მატჩისშემდგომი მიმოხილვა: ბარსა წინ გაიჭრა

  ესეც გამოტოვებული მატჩი “ოსასუნასთან”. “ბარსამ” მოიგო და ლა ლიგაში წინ გაიჭრა. მატჩამდე იყო მსჯელობა გაეპროტესტებინათ თუ არა ასე სწრაფად ჩანიშნული შეხვედრა, სანაკრებო პაუზებზე ისედაც იზრდება ტრავმების მაჩვენებელი, მერე კიდევ იქიდან დაბრუნებული რომ ორ დღეში კლუბში ითამაშებ ვერ არის დალაგებული ამბავი, მაგრამ “ბარსამ” მაინც ახლა გადაწყვიტა ამ შეხვედრის ჩატარება და ბევრი წუწუნიც არ ყოფილა. მატჩის წინ ფლიკს ჟურნალისტებმა კითხეს, “რეალი” ამდენს წუწუნებს კალენდარზე და თქვენ რას იტყვითო? ამან კიდევ ამაყად უთხრა, “ჩვენ ბარსელონა ვართო”, და დასვა წერტილი. 

გადაურჩა “ბარსა” ასეთ გრაფიკს? ვერა. დანი ოლმო ემსხვერპლა გადატვირთვას. როგორც ამბობენ 1-2 კვირას გამოტოვებს. დანამდვილებით უკვე მომდევნო დღეს გახდება ცნობილი. ძლივს ფორმა აკრიფა და ისევ უქმობა მოუწევს. ვერ აქვს მაინცდამაინც გამორჩეული სეზონი, არადა, დასაწყისი მართლაც მაგარი ჰქონდა. კაცი იფიქრებდა რომ ძირითადში თამაში გარანტირებული ექნებოდა, ახლა კიდევ სულ სხვა სურათი გვაქვს. 

მარტივად, ლამაზად 

რაფინიამ, არაუხომ და ლევანდოვსკიმ დაისვენეს. ბრაზილიელი საერთოდ არ ყოფილა, არაუხო განაცხადში შეიყვანეს, ლევანდოვსკი მეორე ტაიმში გამოვიდა და თავისი საქმე მშვენივრად გააკეთა. რაფინიასაც მოუთხოვია განაცხადში შეყვანა, მაგრამ ფიზიკურთან ერთად ძლიერი ემოციური სტრესი მიიღო, მთელ არგენტინას დაემუქრა, ჩამოვალთ და ბურთს გადაგახევთ თავზეო, ჩავიდა და იქით გადაახიეს. მთელმა არგენტინამ დასცინა და ისე გაუშვეს სახლში. 

ვერ არის ასეთი ამბის მონელება მარტივი. რა რჯიდა, რა ვიცი.. 

რაფინიასა და ლევანდოვსკის ნაცვლად ფერან ტორესი და დანი ოლმო ვიხილეთ ძირითადში. გავიც მოედანზე იყო და კარგი მატჩი ჰქონდა, საერთოდ, ნახავერდაცვის ცენტრში ყველამ ძალიან კარგად ითამაშა, ფრენკი დე იონგიდან დაწყებული, შეცვლაზე შემოსული ფერმინ ლოპესით დამთავრებული, მაგრამ მთავარი კაცი მაინც პედრი იყო, რომელიც გახდა კიდეც მატჩის საუკეთესო ფეხბურთელი. პედრი საუკეთესო სეზონს ატარებს “ბარსელონაში” და მისგან კიდევ და კიდევ უფრო მეტს უნდა ველოდოთ. 

განაცხადში იყო, მაგრამ დრო არ მისცეს ანსუ ფატის, ფლიკი დიდხანს ცდილობდა მის მოტივირებას, როგორც იწერებოდა განსაკუთრებული მეთოდოლიგიაც კი შეიმუშავა მისთვის, მაგრამ როგორც ჩანს არაფერი გამოუვიდა. ეს ბიჭი მგონი საბოლოოდ გატყდა. იმაზე მეტად, ვიდრე ბოიან კრკიჩი. ჩაიქნია ხელი და ამოქნევას აღარ აპირებს. 

ლამინე იამალი კი ისევ დაფრინავს! 

ტორესმა გაიხარა

პირველი გოლი ფერან ტორესმა შეაგდო, კომბინაციის სულის ჩამდგმელი ფრენკი დე იონგი იყო, რომელმაც ნახევარდაცვის ზონა სწორი და ამავე დროს ლამაზი მოქმედებით გაჭრა, შეტევა სწორად წარმართა და ფერან ტორესის გოლიც ვიხილეთ. დასწრებაზე კარგად ითამაშა. მასზეც შეიძლება ითქვას რომ კარგი სეზონი აქვს, როგორც სათადარიგო ფეხბურთელს. ლარსონამდე ბევრი უკლია, მაგრამ როცა თამაშობს, რაღაც გამოსდის კიდეც.. ხანდახან. 

მეორე გოლი მალევე გავიდა, “ოსასუნას” კარში პენალტი დაინიშნა, დანი ოლმომ ვერ გამოიყენა, თითქოს კარგად დაარტყა, მაგრამ მეკარემ აჯობა, მსაჯმა კი გაამეორებინა, არა მეკარის ხაზის, არამედ მცველის სულსწრაფობის გამო, ნაადრევად შეიჭრა საჯარიმოში. ისევ ოლმო მივიდა, ამჯერად შეაგდო, იგივე კუთხეში დაარტყა, გაიტანა, ტრავმა მიიღო და გავიდა. კარგია რომ გატანა მაინც მოასწრო. სტატისტიკაში ჩაეწერება. ვინ იცის, იქნებ სეზონის ბოლოს ბონუსებსაც გამოკრას ხელი. 

“ბარსა” მთელი მატჩის განმავლობაში დომინირებდა, ლამინე და პედრი შოუს ელემენტებსაც გვთავაზობდნენ. ისიც გასახარი ამბავია, რომ აშკარად ეტყობოდათ, ძალების დაზოგვით თამაშობდნენ. ასე კიდევ დიდი გუნდები იგებენ თამაშებს. წერტილი რობერტ ლევანდოვსკი დასვა, შეცვლაზე შემოსვლიდან მალევე შეაგდო თავისი გოლი, ლამაზი გოლი, გადასარევი კონტრშეტევის შედეგად, სულ რაღაც სამსვლიანი კომბინაცია გამოდგა საკმარისი – გავი, ფერმინი, ლევანდოვსკი – 3:0. 

წინ ნახევარფინალია

“ბარსა” “რეალს” სამი ქულით უსწრებს, “ატლეტიკო” კი გვარიანად ჩამორჩა, მათთან სხვაობა უკვე შვიდი ქულაა. ბევრი არც არაფერია დარჩენილი. როგორც ჩანს, “ბარსა” – “რეალს” შორის უნდა გაირკვეს ჩემპიონის ბედი. 

2025 წელს “ბარსა” ჯერ არ დამარცხებულა. გუნდს ბრწყინვალე სერია აქვს. მომდევნო მატჩი “ჟირონასთან” ჩაინიშნა, აი, მერე კიდევ დიდი მატჩის ჯერია, ისევ “ატლეტიკო”, ისევ მადრიდში, ამჯერად კოპას ნახევარფინალში. მაგარი მატჩი გველის.