რასინგი ბარსელონასთან სამართლებრივ დავას აპირებს

სანტანდერის “რასინგი” აპირებს, “ბარსელონას” ლა ლიგაში უჩივლოს, რისი მიზეზიც პაბლო ტორეს კატალონიური კლუბიდან “მალიორკაში” გადასვლაა.

პაბლო ტორე “რასინგიდან” “ბარსელონაში” 2022 წლის იანვარში 5 მილიონ ევროს სანაცვლოდ გადმოვიდა. ბონუსების ჩათვლით ტრანსფერის ფასი პოტენციურად 20 მილიონი ევრო იყო, თუმცა სანტანდერულ გუნდს ბონუსებიდან მხოლოდ ერთი მილიონი, ანუ ჯამში 6 მილიონი ევრო შეხვდა.

მიმდინარე სეზონის დასაწყისში პაბლო ტორემ “ბარსელონა” დატოვა და “მალიორკაში” 5 მილიონ ევროდ გადავიდა. ვინაიდან “ბლაუგრანამ” ესპანელი ნახევარმცველის ტრანსფერებიდან მოგება ვერ ნახა, არც “რასინგისთვის” დამატებითი თანხის გადახდის ვალდებულება წარმოეშვა, რამაც კანტაბრიელთა განაწყენება გამოიწვია.

Sport-ის ცნობით, “რასინგის” პრეზიდენტმა “ბარსელონას” ოფიციალური წერილი უკვე მისწერა და ახლა აპირებს, კატალონიელებს ლა ლიგაში უჩივლოს. “თეთრ მწვანეების” აზრით, პაბლო ტორეს “მალიორკაში” ტრანსფერი არა 5, არამედ 10 მილიონ ევროდ უნდა შეფასდეს. საქმე ისაა, რომ ტრანსფერის დროს “ბარსამ” ტორეს 10 მილიონ ევროდ უკან გამოსყიდვის უფლება დაიტოვა. “რასინგის” წარმომადგენელთა აზრით, ეს ნიშნავს, რომ “ბლაუგრანა” პაბლოს სწორედ 10 მილიონად აფასებს და არა 5 მილიონად, რის გამოც ტრანსფერის თანხად 10 მილიონი უნდა განისაზღვროს და საბოლოო ჯამში მიღებული ფინანსური სარგებლიდან წილი სანტანდერელებსაც უნდა შეხვდეთ.

“ბარსელონაში” მიაჩნიათ, რომ “რასინგის” ამ მოთხოვნას არანაირი რეალური საფუძველი არ გააჩნია.