მატჩისშემდგომი მიმოხილვა: Catch Me If You Can..

ქებათა ქება ტაქტიკას სადაც ბუსკეტსი, დე იონგი, გავი და პედრი ერთად იყრიან თავს! 

ყოველ ჯერზე სურვილს გამოვთქვამ, რომ მუდმივად ასე ითამაშოს ჩავის “ბარსელონამ”, მაგრამ მოდის შემდეგი მატჩი და ისევ იცვლება სქემა. არადა, ეს არის ის, რაც გვჭირდება. ჩავიმ გასაღები იპოვა, ჩავიმ გამოსავალს მიაგნო. ამ ტაქტიკით ერთი თამაშიც კი არ ჩაუგდია, ყოველთვის მაღალი ხარისხია, ყოველთვის სანახაობრივია, ყოველთვის შედეგიანია. “მანჩესტერს” ასე უნდა ვეთამაშოთ. 

გამოგვაკლდა დემბელე, მის ნაცვლად რაფიანია ვიხილეთ, რომელმაც ძალიან კარგი მატჩი ჩაატარა. ერთ-ერთი საუკეთესო “ბარსას” შემადგენლობაში. ფატი და ფერანი ისეთ ცუდ ფორმაში არიან საერთოდ არ ღირს 4-3-3-თან მიბრუნება. იმედიანად ვარ, მომწონს ამ გუნდის ყურება. 

თუმცა, გულიც დამწყდა, ძალიან მინდოდა კიდევ ერთი მატჩი ჩაგვემთავრებინა გაშვებული გოლის გარეშე. “ბეტისი” თითქოს ქმნიდა სახიფათო მომენტებს, მაგრამ რეალური შანსი არ შეუქმნიათ, უფრო ამის ილუზია იქმნებოდა, გულშემატკივრების სუპერაქტიურობისა და შექმნილი ატმოსფეროს გამო. “ბარსამ” ძალიან კარგად დაიცვა თავი, ჩვენი დაცვის ხაზი ასეთი კარგი ბოლოს ლუის ენრიკეს დროს თუ იქნებოდა, ეგეც სადებიუტო სეზონში. 

მაინც გავუშვით.. 

გავბრაზდი კიდეც კუნდეზე. რეკორდზე მიჭირავს თვალი, ყველა გოლს განვიცდი, თუნდაც არაფერს ცვლიდეს. კუნდემ უყურადღებოდ ითამაშა, პირველი შეცდომა იყო ის, რომ კორპუსით კარისკენ იდგა, ასეთ დროს ბურთის გამოტანა ყოველთვის ძალიან რთულია, მერე ჩათვალა, რომ მცირე შეხებით შტეგენს მიაწვდიდა ხელებში, მაგრამ ვერც ძალა გათვალა და ვერც ტრაექტორია, მიძინებული “ბეტისი” გამოაფხიზლა და კინაღამ დავისაჯეთ. 

ეგ არაფერი.. 

სამი ქულა წამოვიღეთ, “ბარსას” პირველობა კიდევ უფრო დამაჯერებელი ხდება. 

საყრდენი ზონა

ალბათ ეს იყო ამ ფორმაციის “ბარსას” გასაღები, დე იონგისთვის საჭირო პოზიციის მოძებნა. ყველა თავს იკავებდა ამგვარი ტაქტიკური გადანაცვლებისგან, ჩავიმ კი გამოსავალი იპოვა. ბუსკეტსს აღარ შეუძლია მარტო ითამაშოს საყრდენ ზონაში, ეს მისთვის უკვე ზედმეტი პასუხისმგებლობაა, არც დე იონგს შეუძლია იმიტომ, რომ მუდმივად ტოვებს ცენტრალურ ზონას, ასე თამაშობს, ვერაფერს იზამ, თუ დაავალებ, რომ ბუსკეტსივით ითამაშოს, პოტენციალის ნახევარსაც კი ვერ გამოავლენს, აი, ეს თავსატეხი იდგა დღის წესრიგში რამდენიმე წლის მანძილზე. ახლა დალაგდა. ყველაფერი დალაგდა. 

ბუსკეტსი მყარად დგას თავის პოზიციაზე და მის ირგვლივ დე იონგი მოძრაობს, ერთმანეთის ნაკლი ამოავსეს, ერთმანეთი შეავსეს და “ბარსას” კვლავინდებურად დაუბრუნდა თავდაჯერება. ისევ აქვს ის ძრავა, რომელიც სიღრმიდან უბიძგებს. 

ინდივიდუალურად რაც შეეხება, ბუსკეტსს ბრწყინვალე მატჩი ჰქონდა. როგორც დაცვით, ისე შემტევ ფაზაში. ვერასდროს ასეთ დონეზე ვერ ითამაშებდა, ვერც კუმანის, და ვერც სხვა კანდიდატების ხელში, რომელთაც “ბარსას” უკავშირებდნენ, ეგ კი არა, შესაძლოა, უკვე გაქცეულიც ყოფილიყო. 

ეს ჩავის დამსახურებაა. თავიდან ბოლომდე მან დააბრუნა ბუსკეტსის მნიშვნელობა. უბრალოდ მიხვდა, რომ ასაკოვანი სერხიოსთვის რაღაც სხვა იყო საჭირო.

პედრი

წამით მაინც ხომ შეგეკრათ სუნთქვა? რაღაც ისეთი გააკეთა, რაც თურქეთში იკადრა, რაც “სევილიასთან” ვნახეთ, ყოველ ტურში თუ არა, ყოველ სეზონში ორჯერ-სამჯერ მაინც შექმნის შედევრებს. სამწუხაროდ ვერ დაასრულა, თავის აწევა ვერ მოასწრო, მხოლოდ ის შენიშნა, რომ მეკარე ძალიან მიუახლოვდა და მოტყუება სცადა, არადა, თავი რომ აეწია მცირე შეხებით გადაავლებდა თავზე. 

ეს რა მოძრაობა გააკეთა.. 

ისევ ეს პაუზა, ცნობილი შეყოვნება, გონებაში წინასწარ დახატული მოვლენები, ორი გაფუჭებული მცველი და ხელისჩასავლებ მანძილზე მისვლა მორიგ შედევრამდე. 

არ გამოვიდა.. 

რა ლამაზი იქნებოდა, “ბარსელონური”, ხელოვნების მორიგი ნიმუში. 

ძალიან დაწყდა გული, ჩვენსავით. თავადაც მიხვდა, რომ სიმდიდრე დაკარგა, გუნებაც გაუფუჭდა და ტაიმის ბოლოს ძალიან მაგარი მომენტიც გაუშვა ხელიდან. ყველაზე მეტი მომენტი მგონი პედრიმ შექმნა, თუმცა, ვერცერთი ვერ გამოიყენა. 

გავი კი ამ დროს დაქრის ედგარ დავიდსივით! როგორი ხისტი ბიჭია, დავიდსის გარდა მეორე ასეთი არ მინახავს, თან ასეთი ტექნიკური რომ იყოს, კარგი პასის კულტურით, გამტანი და პასის გამკეთებელი, თან კიდე ასეთი ხისტი და მებრძოლი. მოირგო თავისი ექვსიანი და ამაყად შეაბიჯა მოედანზე, ახალი ჩავიო კი იძახიან, მაგრამ ხომ გეუბნებით.. თეთრი ედგარ დავიდსია. 

შეტევა 

რაფინია ვახსენეთ, კარგი იყო, მოულოდნელად კარგი. შეტევის დროს ბალდეც გარემარბი ხდება და მისი დიდი დამსახურებაა გამარჯვებაში, მართალია დასკვნით ფაზაში თუ დარტყმას გადაწყვეტს კარგად ვერასდროს სრულდება ეგ ამბავი, მაგრამ სარგებელი ყოველთვის მოაქვს. 

გილოცავთ! დანი ალვესის შემთხვევა აღარ განმეორდება. ჟორდი ალბას შემცვლელი ნაპოვნია. 

ლევანდოვსკი დაგვიბრუნდა, დაბრუნდა გოლით, ნახევარმომენტი ისევ გოლად აქცია, აფრინდა ჩვენი ურუგვაელი ცხოველი და ზუსტად იქ ჩააგდო ბურთი სადაც ლევანდოვსკი მეფობს. 

ორი მომენტი ჰქონდა მთელ თამაშში, ერთი გოლად აქცია. სწორედ ამისთვის არის “ბარსაში”, ნახევარმომენტები აქვს გასატანი. დიდი ძალაა ლევანდოვსკი, “მანჩესტერთან” ჩვენი ჯოკერი უნდა იყოს, არავის მასზე დიდი გამოცდილება არ აქვს, ბუსკეტსს თუ არ ჩავთვლით. 

შემდეგ ტურში “სევილიას” დავუხვდებით. მერე ერთი კვირით შევისვენებთ, “ვილიარეალს” ვესტუმრებით და “მანჩესტერის” ჯერიც მოვა. 

ყველაფერი წინ არის..