არჩევნების გადადება დაუშვებელია

ხელმოწერათა გადამოწმების პროცესის დასრულების შემდეგ, ჰორიზონტზე მხოლოდ სამი კანდიდატიღა დარჩა – ჟოან ლაპორტა, ვიქტორ ფონტი და ტონი ფრეიშა.

არჩევნები 24 იანვარს არის დაგეგმილი, თუმცა, დიდი ალბათობით, იგი გადაიდება. გადაწყვეტილება დღეს, “ბარსელონასა” და კატალონიის მთავრობას შორის გასამართი შეხვედრის შემდეგ იქნება მიღებული.

კანდიდატთაგან არჩევნების დათქმულ დროს ჩატარებას მხოლოდ ლაპორტა ემხრობა, ფონტი და ფრეიშა კი აცხადებენ, რომ არჩევნებში კლუბის წევრთა მაქსიმალური მონაწილეობა უნდა იყოს უზრუნველყოფილი, ამასთან, პროცესმა ეპიდსიტუაცია არ უნდა დაამძიმოს. არჩევნების გადადება სურს კლუბის დროებითი საბჭოს ხელმძღვანელს, კარლეს ტუსკეტსსაც.

უცნაური იქნებოდა, რომელიმე მათგანს განსხვავებული პოზიცია რომ დაეფიქსირებინა. ოფიციალურ კანდიდატად რეგისტრირების პროცესმა ნათელი გახადა, რომ ლაპორტა რეიტინგის პიკშია, მან იმაზე მეტი ხელმოწერის შეგროვება მოახერხა, ვიდრე ყველა სხვა კანდიდატმა ერთად. არჩევნები ხვალ რომ ტარდებოდეს, აუცილებლად მოიგებდა.

ფონტისა და ფრეიშას მიზანს, მხოლოდ, დროის გაწელვა წარმოადგენს. რეალურად, თუ ვინმეს ლაპორტასთვის “კიდევ ერთხელ” პრეზიდენტობისკენ მიმავალი გზის გადაღობვის თეორიული შანსი გააჩნია, ეს ისევ ვიქტორ ფონტია, თუმცა, რთული წარმოსადგენია, 10 დღეში, 1 თვეში ან სულაც 3 თვეში, რა უნდა მოხდეს ისეთი, რაც მოვლენათა განვითარების ასეთ რადიკალურ ცვლილებას გამოიწვევს.

უმჯობესი იქნება, კლუბს იანვარშივე ჰყავდეს გადაწყვეტილების მიმღები პირი, რომელსაც ექნება ლეგიტიმაცია და, შესაბამისად, პასუხისმგებლობაც კლუბის ფეხბურთელების, წევრებისა და გულშემატკივრების წინაშე. ამასთან, “ბარსელონაში” არის პრობლემები, რომელთა მოგვარებისთვისაც სტრატეგიული და საფუძვლიანი მიდგომა არის საჭირო.

კარლეს ტუსკეტსის სახით, დროებითი მმართველის უფლება-მოვალეობებში კლუბის ეკონომიკური განვითარების დაგეგმვა, საკადრო და სატრანსფერო პოლიტიკის წარმართვა არ შედის. მის ერთადერთ ფუნქციას არჩევნების დანიშვნა წარმოადგენს. ტუსკეტსი კი უკვე მესამე თვეა, რაც “ბარსას” მმართველობითი სისტემის სათავეშია და იღბლით მოპოვებული გავლენის მაქსიმალურად გამოყენებას ცდილობს. ფეხბურთელებთან ხელფასების შემცირების საკითხზე მოლაპარაკებების გამართვა თავის თავზე აიღო, გუნდს მადრიდში გაჰყვა და “ატლეტიკოსთან” მატჩს თვალი ტრიბუნებიდან მიადევნა, ესპანურ მედიაში კი იუწყეს, რომ ფეხბურთელებს “პატარა კაცისგან” ასეთი ჟესტი არ ესიამოვნათ. ასევე, შეგვიძლია გავიხსენოთ, მესის გაშვებასთან დაკავშირებით გაკეთებული  განცხადებები. მოკლედ, “ბარსას”, ახალ პრეზიდენტთან ერთად, ბართომეუს დანატოვარი კადრებისგან განთავისუფლებაც სჭირდება.

მიუხედავად იმისა, მოგვწონს ეს თუ არა, ლაპორტა, დიდი ალბათობით, არჩევნებს მოიგებს. კლუბს ახალი, ლეგიტიმური ხელმძღვანელობა სჭირდება და არჩევნების გადადება, “ბლაუგრანასთვის” მხოლოდ ზიანის მომტანი იქნება.