ლიდერები სამორასა და პიჩიჩის ჯილდოებისთვის ბრძოლაში

ლა ლიგის მიმდინარე გათამაშებაში “ბარსელონა” ჩემპიონობისთვის ბრძოლაში ვერა, მაგრამ ინდივიდუალურ ჯილდოებში ლიდერობს.

6 ტურის შემდეგ ტურნირის საუკეთესო ბომბარდირი რობერტ ლევანდოვსკია, რომელსაც 8 გოლი აქვს გატანილი. პოლონელი მე-2 ადგილზე მყოფ ბორხა იგლესიასს 2, ხოლო მესამეზე მყოფ იაგო ასპასს 3 გოლით უსწრებს. “პიჩიჩის” ჯილდოსთვის ბრძოლაში მთავარი ფავორიტი სწორედ ლევანდოვსკია.

“ბარსელონელი” ლიდერობს “სამორას” ჯილდოსთვის ბრძოლასაც. მარკ-ანდრე ტერ შტეგენმა 6 ტურში მხოლოდ 1 გოლი გაუშვა (ისიც რიკოშეტით დარტყმული). სავარაუდო კონკურენტებს, ტიბო კურტუასა და იან ობლაკს ის უკვე 5-5 გოლით უსწრებს. მე-2 ადგილზე კი “ვილიარეალის” კარის დარაჯი ხერონიმო რულია 2 გაშვებული გოლით.

“ბარსელონას” მეკარეებს “სამორას” ჯილდო ყველაზე მეტჯერ, 20-ჯერ აქვთ მოგებული, მაგრამ ეს 2015 წლის შემდეგ არ მომხდარა. 2014/15 წლების სეზონში ლა ლიგის საუკეთესო მეკარის წოდება კლაუდიო ბრავომ მოიპოვა. ტერ შტეგენს კი ეს ჯილდო ჯერ მოგებული არ აქვს.

“ბარსელონას” ესპანეთის ჩემპიონატის მოგების შანსიც აქვს, თანაც არცთუ მცირე. მართალია, “რეალი” 6 ტურის შემდეგ ისევ უდანაკარგოა, მაგრამ მადრიდელებზე ცუდად არც “ბარსა” გამოიყურება, რომელიც ლიდერს მხოლოდ 2 ქულით ჩამორჩება.

თუ “ბარსელონა” ჩემპიონატის, “პიჩიჩისა” და “სამორას” ჯილდოებს მოიგებს, ეს კლუბის ისტორიაში მხოლოდ მეორე “ჰეთ თრიქი” იქნება. აქამდე სამივე ტიტულის მოგება “ბარსამ” მხოლოდ ერთხელ, 2009/10 წლების სეზონში მოახერხა, როდესაც ლა ლიგის საუკეთესო გუნდი “ბარსელონა”, საუკეთესო ბომბარდირი ლეო მესი, ხოლო საუკეთესო მეკარე ვიქტორ ვალდესი გახდა.