოზიციაზე, სწორედ ჟერარ მარტინმა ჩაირბინა მარცხენა ფლანგზე, მცველები რაფინიასა და ბალდეს შეყვნენ, მარტინმა ზუსტად იგრძნო მომენტი, კარგად აჩქარდა, რაფინიასგან ზუსტი პასიც მიიღო და მანაც უზუსტესი პასით დაასაჩუქრა ლევანდოვსკი. ეს მეორე გოლი იყო ჩემი აზრით ყველაზე გამორჩეული ტაქტიკური თვალსაზრისით. 

მეორე რაზეც ყურადღების გამახვილება ღირს ძირითადში გამწესებული დრო ფერნანდესია, კარგი შთაბეჭდილება დატოვა და კიდევ უკეთესი იქნებოდა ორი მეტრიდან რომ კარში მოერტყა, მაგრამ ცუდად დახვდა ბურთს, კარგად ვერ მიუდგა და ისეთი მომენტი გააფუჭა სანანებლად გაუხდა საქმე, თითქოს თავადაც დარწმუნდა რომ ჯერ ადრეა, ძირითადისთვის ამ სეზონში ვერ იბრძოლებს, თუმცა, დრო ალბათ მიეცემა. 

საუკეთესო იამალი იყო. თამაშობს ისევ ცაცია რონალდინიოსავით. საოცარი პასები, დრიბლინგები, გადაწყვეტილებები, ერთადერთი გოლი დააკლდა, არადა, ჰქონდა მომენტები. ეს ბიჭი მსოფლიოს საუკეთესო ფეხბურთელია. მისი ხასიათი და არეული გონება გვანერვიულებს, მაგრამ გვაქვს იმედი, რომ ნიჭსა და ტალანტს ბოლომდე გამოიყენებს. 

პირველ ტაიმში კიდევ ორი გოლი გავიდა, ორივე გავის ანგარიშზეა. პირველი მარცხენათი შეაგდო, წინა შეხვედრის მსგავსად, მეორე მარჯვენათი. მოტივირებულია, როგორც ყოველთვის ენერგიული და აპირებს კიდეც ძირითადისთვის ბრძოლას. გავი არაფრის დამთმობი არ არის. მარცხენა ფეხით საჯარიმოს მისადგომებიდან შეაგდო, ზუსტი დაბალი დარტყმით, მარჯვენათი კი მეკარეს გადაავლო ბურთი, რბილად, მესის სტილში. შექებაც დაიმსახურა. 

მეორე ტაიმი

ცვლილებაზე შემოვიდნენ – შესნი, ერიკ გარსია, კუბარსი, კრისტენსენი, ჟოფრე, კასადო, ტონი ფერნანდესი, ოლმო, პედრი, რუნი, რაშფორდი; მატჩის მიწურულს შესნი კოხენმა შეცვალა, ხოლო კუბარსიმ მცირე დაზიანება მიიღო და ფორტმა ჩაანაცვლა. უნდა აღინიშნოს რომ ამჯერად ფერან ტორესს საერთოდ არ უთამაშია. ხოლო, ინიაკი პენიას საერთოდ დრო არ მისცეს, მის წასვლას დღემდე ელიან. 

მეორე ტაიმში კიდევ ორი გოლი გავიდა, ორივე ლამაზი, კარგი კომბინაციის შედეგად, პირველი ტონი ფერნანდესმა შეაგდი, წამოვიდნენ ეს ფერნანდესები ალკანტარებივით და იმედი უნდა გვქონდეს მათი. ოლმომ რაშფორდთან გაითამაშა და ჟერარ მარტინისა არ იყოს, ტონი ფერნანდესმაც ზუსტი წუთი იპოვა ასაჩქარებლად, გავიდა ერთი-ერთზე და მშვიდად შეაგდო. დავუწეროთ პლუსი. 

მერე კი როგორც იქნა რაშფორდმაც შეაგდო თავისი სადებიუტო გოლი, ერიკ გარსიას პასი შეირგო, ერთი შეხებით ზუსტად დაარტყა. რაშფორდი აუცილებლად შეყრის გოლებს, აქამდე ასეთ გუნდში არ უთამაშია, რომელსაც უმეტესად ბურთი უჭირავს და დამკვიდრებულია მეტოქის ნახევარზე. მოკლედ, მისიც გვეიმედება. 

ოლმო მონდომებული იყო, მაგრამ გოლის გარეშე დარჩა და რუნიც ყველაფერს აკეთებს რაც შეუძლია.

რა უნდა ითქვას 

 პირველ რიგში, უნდა ითქვას ის, რომ ლაპორტას, დეკუსა და ფლიკის გაწეული სამუშაო ქებას იმსახურებს. არა იმიტომ, რომ ფსკერამდე დაშვებული ფინანსებით მაინც ყოველ ჯერზე კარგად ივაჭრეს, არამედ იმიტომ რომ გუნდი ბოლომდე გაწმინდეს ზედმეტისგან. არ აქვს მნიშვნელობა ძირითადის წევრებზე ვსაუბრობთ, ცვლილების ხალხზე თუ აკადემიაზე, აბსოლუტურად ყველა ორგანულად ჯდება ფლიკის გუნდში, ესე იგი, მთავარი პრობლემა თავიდან ბოლომდე მოგვარებულია. თქვენ ეს იოლი საქმე არ გეგონოთ, ამას დიდი დრო, ნერვები და ტვინი სჭირდებოდა, ჰოდა, გაართვეს კიდეც თავი. 

ასევე, უნდა ითქვას, რომ დიდი კონკურენციაა. განსაკუთრებით მოედნის ცენტრში, “ბარსა” სეზონისთვის აბსოლუტურად მზად არის. 

ბოლო კი ისიც ვთქვათ რომ ყველა ტრანსფერი კარგი ჩანს, აი, გაამართლებენ თუ არა, მაგაზე სეზონის ბოლოს ვიმსჯელოთ. 

ახლა კი მოვემზადოთ გამპერის თასისთვის – 10 – ში, 23:00 ზე, “კომოსთან”.