დეტალები – როგორ შედგა რაშფორდის ტრანსფერი

 

“ბარსელონასი” არ იყოს, “იუნაიტედსაც” თავისი გასჭირვებია, “ბარსაზე” გაცილებით დიდი შეცდომები დაუშვეს, განსაკუთრებით ტრანსფერების ამბავში, ფერგის წასვლის მერე ფეხზე ვერ დადგნენ და ახლა რაშფორდის თავიდან მოცილება თავისი ხელფასიანად მათთვის კარგი ამბავია. გასულ სეზონში სანამ გაანათხოვრებდნენ მარკუსმა “იუნაიტედის” რიგებში 7 გოლი შეაგდო, მაგრამ ამორიმის ნდობა ვერ მოიპოვა, 12 დეკემბერს “პლზენთან” ითამაშა და იქ მორჩა მისი მანჩესტერული ისტორია. “ვილაში” გაანათხოვრეს, მერე დაბრუნდა, მაგრამ ამორიმის მოთხოვნით გუნდისგან განცალკევებით ვარჯიშობდა. ბოლოს კი მისი ნომერი მატეუს კუნიას გადასცეს. ესე იგი, მრკუსს უთხრეს არაფერში გვჭირდები და ჯანდაბაში წასულხარო. რაშფორდი კიდევ გაცილებით მაგარ ადგილზე წავიდა და ახლა ჩემპიონთა ლიგაზეც ითამაშებს. 

“იუნაიტედზე ცუდს ვერაფერს ვიტყვი, იქ გატარებული დრო ძალიან მნიშვნელოვანი იყო როგორც ჩემს კარიერაში, ისე ჩემს ცხოვრებაში. მათ წარმატებებს ვუსურვებ”, – თქვა მარკუსმა. 

რაშფორდი დათანხმდა იმას, რაზეც ნიკომ უარი თქვა, ის ენდო “ბარსას” ხელმძღვანელებს, რომ სატრანსფერო ფანჯრის დახურვამდე დაარეგისტრირებენ. მსგავსი მოთხოვნა კონტრაქტში არ ჩაიწერა და შესაბამისად, რაშფორდს დაურეგისტრირებლობის შემთხვევაში წასვლა არ შეეძლება. კლუბმა მადლიერება გამოხატა ნდობის გამო. როგორც ირკვევა ლაპორტას რაშფორდის შეძენა იანვარში ურჩიეს, 21 იანვარს ლისაბონში შეხვედრაც შედგა, “ბენფიკასთან” მატჩამდე, არტურო კანალესი, რომელიც AC Talent-ს წარმოადგენს, დეკუს შეხვდა და რაშფორდის ექვსთვიანი იჯარა შესთავაზა, მაგრამ მაშინ სხვაგვარად გადაწყდა, რაც სულაც არ არის გასაკვირი, რადგან “ბარსას” იანვარში თავიდან მოუწია ზაფხულში ნაყიდი ფეხბურთელების დარეგისტრირებაზე ნერვიულობა.  ფლიკმა რაშფორდის ვარიანტი მოიწონა და საუბარიც შედგა მათ შორის. როგორც ამბობენ ფლიკს მოსწონს მისი სათამაშო სტილი და უნარები. მაშინ მთელი ყურადღება და მობილიზებული თანხები დანი ოლმოსა და პაუ ვიქტორის ხელახალმა რეგისტრაციამ წაიღო. ლისაბონში შეხვედრიდან ცხრა დღეში რაშფორდი უკვე “ასტონ ვილას” ფორმით პოზირებდა. 

 

მხარეები შეთანხმდნენ, რომ მოლაპარაკებებს ზაფხულში განაახლებდნენ, თუმცა, რაშფორდმა ეგეთი კარგი შთაბეჭდილებაც ვერ დატოვა “ასტონ ვილაში” რომ “ბარსას” პირველი კანდიდატი ყოფილიყო. თავიდან დიასზე გაკეთდა აქცენტი, შუა გზაში ლაპორტა დაარწმუნეს, რომ ისევ ნიკოს მიბრუნებოდნენ, მიუხედავად იმისა, რომ გასულ ზაფხულს ფეხბურთელი “ბარსას” ცუდად მოექცა, ლაპორტა დაჰყვა რჩევებს, მაგრამ შეცდა, ნიკომ ისევ გადააგდო “ბარსა”, დიასი კი “ლივერპულმა” არ გაუშვა, არც აპირებდნენ მის გაშვებას და ჟოტას დაღუპვის შემდეგ ტრანსფერი საერთოდ გამოირიცხა. ასე მიუბრუნდნენ მოლაპარაკებების მაგიდას მარკუს რაშფორდთან. 

“გადაწყვეტილების მიღება რთული არ ყოფილა, “ბარსაში” გადმოსვლა ჯერ კიდევ იანვარში მსურდა, მაგრამ მაშინ სხვაგვარად მოხდა, “ვილაში” ნაყოფიერი პერიოდი გავატარე და საერთო ჯამში კმაყოფილი ვარ როგორც დასრულდა ყველაფერი, – თქვა ინგლისელმა – კლუბში ოჯახური გარემოა, ეს მიმანიშნებს, რომ სწორი გადაწყვეტილება მივიღე, ერთი სული მაქვს მოედანზე როდის გავალ და ქომაგების თვალწინ ვითამაშებ”. 

ერთი მნიშვნელოვანი ამბავიც. მარკუსის პოზიცია ინგლისის ნაკრებში შეირყა, მას მერე რაც მისი კარიერა ვერ წარიმართა სათანადოდ, ახლა კი შრომა მოუწევს, რადგან მომავალ წელს მსოფლიო ჩეპიონატია, იქ მოხვედრა კი ყველა ფეხბურთელის ოცნებაა.